تۇركيانىڭ بالىكەسير قالاسىندا 10 تامىزدا ماگنيتۋداسى 6,1 بولاتىن كۇشتى جەر سىلكىنىسى تىركەلدى، دەپ حابارلايدى "ادىرنا" ۇلتتىق پورتالى.
ەپيتسەنترى سىندىرىگى اۋدانىندا، 11 شاقىرىم تەرەڭدىكتە بولعان دۇمپۋلەر شامامەن 20 مينۋت بويى سەزىلگەن. سونداي-اق، جەر استى دۇمپۋلەرى ىستامبۇل، بۋرسا جانە يالوۆا سەكىلدى قالالاردا دا بايقالعان.
ءزىلزالا سالدارىنان ءبىر عيمارات قيراپ، كەمىندە 24 نىسان زاقىمدانعان. الدىن الا مالىمەت بويىنشا، ءبىر ادام ءۇيىندى استىندا قالىپ، ءتورت تۇرعىن جاراقات العان.
زارداپ شەككەندەردىڭ ومىرىنە قاۋىپ جوق. قۇتقارۋ قىزمەتتەرى وقيعا ورنىندا جۇمىس ىستەپ جاتىر.
كۋاگەرلەردىڭ ايتۋىنشا، سىندىرىگىدا ءبىر تۇتاس اۋدان قيراپ، 10-عا جۋىق جەكە ءۇي بۇلىنگەن. كەيبىر اۋىلداردا بايلانىس ءۇزىلىپ قالعان.
تۇركيا ىشكى ىستەر ءمينيسترى الي ەرليكايا جاعدايدىڭ باقىلاۋدا ەكەنىن ايتىپ، حالىقتى سابىرعا شاقىردى.
پرەزيدەنت رەجەپ تايىپ ەردوعان زارداپ شەككەندەرگە كوڭىل ايتىپ، بارلىق قاجەتتى شارالاردىڭ قابىلدانعانىن حابارلادى.
مالىمەتكە سۇيەنسەك، نەگىزگى دۇمپۋدەن كەيىن 20 افتەرشوك تىركەلگەن، ونىڭ بەسەۋىنىڭ ماگنيتۋداسى 4-تەن جوعارى.
