ءال-فارابي اتىنداعى قازاق ۇلتتىق ۋنيۆەرسيتەتىندە تۇركىتانۋ جانە التايتانۋ عىلىمي-زەرتتەۋ ينستيتۋتى اشىلدى، دەپ حابارلايدى «ادىرنا» ءتىلشىسى.
سالتاناتتى اشىلۋ ءال-فارابي كىتاپحاناسىندا ءوتتى.
جاڭادان اشىلعان ينستيتۋتتا سيرەك كەزدەسەتىن قولجازبالار مەن كونە كىتاپتاردى كەڭىنەن زەرتتەۋ جۇمىستارى جۇرگىزىلەتىن بولادى. ماسەلەن، «ءال-فارابي» كىتاپحاناسىنىڭ قورىندا 600-دەن استام قولجازبالار تولىق زەرتتەلمەگەن.
ۋنيۆەرسيتەت رەكتورى جانسەيىت تۇيمەباەۆ سوڭعى ون جىل ىشىندە تۇركىتىلدەس مەملەكەتتەردىڭ مەملەكەتارالىق ىنتىماقتاستىعى ەرەكشە دامي تۇسكەنىن اتاپ ءوتتى.
تۇركولوگيانىڭ وزەكتى ماسەلەلەرى – تۇركى تىلدەرىن زەرتتەۋ، ورحون، ەنيسەي، تالاس، التاي جازبا ەسكەرتكىشتەرى ءماتىنىن تۇپنۇسقادان قايتا وقۋ، تۇركى تىلدەرىنىڭ ساباقتاستىعىن كورسەتۋ. تاۋەلسىز قازاقستان كەزەڭىندەگى تۇركولوگيانىڭ ماماندىق رەتىندە وقىتىلۋى ۇلكەن جەتىستىك بولدى. بۇگىنگى كونگرەسس اياسىندا «تۇركىتانۋ جانە التايتانۋ عىلىمي-زەرتتەۋ ينستيتۋتىن» اشىپ وتىرمىز. بۇل وسى سالاداعى ماماندار مەن جاس عالىمداردىڭ جاڭا زەرتتەۋلەرىنە جول اشادى، - دەدى ول.
سونداي-اق شارا اياسىندا «الەمنىڭ ەتنوتىلدىك بەينەسى جانە تۇركى مۇراسى» اتتى I حالىقارالىق عىلىمي كونگرەسسى ءوتتى. عالىمدار قازاقستانداعى جانە الەمدەگى تۇركىتانۋ مەن التايتانۋدىڭ وزەكتى ماسەلەلەرىن تالقىلادى.
القالى جيىنعا قازاقستاندىق عالىمدارمەن قاتار تۇركيا، ءازىربايجان، قىتاي، قىرعىزستان، وزبەكستان، رەسەي، ماجارستان مەملەكەتىنىڭ زەرتتەۋشى عالىمدارى، تاريحشىلار، مەملەكەت جانە قوعام قايراتكەرلەرى، باق وكىلدەرى، قازۇۋ-دىڭ وقىتۋشى-پروفەسسورلار قۇرامى مەن ءبىلىم الۋشى جاستارى قاتىستى.
