Almaly aýdandyq sotynda onlaın rejımde qarjy pıramıdasyn qurýǵa qatysty aldyn ala sot tyńdalymy ótti. Tyńdalymǵa qarjy pıramıdasyn qurdy dep aıyptalǵan Rýslan Býrhanov, vaınerler Meıirjan Tórebaev pen Meıirhan Shernııazovtan bólek taǵy 9 aıyptalýshy qatysty, dep habarlaıdy “Adyrna” ulttyq portaly.
"Mudarabah Capital" qarjy pıramıdasyna qatysty istegi basty kúdikti Rýslan Býrhanov salymshylardyń qarjysyn tolyq qaıtaryp beretinin málimdedi.
"Men barlyǵyn qaıtaryp beremiz degim keledi. Men ýáde bergenmin, barlyǵyn qaıtaramyn. Sál shydańyzdar. Tek qazir qolym baılaýly", – dedi ol.
Al Meıirjan Tórebaev qarjy pıramıdasyn qurý týraly aıyppen kelispeıtinin aıtty. Sondaı-aq jubaıy Dana Eseevany zańdy qorǵaýshysy retinde tanýdy surap, qylmystyq isti prokýratýraǵa qaıtarýdy talap etti.
"Dana Eseevany meniń qorǵaýshym retinde bekitýdi suraımyz. Sonymen qatar zań buzýshylyqtardyń kóp bolýyna baılanysty isti prokýrorǵa qaıtarýdy suraımyn. Men kompanııa qurylǵan soń birneshe aıdan keıin qosyldym. Al aıyptaýshy tarap meniń kinámdi dáleldeıtin eshqandaı naqty aıǵaq keltirmedi ", – dedi Meıirjan Tórebaev.
Al advokat Rolan Mýradov Meıirjan Tórebaevtyń sózin qostap, onyń qylmystyq iske zańsyz tartylǵanyn alǵa tartty.
Eske salaıyq, 2021 jyldyń qazanynda Mudarabah Capital kompanııasynyń ıesi Almatyda qarjy pıramıdasyn uıymdastyrdy degen kúdikpen ustaldy.
Sotqa deıingi tergeý barysynda atalǵan kompanııa jeke jáne zańdy tulǵalarmen memlekettik satyp alýǵa qatysý úshin qajetti qarjy tartý maqsatynda birlesken qyzmet týraly sharttar jasasqany anyqtaldy. Olar bul isti 2019 jyldyń aqpanynan bastap 2021 jyldyń qańtaryna deıin júzege asyrǵan.
