Qazaq eliniń Oqý-aǵartý mınıstri Ashat Aımaǵambetov óz perzentterin qalaı kitap oqýǵa baýlyp, olarǵa qalaı baǵyt-baǵdar bergeni haqynda sóz etti. Sonymen qatar, ulttyń jetekshi ustazy parasatty qoǵam qalyptastyrýdyń basty kilti - jappaı kitap oqý mádenıeti ekendigin óz mysalynda aıǵaqtady. Bul týrasynda "Adyrna" ulttyq portaly baıandaıdy.
Qazaq eliniń oqý-aǵartý mınıstri kitap oqý mádenıetiniń tal besikten bastap qalyptasatyndyǵyn jetkizdi. Óz jazbasynyń betasharynda bul jaıly:
Balalyq shaǵymnan qalǵan estelikterdiń biri - úıdegi kitaptarǵa toly úlken sóreler men alýan túrli ádebıetter. Úıde kitaptardyń belgili bir serııasyna jazylý nemese kezekti ret oqylǵan kitaptar týraly sondaı maqtanyshpen, qyzyǵýshylyqpen aıtylǵany áli esimde. Osydan bolar meniń de úıdegi kitaptardy qaıta oqyp shyqqanym tańqalarlyq emes. Al keıinirek aýdandyq kitaphananyń turaqty oqyrmany atandym. Bala kezimde «tamaq iship otyrǵanda kitap oqymaý kerek» degen eskertýdi jıi estıtinmin, -dep jazdy.
Mınıstr bul ıgi qubylysty óz shańyraǵynda dástúrge aınaldyrǵanyn jetkizdi. Mınıstrden bólek, qarapaıym otaǵasy, áke retinde óz perzentterin jata-jastana kitap oqýǵa qalaı baýlyǵanyn tarqatyp aıtty.
- Ózim áke atanǵanymda balalaryma aldymen ertegi oqyp berdim, keıin úlken ulym ózi oqı bastady. Ertegiler men shaǵyn áńgimelerden bastap, shytyrman oqıǵalar, ǵylymı fantastıka jáne kórkem emes fantastıka syndy janrlarǵa birtindep kóshtik. 5-synyptan bastap ulym jylyna 30-50 kitap oqıtyn boldy. Sol kezde men de ulyma keshki as kezinde «kitap oqyma» dep eskertý jasaı bastadym. Balabaqshaǵa baryp júrgen kenje balam ertegilerdi, ásirese, «Erketaı» men «Jánibek» týraly zamanaýı qazaq komıksterin tyńdaǵandy unatady, – deıdi Ashat Aımaǵambetov.
Ashat Aımaǵambetov óz balalaryn kitap oqýǵa esh májbúrlemegen. Kitap oqý - qysymmen emes, qyzyǵýshylyqpen qalyptasatyn daǵdy. Onyń aıtýynsha, bala kórgenin isteıdi. Sondyqtan, ata-ananyń kitap oqyǵany lazym.
«Men óz tájirıbemnen balalardy oqýǵa májbúrleýge bolmaıtynyn aıta alamyn. Balalarǵa qysym kórsetpeı, kerisinshe jeke mysalmen oqýǵa degen súıispenshilikti oıatý qajet. Bala ata-anasynyń kitap oqyp otyrǵanyn kórýi kerek. Sonda ǵana qyzyǵýshylyq paıda bolady. Kitaptar balanyń minezine jáne qundylyqtarynyń qalyptasýyna áser etetinin de eskergen jón. Oń sıýjettik jelisi bar kitaptar jaqsy ádetterge baýlyp, durys tárbıe beredi. Sol sebepti balalardy qoldaý, kitap oqýǵa baýlý, olarǵa kitap satyp alyp berý, kitap kórmelerine birge barý óte mańyzdy», – deıdi bas ustaz.
Sonymen qatar, mınıstr barlyq talapkerlerdi kitappen dos bolýǵa shaqyrdy.
- Mereke qarsańynda osy jazbany oqıtyn ata-analarǵa balalarǵa qyzyqty kitap oqýǵa keńes berýdi usynar edim. Olardyń kitap álemine jasaǵan saıahaty qyzyqty bolsyn! Barlyq oqýshyny kitap oqýǵa kóbirek ýaqyt bólýge shaqyramyn. Óıtkeni, bilim – eń qundy baılyq, – deıdi Ashat Aımaǵambetov.
"Adyrna" ulttyq portaly
