Bul máselege qatysty maman pikir bildirdi. Olga Bachkova meteostanııada 40 jyldan beri jumys isteıdi. Onyń aıtýynsha, osy kezge deıin sý deńgeıin ólsheıtin baǵana 4 ret tómen túsirildi. Sebebi, teńiz tartylǵan saıyn baǵanadaǵy ólshem birlikteri jer ústinde qalyp otyr, dep jazady qazaqstan.tv.
Teńiz deńgeıi 80-shi jyldary jaqsy kóterilgen, deıdi. Biraq sodan keıin tek tartylý ústinde.
- Biz tek ahýaldy baqylap otyramyz. Ár ólshegen saıyn tómendegenin baıqaımyz. Bul máselege ǵalymdar kirisý kerek. Tek Mańǵystaýdaǵy emes, Kaspııdiń jaǵasyndaǵy barlyq meteostanııalardaǵy kóp jyldyq málimetterdi salystyryp, naqty sebebin anyqtaý qajet dep oılaımyn, - dedi meteostanııa qyzmetkeri Olga Bachkova.
Qazirgi ýaqytta Kaspıı teńiziniń jaǵalaýyn qatar jaılaǵan memleket mamandary Toqaevtyń muryndyq bolýymen «Kaspıı teńizin zertteý ınstıtýtyn» qurǵaly jatyr. Ortalyqty kelesi jyly ashý josparlanǵan.
"Jahandyq jylyný saldarynan teńiz sýy qarqyndy býlanǵan. Onyń ústine, jaýyn-shashyn mólsheri óte az. Sońǵy kezderde Kaspııge quıatyn Edil men Jaıyq ózenderindegi sý deńgeıi de mardymdy emes. Teńizdegi sý deńgeıiniń tómendeýine áser etip jatqan faktorlar osyndaı", - deıdi mamandar. Qalǵan sebepter ǵylymı negizde aldaǵy ýaqytta saralanbaq.
"Adyrna" ulttyq portaly
