ءاليحان سمايىلوۆ قىزىلوردادا جاڭا جەو قۇرىلىسىنىڭ جوباسىمەن تانىستى

1968
Adyrna.kz Telegram

قىزىلوردا وبلىسىنا جۇمىس ساپارى اياسىندا قر پرەمەر-ءمينيسترى ءاليحان سمايىلوۆ ءوڭىردىڭ نەگىزگى ينفراقۇرىلىمدىق نىساندارىنىڭ جۇمىسىن تەكسەردى.

اتاپ ايتقاندا، ءاليحان سمايىلوۆ قىزىلوردادا 67 مۆت ەلەكتر قۋاتى مەن 341 گكال/ساع جىلۋ ەنەرگياسىن وندىرەتىن جەو-دا بولدى. سونداي-اق ول وڭتۇستىك وڭىرلەردى ۇزدىكسىز قۋات كوزدەرىمەن قامتاماسىز ەتۋگە مۇمكىندىك بەرەتىن جالپى قۋاتتىلىعى 240 مۆت جانە 277 گكال/ساع بولاتىن جاڭا جىلۋ ەلەكتر ورتالىعىنىڭ قۇرىلىس جوباسىمەن تانىستى. شەتەلدىك ينۆەستيتسيالار ەسەبىنەن ىسكە اسىرىلىپ جاتقان جوبانى 2025 جىلى پايدالانۋعا بەرۋ جوسپارلانۋدا.

پرەمەر-مينيستر جۇمىس ىستەپ تۇرعان جەو وتكەن عاسىردىڭ 60-شى جىلدارى سالىنعاندىقتان، توزىعى جەتكەنىن اتاپ ءوتتى. سونىمەن قاتار مەملەكەت باسشىسىنىڭ تاپسىرماسى بويىنشا 2025 جىلعا دەيىن وڭتۇستىك وڭىرلەردە بۋ-گاز قوندىرعىلارىن سالۋ بويىنشا بىرقاتار جوبا ىسكە اسىرىلادى.

«ەل ەكونوميكاسى دامۋىمەن قاتار ونەركاسىپتىك جانە الەۋمەتتىك نىساندار دا كوپتەپ ىسكە قوسىلۋدا، سوندىقتان قوسىمشا ەنەرگيا كوزدەرىن جەدەل ىسكە قوسۋ قاجەت. وسى مىندەتتەر اياسىندا قىزىلوردا وبلىسىندا جاڭا جەو سالىنادى. بۇل جوبانى دا ۋاقىتىلى اياقتاۋ كەرەك»، — دەپ اتاپ ءوتتى ءاليحان سمايىلوۆ.

ۇكىمەت باسشىسىنىڭ ايتۋىنشا، قىزىلوردا وبلىسىنداعى توزىعى جەتكەن ەلەكتر جەلىلەرىنىڭ ماسەلەسىن دە شۇعىل تۇردە شەشۋ كەرەك، ويتكەنى ولاردىڭ تەحنيكالىق جاي-كۇيى ءوڭىر تۇرعىندارى مەن ونەركاسىپتىك وبەكتىلەرىن ەلەكتر قۋاتىمەن قامتاماسىز ەتۋ ساپاسىنا تىكەلەي اسەر ەتەدى.

سونداي-اق ۇكىمەت باسشىسى سىرداريا وزەنىنىڭ ارناسىندا ورنالاسقان قىزىلوردا سۋ تورابىنىڭ جۇمىسىمەن تانىستى. ونىڭ نەگىزگى قىزمەتى وزەندەگى سۋ اعىنىن رەتتەۋ جانە قىزىلوردا قالاسى، سىرداريا، جالاعاش جانە قارماقشى اۋداندارىنىڭ اۋماعىندا ورنالاسقان 110 مىڭ گا سۋارمالى جەردى، 250 مىڭ گا شابىندىق جەر مەن جايىلىمداردى سۋمەن جابدىقتاۋ بولىپ تابىلادى. 2020 جىلى قر ۇكىمەتىنىڭ قاۋلىسىنا سايكەس گيدروتوراپتى كەشەندى قايتا قۇرۋ باستالدى، ونى كەلەسى جىلى اياقتاۋ جوسپارلانۋدا.

پرەمەر-مينيستر قازىرگى ۋاقىتتا سۋ سالاسىن دامىتۋدىڭ 2023-2025 جىلدارعا ارنالعان كەشەندى جوسپارىن ازىرلەۋ اياقتالۋعا جاقىن قالعانىن، ونى ىسكە اسىرۋ ينۆەستيتسيالار تارتۋعا جانە ءبىرىنشى كەزەكتەگى پروبلەمالىق ماسەلەلەردى شەشۋگە مۇمكىندىك بەرەتىنىن اتاپ ءوتتى.

سونداي-اق ءاليحان سمايىلوۆ شەكارالاس ەلدەرمەن جۇرگىزىلگەن كەلىسسوزدەردەن كەيىن بيىل وڭىردە سۋ تاپشىلىعىن تومەندەتۋگە مۇمكىندىكتەر جاسالعانىن ايتتى. سونىمەن قاتار كانالداردى تازارتۋ جانە گيدروتەحنيكالىق قۇرىلىستاردى جوندەۋ جۇمىستارى جۇرگىزىلدى، ناتيجەسىندە ەگىس القاپتارى تولىعىمەن سۋارمالى سۋمەن قامتاماسىز ەتىلدى.

الداعى ۆەگەتاتسيالىق كەزەڭدە اۋىل شارۋاشىلىعى تاۋارىن وندىرۋشىلەردى سۋارمالى سۋمەن قامتاماسىز ەتۋ جونىندەگى شارالار دا قاراستىرىلعان. بەلگىلەنگەن سۋ ءليميتىن الۋ بويىنشا كەلىسسوزدەر جالعاسادى.

 

پىكىرلەر