المالى اۋداندىق سوتىندا ونلاين رەجيمدە قارجى پيراميداسىن قۇرۋعا قاتىستى الدىن الا سوت تىڭدالىمى ءوتتى. تىڭدالىمعا قارجى پيراميداسىن قۇردى دەپ ايىپتالعان رۋسلان بۋرحانوۆ، ۆاينەرلەر مەيىرجان تورەباەۆ پەن مەيىرحان شەرنيازوۆتان بولەك تاعى 9 ايىپتالۋشى قاتىستى، دەپ حابارلايدى “ادىرنا” ۇلتتىق پورتالى.
"Mudarabah Capital" قارجى پيراميداسىنا قاتىستى ىستەگى باستى كۇدىكتى رۋسلان بۋرحانوۆ سالىمشىلاردىڭ قارجىسىن تولىق قايتارىپ بەرەتىنىن مالىمدەدى.
"مەن بارلىعىن قايتارىپ بەرەمىز دەگىم كەلەدى. مەن ۋادە بەرگەنمىن، بارلىعىن قايتارامىن. ءسال شىداڭىزدار. تەك قازىر قولىم بايلاۋلى", – دەدى ول.
ال مەيىرجان تورەباەۆ قارجى پيراميداسىن قۇرۋ تۋرالى ايىپپەن كەلىسپەيتىنىن ايتتى. سونداي-اق جۇبايى دانا ەسەەۆانى زاڭدى قورعاۋشىسى رەتىندە تانۋدى سۇراپ، قىلمىستىق ءىستى پروكۋراتۋراعا قايتارۋدى تالاپ ەتتى.
"دانا ەسەەۆانى مەنىڭ قورعاۋشىم رەتىندە بەكىتۋدى سۇرايمىز. سونىمەن قاتار زاڭ بۇزۋشىلىقتاردىڭ كوپ بولۋىنا بايلانىستى ءىستى پروكۋرورعا قايتارۋدى سۇرايمىن. مەن كومپانيا قۇرىلعان سوڭ بىرنەشە ايدان كەيىن قوسىلدىم. ال ايىپتاۋشى تاراپ مەنىڭ كىنامدى دالەلدەيتىن ەشقانداي ناقتى ايعاق كەلتىرمەدى ", – دەدى مەيىرجان تورەباەۆ.
ال ادۆوكات رولان مۋرادوۆ مەيىرجان تورەباەۆتىڭ ءسوزىن قوستاپ، ونىڭ قىلمىستىق ىسكە زاڭسىز تارتىلعانىن العا تارتتى.
ەسكە سالايىق، 2021 جىلدىڭ قازانىندا Mudarabah Capital كومپانياسىنىڭ يەسى الماتىدا قارجى پيراميداسىن ۇيىمداستىردى دەگەن كۇدىكپەن ۇستالدى.
سوتقا دەيىنگى تەرگەۋ بارىسىندا اتالعان كومپانيا جەكە جانە زاڭدى تۇلعالارمەن مەملەكەتتىك ساتىپ الۋعا قاتىسۋ ءۇشىن قاجەتتى قارجى تارتۋ ماقساتىندا بىرلەسكەن قىزمەت تۋرالى شارتتار جاساسقانى انىقتالدى. ولار بۇل ءىستى 2019 جىلدىڭ اقپانىنان باستاپ 2021 جىلدىڭ قاڭتارىنا دەيىن جۇزەگە اسىرعان.
