جوعارى جاق پورتفەل ءبولىسىپ، تومەنگى جاق نان ءبولىسىپ جاتىر. قاشانعا دەيىن؟..
⠀ ⠀⠀ ⠀. *
جىلاعىم كەلگەن. جاس تابا المادىم.
⠀⠀ ⠀⠀⠀ ⠀⠀ ⠀⠀ ⠀⠀ ⠀⠀ ⠀⠀ ⠀⠀⠀
⠀ ⠀⠀ ⠀⠀⠀ ⠀⠀ *
اقشا دا ادامدى اراق سياقتى ماس قىلادى ەكەن. قازاقستاندا وسىنداي «ماستار» تىم كوبەيىپ كەتتى. قولدارىنا ءتۇسىپ قالۋدان ءبىرتۇرلى قورقاسىڭ.
⠀ ⠀⠀ ⠀⠀⠀ ⠀⠀ ⠀⠀ ⠀⠀ ⠀⠀ ⠀⠀ ⠀
⠀ ⠀⠀ ⠀⠀⠀ ⠀⠀ ⠀*
– شۇكىر، ءبىزدىڭ تۇقىمنان باقسى مەن اقىن شىققان جوق، – دەپ ءبىر كوكەمىز ماقتانىپ تۇردى.
⠀ ⠀⠀ ⠀⠀⠀ ⠀⠀. *
از حالىقتىڭ سەركەسى بولعاننان، كوپ حالىقتىڭ ەركەسى بولعان جاقسى ەكەن عوي.
⠀ ⠀⠀ ⠀⠀⠀ ⠀⠀ ⠀⠀ ⠀⠀ ⠀⠀ ⠀⠀ ⠀⠀⠀⠀
⠀ ⠀⠀ ⠀⠀⠀ ⠀⠀ *
حالىقتى جوقشىلىق ەمەس، توقشىلىق قۇرتادى. ازدىرادى. بۇل – ەرتە دۇنيە تاريحىنان ءمالىم قۇبىلىس.
⠀ ⠀⠀ ⠀⠀⠀ ⠀⠀ *
ءبىر جارىق جۇلدىز تۋسا، مىندەتتى تۇردە قارسى جۇلدىز تۋادى. بۇل اسپان الەمىندە دالەلدەنگەن شىندىق. وسى قارسىلىقتى ومىردە دە كوپ كوردىم.
*
تالعامسىز كوپ توبىر ءۇشىن جازا الماي قويدىم. ال ولار مەن سۇيگەن بيىكتىككە كوتەرىلە الار ەمەس. ەكى ورتادا اۋاسىز بوس ۆاكۋم جاتتى. ءبىرىمىزدىڭ داۋسىمىزدى ەكىنشىمىز ەستي المادىق. سوندا ساناۋلى توپ ءۇشىن عانا قالام ۇستايمىن با؟!
⠀ ⠀⠀ ⠀⠀⠀ ⠀ *
ءبىر باقىت ماعان دا كەلە جاتقان شىعار دەپ جول بويىندا ۇزاق توستىم. جولاماي قويدى. مەنى باتىراش پەن قوتىراش دەپ ويلايدى-اۋ دەيمىن.
⠀ ⠀⠀ ⠀⠀⠀ ⠀⠀ *
امان-ساۋلىق سۇراسقان ءبىر تانىسقا: «ءجۇرىپ جاتىرمىز، ۋاقىتشا»، – دەپ ەم. شوشىپ كەتتى.
– قالايشا ۋاقىتشا؟ – دەپ.
وعان نە ايتۋعا بولادى؟
⠀ ⠀⠀ ⠀⠀⠀ ⠀⠀ *
تاڭەرتەڭ ايناعا قارايمىن. بەتىندە يت تىرلىكتىڭ ءىزى قالعان ءبىر شال تۇرادى. باسىمدى الىپ قاشامىن. بارلىق جاس داۋرەن اينانىڭ ارعى جاعىندا قالعان سياقتى.
⠀ ⠀⠀ ⠀⠀⠀ ⠀⠀ *
اباي اتام «قارتايدىق، قايعى ويلادىق، ۇلعايدى ارمان» دەپ قىرىق جاستان وتە بەرە جازىپتى. ناعىز قايراتى تاسقان كەز عوي. نەگە ولاي ايتتى دەپ كوپ ويلاندىم. اقىرى وزىنەن جاسى ۇلكەن ءدىلدا شەشەمىزدى العان سوڭ كوڭىلى قارتايىپ قالعان شىعار دەپ شەشتىم.
⠀ ⠀⠀ ⠀⠀⠀ ⠀⠀ ⠀⠀ ⠀⠀ ⠀⠀ ⠀⠀ ⠀⠀⠀⠀
⠀ ⠀⠀ ⠀⠀⠀ ⠀⠀ *
توي-توپىردا جاستارعا جۇرت سياقتى «باقىتتى بولىڭدار» دەپ تىلەك ايتامىن. باقىتتىڭ نە ەكەنىن شىنداپ كەلگەندە ءوزىم دە بىلمەيمىن. بالكىم، ءبىزدىڭ جاقتا جوق زات شىعار؟!
⠀ ⠀⠀ ⠀⠀⠀ ⠀⠀*
ماحامبەتتىڭ باسىن شاۋىپ جىبەرگەندە جەرگە دومالاپ، «قاپ، قاپ، قاپ!» دەپ سويلەپ بارا جاتتى دەسەدى. القۇلىم شاقتا ءبىزدىڭ اۋزىمىزعا قانداي ءسوز ىلىنەر ەكەن؟
⠀ ⠀⠀ ⠀⠀⠀ ⠀⠀*
«اقىرىن تىلە» دەسەتىن بۇرىنعى شالدار. اللەكەم الجىتپاي السا ەكەن.
مولدا دەم سالىپ، جانىمىزدا مەدەت تىلەپ جاۋدىرەپ وتىرعان ۇرپاعىمىزعا تىرلىكتە جاساعان كىنا مەن كۇنامىزدى ءتىزىپ ايتىپ، ماسقارا بولماساق جارار...
⠀ ⠀⠀ ⠀⠀⠀ ⠀ *
تەڭىز دە كىرلەيدى. ايدىن بەتىن ءشوپ-شالام، سىنعان اعاش، ولگەن بالىق پەن قۇس، توگىلگەن مۇناي قالدىعى باسادى. كۇندەردىڭ كۇنىندە داۋىل كوتەرىلەدى. تولقىن بىتكەن ارىستان جالدانىپ وكىرىپ-باقىرىپ جاعالاۋعا ۇمتىلادى. الگى كىر-قوقىستىڭ ءبارىن اكەلىپ ادامداردىڭ وزىنە لاقتىرادى. تازارىپ بارىپ تىنىم تابادى. سوسىن ءباز-باياعى قالپىندا جارقىرايدى دا جاتادى.
ءبىزدىڭ قوعام دا تاپ وسىنداي تازارۋدى كۇتىپ تۇر.
⠀ ⠀⠀ ⠀⠀⠀ ⠀ *
ءبىر توپ ۇيرەك ءبىر كولدى تاستاپ، ءدۇر ەتىپ كوتەرىلىپ، ەكىنشى كولگە قاراي ۇشىپ بارادى دەيدى. جولاي سۇڭقار كەزىگىپ سۇرايدى: «قايدا بەت الدىڭدار؟» – دەپ. سوندا ۇيرەكتەر: «قۇرىسىن، مىنا كول ساسىپ كەتتى. انا كول تازا، سوعان بارامىز»، – دەسەدى. سۇڭقار ايتتى دەيدى: «مىنا كوتەندەرىڭ امان بولسا ونى دا ساسىتارسىڭدار»، – دەپ.
وبلىستان وبلىسقا، مينيسترلىكتەن مينيسترلىككە ۇشىپ-قونىپ تۇك بىتىرمەي جۇرگەن بىرەۋلەردى كورسەم ىلعي دا وسى ءاپسانا ەسىمە تۇسەدى.
راحىمجان وتارباەۆ
