بۇگىن ءۇشىنشى مەگاپوليستەگى الەۋمەتتىك وڭالتۋ ورتالىقتارىندا ەم الىپ جاتقان بالالار مەن بالالار ۇيىندەگى بۇلدىرشىندەر مەرەكەلىك كوڭىل-كۇيگە بولەندى. قالا اكىمى مۇرات ايتەنوۆ بالاقايلارعا مەملەكەت باسشىسى قاسىم-جومارت كەمەلۇلى توقاەۆتىڭ جاڭا جىلدىق ارنايى سىيلىعىن تابىستادى.
شاھار باسشىسى مۇرات ايتەنوۆ مەرەكەلىك تاڭەرتەڭگىلىكتەرگە بارىپ، بالالارعا ەل پرەزيدەنتىنىڭ قۇتتىقتاۋ حاتىن جەتكىزدى.
– «اينالايىن، بالاقاي! جاڭا جىل مەرەكەسى قۇتتى بولسىن! وسى تاماشا مەيرام ساعان كوپ قۋانىش اكەلسىن. كەلەشەكتە وتانىڭدى سۇيەتىن ۇلكەن ازامات بول. ءبىلىم مەن ەڭبەك سەنى بيىك بەلەستەرگە باعىتتايدى. وقۋدا وزات بولىپ، سپورت جانە شىعارماشىلىق سالالارىندا زور تابىسقا جەتۋىڭە تىلەكتەسپىن!»، – دەپ جازدى پرەزيدەنت قۇتتىقتاۋ حاتىندا. راسىندا، ەلىمىزدىڭ كەلەشەگى – بۇلدىرشىندەرىمىز ارقاشان مەملەكەت نازارىنان تىس قالعان ەمەس. پرەزيدەنتىمىز قاسىم-جومارت توقاەۆ 2022 جىلدى بالالار جىلى دەپ جاريالاعان بولاتىن. وسى بالالار جىلىن وڭ وزگەرىستەرمەن قورىتىندىلاپ وتىرمىز. بيىل بالعىندارعا ءبىلىم بەرۋ، دەنساۋلىعىن وڭالتۋ، دەمالىسىن ۇيىمداستىرۋعا جانە مەكتەپ سانىن كوبەيتۋ ماقساتىندا بىرقاتار جۇمىس اتقارىلدى. مىنە، وزدەرىڭىزگە پرەزيدەنتتىڭ اماناتىن جەتكىزگەلى وتىرمىن. كەلەر جىل ءار وتباسىنا قۋانىشپەن ەنسىن! بۇلدىرشىندەرىمىزدىڭ جۇزىنەن كۇلكى كەتپەسىن! – دەدى مۇرات دۇيسەنبەكۇلى.
قالا اكىمى سالتاناتتى جيىنداردا بالالارمەن بىرگە كوڭىل كوتەرىپ، ءتۇرلى كەيىپتەرگە ەندى، ءان شىرقادى. مەرەكەلىك جيىندا اياز اتا مەن اقشاقار باستاعان ەرتەگى كەيىپكەرلەرى بالالارعا مەرەكەلىك كوڭىل-كۇي سىيلادى. بالالار تاقپاق پەن ءان ايتىپ، شاتتانا بيلەپ، وزدەرىنە قامقورلىق جاساعان ەل اعالارىنا العىس ايتىپ، اقجارما تىلەگىن جەتكىزدى.
قالا اكىمى مۇرات ايتەنوۆ بۇل كۇنى بالالارعا ارنالعان №6 ارناۋلى الەۋمەتتىك قىزمەت كورسەتۋ ورتالىعىندا، بالالار كلينيكالىق اۋرۋحاناسىندا، №3 بالالار ۇيىندە جانە مامانداندىرىلعان بوبەكتەر ۇيىندەگى مەرەكەلىك ءىس-شارالارعا قاتىسىپ، پرەزيدەنتتىڭ جولداعان حاتى مەن سىيلىعىن تابىستادى.
