كوپتەن بەرى كورىنبەي كەتكەن بەلگىلى ءداستۇرلى ءانشى، ونەرتانۋشى ەرلان تولەۋتاي ءوزىنىڭ فب پاراقشاسىندا اسەرلى جازبا جاريالاپ، 19 جەلتوقسان قاراعاندى قالاسىندا جەكە شىعارماشىلىق كەش وتكىزەتىنىن حابارلاپ، ءسۇيىنشى جاڭالىقپەن ءبولىستى. بۇل تۋرالى "ادىرنا" ۇلتتىق پورتالى جازادى.
رۋحانيات جاناشىرى كورىنبەي كەتۋىنىڭ سەبەبىن ءتۇسىندىرىپ، قازىر نەمەن اينالىسىپ جۇرگەنىن ايتتى.
"مەن فب-تە بولماعالى قاي زامان؟! ەڭ كەيىنگى جازبامدى 6 قازان كۇنى جاريالاپپىن. سودان بەرى ەكى جارىم ايداي ۋاقىت ءوتىپتى. جالپى، بيىل اسىرەسە سوڭعى جارتى جىلدىقتا فب بەتىندە ءوندىرتىپ ەشتەڭە جاريالاي قويعان جوقپىن. سەبەبى بيىل جۇمىس كوپ بولدى. كىتاپ جازدىم كۇزگە دەيىن، سوسىن كۇز بويى ۇيعىر اۋدانىندا تۇسىرىلىمدە بولدىم. كينونىڭ باسقا دا باستان اسىپ جاتقان جۇمىستارى بار دەگەندەي. سودان مەن فب-تان سۋىپ بار قالىپپىن.... الەۋمەتتىك جەلىدەن قول ۇزگەن جاقسى – ءبىر جاعىنان.. شىعارماشىشىلىق، باسقا دا جۇمىستارىڭ ءونديدى. ەكىنشى جاعى بار – قوعامدا بولىپ جاتقان وقيعالاردان قول ءۇزىپ قالاسىڭ. جازبا جاريالاپ، پىكىر بىلدىرمەك تۇگىلى ءتىپتى ەشكىمنىڭ قۋانىشىنا، قىزىعىنا ورتاقتاسا الماي قالدىم. عافۋ ەتەرسىزدەر، دوستار! بۇدان بىلاي سيرەك بولسا دا شىعىپ تۇرامىن ەندى. ويتكەنى جىل بويى جيعان قورجىنىم توق. سونى سىزدەرمەن بولىسپەك ويىم بار. بىلدىرەتىن پىكىر دە جەتەرلىك", - دەپ جازدى ەرلان تولەۋتاي.
سوناۋ 1990 جىلداردىڭ سوڭىنان بەرى قاراعاندىداعى ونەرلى جاستاردىڭ التىن قازىعى بولىپ، كۇنى بۇگىنگە دەيىن رۋحانياتقا ايرىقشا ۇلەس قوسىپ كەلە جاتقان ەرلان تولەۋتاي ءوزىنىڭ تۋعان وبلىسىندا تۇڭعىش رەت "اتىڭنان اينالايىن، قاراعاندى" اتتى جەكە شىعارماشىلىق كەشىنىڭ وتكەلى جاتقانىن ايتىپ، ريزاشىلىعىن جەتكىزدى.
"سونىڭ ءبىرى قاراعاندىدا شىعارماشىلىق كەشىم وتكەلى جاتىر. تۋعان وبلىسىمدا تۇڭعىش رەت جانە وبلىستىق اكىمشىلىك پەن وبلىستىق مادەنيەت باسقارماسىنىڭ مۇرىندىق بولۋىمەن. بۇل مەن ءۇشىن زور قۋانىش. سول ءۇشىن بۇگىن قاراعاندىعا كەلدىم. دايىندىق جۇمىستارىنا قاتىستىم. وبلىستىق مادەنيەت باسقارماسىندا كەشىمە بايلانىستى ازىرلىك جۇمىستارى قىزۋ ءجۇرىپ جاتىر ەكەن. توعايىپ، مارقايىپ قالدىم. دەگەنمەن ىشتەي مازاسىزدانۋ بار. سەبەبى 2017 جىلدان بەرى ۇلكەن ساحناعا شىققان جوقپىن. نە دە بولسا – تاۋەكەل دەپ شيرىعۋدامىن. قىسقاسى، ەرتەڭگى بولاتىن شىعارماشىلىق كەشىمە كەلىڭىزدەر، قاراعاندىلىقتار، استانالىقتار! شىعارماشىلىق كەشىمە ونەردەگى جاقىن دوستارىم قاتىسادى جانە ول دوستارىم تەك مەنىڭ اندەرىمدى شىرقاماق. اتاپ ايتقاندا: رامازان ستامعازيەۆ، مەرۋەرت تۇسىپباەۆ، ەركىن شۇكىمان، روزا القوجا، ەرلان قۇجيمانوۆ، سەيىل اياعانوۆ سەكىلدى سايىپقىراندار ونەر كورسەتپەك. كەلىڭىزدەر، تاماشالاڭىزدار قادىرمەندى قاراعاندىلىقتار مەن قالا قوناقتارى!",- دەيدى ونەرتانۋشى.
"ادىرنا" ۇلتتىق پورتالى
