قازاقستان مەن ەۋروپالىق وداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمگە قول قويىلعانىنا 10 جىل تولدى، دەپ حابارلايدى "ادىرنا" ۇلتتىق پورتالى.
وسى كەزەڭدە تاراپتار اراسىنداعى قارىم-قاتىناس كەڭ اۋقىمدى ءارى سەرپىندى ستراتەگيالىق سەرىكتەستىك دەڭگەيىنە كوتەرىلدى. بۇل تۋرالى ەۋروپالىق كەڭەس پرەزيدەنتى انتونيۋ كوشتا Egemen Qazaqstan باسىلىمىندا جارىق كورگەن ماقالاسىندا مالىمدەدى.
ونىڭ ايتۋىنشا، بۇگىندە قازاقستان مەن ەو اراسىنداعى ىنتىماقتاستىق ساياسي ديالوگتى، قاۋىپسىزدىك پەن ەكونوميكالىق دامۋدى، كوپجاقتى ديپلوماتيانى، ءوزارا بايلانىستىلىق پەن يننوۆاتسيالاردى قامتيدى. گەوساياسي شيەلەنىس جاعدايىندا قازاقستان ەۋروپالىق وداق ءۇشىن تۇراقتى، سەنىمدى ءارى پەرسپەكتيۆالى سەرىكتەس بولىپ قالا بەرەدى.
كوپجاقتى فورماتتاعى ءوزارا ءىس-قيمىل بۇۇ جارعىسى قاعيداتتارىن ساقتاۋ، بەيبىت شەشىمدەردى ىلگەرىلەتۋ جانە حالىقارالىق قۇقىققا نەگىزدەلگەن ءتارتىپتى نىعايتۋعا باعىتتالعان. ۋكرايناداعى قاقتىعىستى توقتاتىپ، تۇراقتى بەيبىتشىلىك ورناتۋ قازاقستان مەن ەو-تىڭ ورتاق باسىمدىعى رەتىندە اتاپ ءوتىلدى.
سەرىكتەستە ناقتى ناتيجەلەر بەرگەن باعىتتاردىڭ ءبىرى — كولىك ءوزارا بايلانىستىلىعى. ترانسكاسپي حالىقارالىق كولىك ءدالىزى («ورتا ءدالىز») ورتالىق ازيا مەن ەۋروپا اراسىنداعى ستراتەگيالىق ماڭىزدى كوپىرگە اينالدى. بۇل باعىتقا 10 ملرد ەۋرودان استام ەۋروپالىق جانە حالىقارالىق ينۆەستيتسيا تارتىلىپ، ءدالىزدىڭ تيىمدىلىگى مەن تسيفرلاندىرىلۋى ارتتى.
ەكونوميكالىق ىنتىماقتاستىق تا ەكىجاقتى قاتىناستىڭ نەگىزگى تىرەگىنە جاتادى. قازىرگى تاڭدا قازاقستاندا 4 مىڭنان استام ەۋروپالىق كومپانيا جۇمىس ىستەيدى. «Horizon Europe» جانە «Erasmus+» باعدارلامالارى اياسىنداعى جوبالار، سونداي-اق ۆيزالىق رەجيمدى جەڭىلدەتۋ جونىندەگى كەلىسسوزدەر ىسكەرلىك جانە اكادەميالىق بايلانىستاردى كەڭەيتۋگە ىقپال ەتۋدە.
ستراتەگيالىق ارىپتەستىكتىڭ ماڭىزدى سالالارىنىڭ ءبىرى – اسا ماڭىزدى شيكىزات، ەنەرگيا رەسۋرستارى، «جاسىل» تەحنولوگيالاردى جەتكىزۋ. شيكىزات، اككۋمۋلياتور باتارەيالارى جانە جاسىل سۋتەك ءوندىرىسى بويىنشا بەكىتىلگەن بىرلەسكەن جول كارتاسى (2025–2026 جج.) وسى باعىتتاعى ىنتىماقتاستىقتىڭ الەۋەتىن ىسكە اسىرۋعا نەگىز بولماق.
انتونيۋ كوشتانىڭ ايتۋىنشا، كەلەسى ونجىلدىقتا قوسىلعان قۇن تىزبەكتەرىن دامىتۋ، ينفراقۇرىلىمدى جاڭعىرتۋ، تەحنولوگيالىق ىنتىماقتاستىقتى تەرەڭدەتۋ جانە ناقتى بىرلەسكەن جوبالاردى جۇزەگە اسىرۋ باستى مىندەتكە اينالادى.
«قازاقستان – سەنىمدى سەرىكتەس. بىرگە ءبىز ورتاق قيىندىقتاردى ورتاق ارتىقشىلىقتارعا اينالدىرىپ، ەكى تاراپ ءۇشىن دە قاۋىپسىز، تۇراقتى جانە باسەكەگە قابىلەتتى بولاشاق قالىپتاستىرا الامىز»، – دەپ اتاپ ءوتتى ەۋروپالىق كەڭەس پرەزيدەنتى.
