انكارادا قازاقستاننىڭ تاۋەلسىزدىك كۇنى مەن قازاقتىڭ بەلگىلى اعارتۋشىسى، تۇركىتانۋشى-عالىم، كورنەكتى مەملەكەت قايراتكەرى احمەت بايتۇرسىنۇلىنىڭ 150 جىلدىعىنا وراي، انكارا قالاسىنداعى ەتيمەسگۋت مۋنيتسيپاليتەتىندە ۇلت ۇستازىنىڭ ەسكەرتكىشى مەن پاركى سالتاناتتى تۇردە اشىلدى. بۇل تۋرالى عىلىم جانە جوعارى ءبىلىم مينيسترلىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
اتالعان شاراعا قازاقستاننىڭ تۇركياداعى توتەنشە جانە وكىلەتتى ەلشىسى ەركەبۇلان ساپيەۆ، ەتيمەسگۋت مۋنيتسيپاليتەتىنىڭ اكىمى ەنۆەر دەميرەل، استانا قالاسى اكىمىنىڭ ورىنباسارى ەسەت بايكەن، قر سىرتقى ىستەر ءمينيسترىنىڭ وكىلى حاسان بادجاجى، انكاراداعى تۇركىتىلدەس مەملەكەتتەر ەلشىلىكتەرىنىڭ وكىلدەرى، تۇركسوي وكىلدەرى، «YDA» حولدينگ باسقارما توراعاسى حۋسەين ارسلان، زيالى قاۋىم، قازاق دياسپوراسى جانە باق وكىلدەرى قاتىستى.
«تۇركيا استاناسى انكارا قالاسىندا الاش ارىسى احمەت بايتۇرسىنۇلى پاركىنىڭ جانە ەسكەرتكىشىنىڭ اشىلۋى — باۋىرلاس قازاق جانە تۇرىك حالىقتارىنىڭ مادەني-گۋمانيتارلىق قاتىناستارىنىڭ الداعى ۋاقىتتا دا تۇراقتى دامۋىنىڭ كورسەتكىشى»،—دەلىنگەن حابارلامادا.
