قازاقستاننىڭ اقپارات جانە كوممۋنيكاتسيالار ءمينيسترى داۋرەن اباەۆ "حابار" تەلەارناسىنداعى "وتكرىتىي ديالوگ" باعدارلاماسىنداعى سۇحباتتا قاراعاندىداعى وقيعا تۋرالى ءوز پىكىرىن ءبىلدىردى.
باعدارلامادا اقپارات مينيسترىنە "نەلىكتەن بيلىك ۇزاق ۋاقىتتان بەرى ۇندەمەي وتىر، نەگە ءىىم-ءنىڭ ءباسپاسوز جيىنى ءبىر اپتادان كەيىن بىراق وتكىزىلدى جانە رەسمي اقپاراتتىڭ شۇعىل بەرىلمەۋى قاڭقۋ سوزدەرگە تولى ۆاكۋمنىڭ پايدا بولۋىنا سەبەپشى بولادى دەپ ويلامايسىز با؟" دەگەن ساۋال قويىلدى. داۋرەن اباەۆ: "مەنىڭ ويىمشا، بۇل قايعىلى جاعداي بىزگە ساباق بولادى، ونىڭ اراسىندا قوعاممەن بايلانىستى ۇيىمداستىرۋ ماسەلەسى دە بار. رەزونانس جاعدايلار كەزىندە ازاماتتاردىڭ سول وقيعاعا قاتىستى اقپارات الۋعا قۇقىلى ەكەنىن ءبىز جاقسى تۇسىنەمىز. الايدا، بىز مىنانى ءتۇسىنۋىمىز كەرەك، وقيعانىڭ ءمان-جايىن، كۇدىكتىلەردى جانە باسقا دا اقپاراتتاردى انىقتاۋ ءۇشىن بەلگىلى ءبىر ۋاقىت كەرەك. ءدال وسى جاعدايدا وقيعاعا قاتىسقانداردىڭ سانى ونداعان بولدى، ولاردىڭ بارلىعى ءتۇرلى قالادا جاسىرىنىپ جاتتى. باستى كۇدىكتىلەردىڭ ءبىرى ءتىپتى، ەل شەكاراسىنان اسىپ كەتتى، پوليتسيا بارلىق وبلىس بويىنشا تەرگەۋ امالدارىن جۇرگىزدى، سونىمەن قاتار، رەسەيلىك ارىپتەستەرىمەن بىرلەسىپ جۇمىس ىستەدى جانە ءالى دە ىستەپ جاتىر. جاڭالىقتاردان بىلەتىندەرىڭىزدەي، قاشقىن ۇستالدى، دەمەك ءبىزدىڭ پوليتسيا بارلىق شۇعىل شارالاردى بارىنشا ءتيىمدى اتقاردى. ارينە، اقپاراتتاندىرۋ كەشىكتىرىلدى. كەيبىر دەرەكتەر تەرگەۋ مۇددەسىنە بايلانىستى جاريالانعان جوق، بىراق ەڭ باستىسى بۇدان ناتيجە ەش بۇلىنگەن جوق" دەپ جاۋاپ بەردى.
