الەم جۇرتشىلىعىن كوروناۆيرۋس قايتا قىسپاققا الدى. قىتايدا كارانتين تالاپتارىنان حالىق مەزى بولسا، تايلاندتا جاڭا جىلعا وراي ماسكا تاعۋ مىندەتتەلى. بۇل جايلى "ادىرنا" ۇلتتىق پورتالى حابارلايدى.
تايلاندتا كوروناۆيرۋستىڭ تارالۋ شەڭبەرى كەڭەيتىپ كەلەدى. سوعان وراي تايلاند COVID-ءتىڭ الدىن الۋ شارالارىن قابىلداپ جاتىر. سوڭعى ۋاقىتتا ەلدىڭ تۋريستىك پروۆينتسيالارىندا كوروناۆيرۋس جۇقتىرعاندار سانى ارتقان. ەل بيلىگى جاڭا جىلدى تويلاۋعا قاتىستى بىرقاتار شەكتەۋلەر ەنگىزدى.
بانگكوك گۋبەرناتورى چادچارت سيتتيپۋنت جاپپاي مەرەكەلىك شارالارعا تىيىم سالىنباعانىن ايتتى. الايدا ادام كوپ جينالاتىن جەرلەردە بارلىعى، سونىڭ ىشىندە تۋريستەر دە بەتپەردە تاعۋعا ءماجبۇر بولادى، دەپ جازدى Bangkokpost.
سونىمەن قاتار، مەرەكەلىك ءىس-شارانى ۇيىمداستىرۋشىلار كوپشىلىكپەن بىرگە جاڭا جىلدى تويلاۋ ءۇشىن ارنايى رۇقسات الۋى كەرەك. ەل ۇكىمەتى قايتادان ەكپە سالۋدى دا قولعا الا باستادى. ول ءۇشىن ەكپە سالاتىن ارنايى ورىندار سانى كوبەيتىلدى.
ونىڭ ۇستىندە تايلاندتىڭ پاتشاسى ماحا ۆاجيرالونگكورن (راما X) مەن پاتشايىمى سۋتيدا دا كوروناۆيرۋس جۇقتىردى. بۇل جونىندە پاتشا سارايىنىڭ بيۋروسى مالىمدەدى. قازىر دارىگەرلەر ەل باسشىلارىنىڭ قىزمەتىن ىسىرىپ قويىپ، ەم قابىلداۋىنا ۇگىتتەپ جاتىر.
"ادىرنا" ۇلتتىق پورتالى
