Bügın üşınşı megapolistegı äleumettık oŋaltu ortalyqtarynda em alyp jatqan balalar men balalar üiındegı büldırşınder merekelık köŋıl-küige bölendı. Qala äkımı Mūrat Äitenov balaqailarǧa Memleket basşysy Qasym-Jomart Kemelūly Toqaevtyŋ jaŋa jyldyq arnaiy syilyǧyn tabystady.
Şahar basşysy Mūrat Äitenov merekelık taŋerteŋgılıkterge baryp, balalarǧa el Prezidentınıŋ qūttyqtau hatyn jetkızdı.
– «Ainalaiyn, balaqai! Jaŋa jyl merekesı qūtty bolsyn! Osy tamaşa meiram saǧan köp quanyş äkelsın. Keleşekte Otanyŋdy süietın ülken azamat bol. Bılım men eŋbek senı biık belesterge baǧyttaidy. Oquda ozat bolyp, sport jäne şyǧarmaşylyq salalarynda zor tabysqa jetuıŋe tılektespın!», – dep jazdy Prezident qūttyqtau hatynda. Rasynda, elımızdıŋ keleşegı – büldırşınderımız ärqaşan memleket nazarynan tys qalǧan emes. Prezidentımız Qasym-Jomart Toqaev 2022 jyldy Balalar jyly dep jariialaǧan bolatyn. Osy balalar jylyn oŋ özgerıstermen qorytyndylap otyrmyz. Biyl balǧyndarǧa bılım beru, densaulyǧyn oŋaltu, demalysyn ūiymdastyruǧa jäne mektep sanyn köbeitu maqsatynda bırqatar jūmys atqaryldy. Mıne, özderıŋızge Prezidenttıŋ amanatyn jetkızgelı otyrmyn. Keler jyl är otbasyna quanyşpen ensın! Büldırşınderımızdıŋ jüzınen külkı ketpesın! – dedı Mūrat Düisenbekūly.
Qala äkımı saltanatty jiyndarda balalarmen bırge köŋıl köterıp, türlı keiıpterge endı, än şyrqady. Merekelık jiynda Aiaz ata men Aqşaqar bastaǧan ertegı keiıpkerlerı balalarǧa merekelık köŋıl-küi syilady. Balalar taqpaq pen än aityp, şattana bilep, özderıne qamqorlyq jasaǧan el aǧalaryna alǧys aityp, aqjarma tılegın jetkızdı.
Qala äkımı Mūrat Äitenov būl künı balalarǧa arnalǧan №6 arnauly äleumettık qyzmet körsetu ortalyǧynda, balalar klinikalyq auruhanasynda, №3 balalar üiınde jäne mamandandyrylǧan böbekter üiındegı merekelık ıs-şaralarǧa qatysyp, Prezidenttıŋ joldaǧan haty men syilyǧyn tabystady.
