Búgin “Qasiretti Qańtar oqıǵasyna” týra 1 jyl. Byltyr 4-qańtar kúni qazaq qoǵamyn dir silkindirgen, qara jamyldyryp, bılikke synaq bolǵan aıryqsha jaǵdaı oryn aldy. Táýelsizdik besigi sanalatyn Almaty qalasy shahar tarıhynda bolmaǵan búlinshiliktiń astynda qaldy.
Qurban bolǵan beıkúná sábıler, balasynan aıyrylǵan analar, ákesinen aıyrylǵan balalar. Halyqtyń únin bılikke jetkizemiz dep beıbit sherýge shyqqan jandardyń oqqa ushýy, tergeýge alynyp, qamalyp, betine útik basylyp, azaptalýy...
Narazylyq Jańaózennen bastalyp, keıin birneshe aımaqta jalǵasyn tapty. Eń soraqysy - sherý Almatyda da oryn alyp, qala túgeldeı qara jamyldy. Qala qırady, ákimdik ǵımaraty órtendi, dúkender tonaldy.
Narazylyq sherýi 1-qańtardan bastalyp, 4-qańtar kúni naǵyz shıeliniske aınaldy. Búkil Qazaqstan boıynsha mıtıngilerge qatysýshylar sany kúrt artyp, 37 myńǵa jetti. Atyraý oblysynda Teńizshevroıl kompanııasynyń jumysshylary jumysyn doǵaryp, ónim shetelge áketilmeýi úshin avtotrassa men temirjoldy japty. Atyraý, Aqtóbe oblystarynda ózge ken oryndaryn da ereýilder tolqyny basty. Qaraǵandy oblysynda "ArselorMıttal Temirtaý" shahterlary, metallýrgtar, Jezqazǵandaǵy "Qazaqmys" kenshileri, mys balqytýshylar ereýilderin bastady. 4–5 qańtarda otandyq óndiris oshaqtary, ónerkásiptik kásiporyndar, tústi, qara metallýrgııa óndirisiniń betkeustar oshaqtaryn narazylyq sharalary jaılady.
Nátıjesinde Jańaózende bastalǵan narazylyqtan soń, gaz baǵasy 50 teńgege tústi. Birqatar bılik ókilderi qyzmetinen bosatylyp, keıbiriniń ústinen osy ýaqytqa deıin qylmystyq is qozǵalyp jatyr.
Burynǵy Prezıdenttiń zańsyz baıyǵan birqatar týysqandary, dostary qamaýǵa alyndy, aldy sottaldy. Al jańa Prezıdenttiń jaqyn týystaryna joǵary laýazymdardy ıelenýge tyıym salyndy. Onyń da bılikti jeke-dara ıelenýine tosqaýyl qoıyldy.
Alaıda orny tolmas qazaǵa alyp keldi. 235-ke jýyq adam qaza taýyp, 1 249 tulǵa sottaldy. 2022 jyly halyqty eseńgiretip, bılikti shoshytqan 1 aptaǵa sozylǵan oqıǵa esten ketpesi anyq. Alda ótkenniń qateligin qaıtalamaý úshin qadamymyzdy nyq basýymyz kerek!
