مۇحتار تايجاندى نەگە پوليتسيا الىپ كەتتى؟

2420
Adyrna.kz Telegram

بەلگىلى قوعام قايراتكەرى مۇحتار تايجان بۇگىن فەيسبۋك جەلىسىندە بارشا ۇلتشىلداردى بىرىگۋگە شاقىرعان بولاتىن. وسىعان دەيىنگى وكپە-رەنىشتى ۇمىتىپ، تىزە قوسىپ ەڭبەك ەتەيىك دەي كەلە، بۇگىن كەشكى 19:00-دە الماتى قالاسىنداعى «استانا» قوناق ۇيىندە كۇتەتىنىن ايتتى. سوڭعى جىلدارى قىرعي-قاباق بولىپ جۇرگەن گەرويحان قىستاۋباەۆتى دا ارنايىلاپ شاقىرعانىن جازعان. بىراق، ۇلتشىلداردىڭ باسى بۇل جولى دا بىرىگە المادى. دۇرىسى، بىرىكتىرمەدى دەۋگە بولار. مۇحتار تايجاندى الماتى قالالىق ىشكى ىستەر باسقارماسىنا الىپ كەتىپتى.

بۇل تۋرالى ناقتى اقپارات ءبىلۋ ماقساتىندا گەرويحان قىستاۋباەۆقا حابارلاسىپ ەدىك، جيىن بولاتىن جەردەن قايتىپ بارا جاتقانىن جەتكىزدى. «مەن بارعاندا 10 شاقتى ادام ءجۇر ەكەن.  ىشىنەن ەركىن راقىشەۆتى عانا تانىدىم.  10-15 مينۋتتان كەيىن بىزگە مۇحتاردى پوليتسيا الىپ كەتكەنىن ايتتى.  ەگەر بۇل مۇحتار ورىنداعان كەزەكتى سپەكتاكل بولاتىن بولسا، وندا قويۋشى رەجيسسەرى مىقتى ەكەن. مۇحتار تايجاندى مەن بۇرىننان بىلەمىن. ول جىگىتتىڭ ءوزى بۇنداي باستاماعا بارا قوياتىنىنا سەنبەيمىن. وعان تاپسىرما بەرىلگەن سياقتى. مۇحتاردى مەنەن ارتىق ەشكىم بىلمەيدى دەۋگە بولار. سوندىقتان بۇل كەزەكتى قويىلىم با دەپ كۇماندانىپ تۇرمىن. ەگەر ول شىن نيەتىمەن جۇمىس ىستەيمىن دەسە، قۇشاق جايا قارسى الۋعا دايىنمىن» دەگەن گەرويحان قىستاۋباەۆ ءبىر ءۇمىت، ءبىر كۇدىكتە تۇرعانىن جاسىرمادى.

ءبىز تومەندە مۇحتار تايجاننىڭ پاراقشاسىنداعى جازباسىن قاز قالپىندا جاريالاپ وتىرمىز.

قۇرمەتتى قازاق ەلىنىڭ پاتريوتتارى!

شىنى كەرەك، ءبىر بىرىمىزگە دەگەن وكپە-رەنىشتەرىمىز بار، جوق ەمەس، قايتەيىك ەندى، ءبارىمىز پەندەمىز عوي. ءومىر سونداي، ادامدار پەندە بولعان سوڭ اراسىندا كەيدە تۇسىنىسپەۋشىلىك بولا بەرەدى. بىراق ول جەكە باستىڭ عانا شارۋاسى دەپ ەسەپتەيمىن. ال ءدال قازىر ۇلتتىق دارەجەدەگى قايعى وقيعا پايدا بولدى. تاعى دا قازاق بالاسى - راحىمجان ءىنىمىز جانسەيت - قاراعاندىدا قازا تاپتى، يماندى بولسىن، جاتقان جەرى جايلى بولسىن. مالوۆودنىي، شەڭگەلدى، شىمكەنت وبلىسىندا ءدال سونداي قايعى، اۋىر وقيعالار ءبارىمىزدىڭ ەسىمىزدە.

قاشانعا دەيىن بۇنداي وقيعالار قايتالا بەرەدى؟ بۇنداي وقيعالار قايتالانباس ءۇشىن بۇگىنگى تاڭدا نە ىستەۋمىز كەرەك؟ قولىمىزدان ءبىراز نارسەلەر كەلەدى، سەبەبى بۇل ەلدىڭ يەسى ءبىزبىز، جاۋاپكەرشىلىك ءبىزدىڭ مويىمىزدا. بالالارعا قانداي ەل قالدىرىپ كەتەمىز؟ ولار دا بۇل پروبەمالارمەن ءومىر ءسۇرۋ كەرەك پە نە؟

بابالارىمىز ۇلتتىق جاعداي پايدا بولعاندا جەكە رەنىشتەرىن قويىپ بىرىكتىرەتىن، بىرگە جينالىپ اقىلداساتىن. ءبىز دە سويتەيىك! مەنىڭ ۇسىنىسىم - ءار قالادا ۇلتشىلدار بۇگىن كەشكە جينالىپ اقىلداسسىن. باسقالارعا دا، بيلىككە دە قازاقتىڭ ىڭتىماعىن كورسەتەيىك!

نەگە باسقا ۇلتتاردىڭ كەي وكىلدەرى قۇتىرىپ قازاقتىڭ بالاسىن پىشاقتاپ ولتىرەدى؟ مەنىڭشە بۇل جەردە مەملەكەتتىڭ ۇلتتىق ساياساتى بۇرىس، ءبىز ءبارىمىز جۇمىلىپ بۇنى وزگەرتۋ ءتيىسپىز. قالاي بولسا دا، اقىلداساتىن جايىمىز كوپ.

مەن ءوز باسىم ەرتەڭ كەشكە قاراي استاناعا كەتەم. بىراق ونىڭ الدىندا،

قۇرمەتتى ۇلتجاندى اعا-ىنىلەرىم، اپكە-قارىنداستارىم اقىلداسۋ جيىنعا بۇگىن 08.01.2019. ساعات 19.00 شىن جۇرەكتەن شاقىرام!

جيىن وتەتىن ورنى: الماتى قالاسى، بايتۇرسىنوۆ 113, ساتباەۆ قيىلىسى، استانا قوناق ءۇيى، قۇرىلتاي زالى،
مەنىڭ تەل 8-7772552266

P.S. بانىمدا 7-8 ادام بولعان ەدى، قازىر تۇگەلىن بوساتىپ جىبەرەم. قارىم قاتىناسىم كۇردەلى بولعان سوڭ گەرويحان قىستاۋباەۆ، سەرىكجان مامبەتالين، رىسبەك سارسەنباي ۇلتجاندى ارىپتەستەرىمدى ارنايى بولەك شاقىرىپ وتىرمىن!

بارشاڭىزعا ەسىك اشىق، جۋرناليستەر، ورگان ادامدارى دا كەلىڭىزدەر، تىڭداڭىزدار، اينالىپ كەلگەندە سەندەر دە قازاق بالاسىڭدار.

كەلىڭىزدەر، جالپى ۇلتتىق ماسەلەدە بىرگە بولايىق، ارداقتى اعايىن!

وڭعار قابدەن

«ادىرنا» ۇلتتىق پورتالى

پىكىرلەر