الەم «بارسەلوناداعى» باۋىرمالدىقتىڭ سەبەبىن ىزدەپ الەك. كلۋبتاعى اتموسفەرا، جانكۇيەر قولداۋى «Mes Que Un Club» دەگەن ۇراندا تۇرعانداي. مۇمكىن سەبەپ كوپشىلىگىنىڭ لا ماسيادا ەرجەتكەنىمەن بايلانىستى بولار، بالكىم؟
لا ماسيا – ۇلكەن فۋتبولعا بەرىلگەن بيلەت. باعاسى ماڭداي تەر مەن تىنىمسىز جاتتىعۋدان تۇرادى. ۇشاقتىڭ باعىتى بەلگىلى – «كامپ-نوۋ». مەسسيمەن بىرگە 87-لەر ۇشاعىنا ءبىرتالاي جولاۋشى مىنەدى. كەز كەلگەنى دىتتەگەن جەرگە جەتە العان جوق. بىرىنە دەمەۋ، بىرىنە قۇلشىنىس جەتپەدى.
حورحە مەن لەو بۋەنوس ايرەستەن تىكەلەي بارسەلوناعا ۇشتى. اكادەميا قىزمەتكەرى اۋەجايدان كۇتىپ الىپ، قوناقۇيگە ورنالاستىردى. مەسسيدىڭ دەڭگەيىن بايقاپ كورەتىندەر جاپونياعا ىسساپارمەن كەتكەنىن، كەزدەسۋ ەرتەڭگە شەگەرىلگەنىن جەتكىزدى.
مەسسي ەرتە تۇردى. ءتۇنى بويى وتباسىن، روساريوسىن ويلاپ كوز ىلگەن جوق. دەگەنمەن ىشىندە ءبىر تولقىنىس بار. جاڭا ورتا ونى قالاي قابىلداماق دەگەن ۇرەي باسىم. حورحە بالاسىنىڭ توماعا تۇيىقتىعىن جاقسى بىلەدى. بىراق بارسەلوناعا كەلگەن ەكى كۇن ىشىندە لەو تىپتەن وزگەرىپ كەتتى. قاراپايىم سۇراقتارعا جاۋاپ بەرۋدەن ارى اسپايتىن بوپ الدى. بۇل ادەتى ەرتەڭ قابىلداۋ كەزىندە قيىندىق تۋدىرا ما دەپ قورقادى. ءبىر جاعىنان بالاسىنىڭ تالانتىنا ءشۇبا كەلتىرگىسى جوق.
لەو مەن اكەسىن اكادەميانىڭ الدىنان كۇتىپ الدى. جاتتىعۋ بازاسىنىڭ ەسىگىن اشقاندا ونىڭ تاڭدانىسىندا شەك بولمادى. ورتالىق «نيۋەللس ولد بويزدىڭ» ستاديونىنان دا ۇلكەن ەكەن. بۇلار بىردەن باس كەڭسەگە باردى. ولاردى كارلەس رەشاك پەن پەر كۇتىپ وتىر ەكەن. پەر لەونى كورىپ تاڭىرقاپ قالدى. كەڭەسشىگە بالا بەينەجازباداعىدان دا كىشكەنتاي بوپ كورىندى. پەردىڭ كوزقاراسىن اڭعارعان رەشاك مەسسيدى بىردەن ستاديونعا شاقىردى.
الاڭدا 13 جاسقا دەيىنگى بالالار دوپ تەۋىپ ءجۇر ەكەن. رەشاك تورەشىگە بەلگى بەردى. باسشىلىق كەلگەنىن كورگەن جاتتىقتىرۋشى لەونى جانىنا شاقىردى. كارلەس انتونيوعا ءبارىن ەسكەرتىپ قويعان ەكەن. لەو الاڭداعى ءبىر بالامەن اۋىستى. كەيىنىرەك بىلسە، ول ۆاسكەس ەكەن. بۇل بالا كەيىنىرەك مەسسيدىڭ اكادەمياداعى باستى باسكەلەسىنە اينالدى. لەو ادەتىنشە پاس بەرگەنىن كۇتۋمەن ءجۇردى. بىراق كىمگە پاس بەر دەپ ايتارىن بىلمەدى. سودان ارەكەتكە كوشۋ كەرەگىن ءتۇسىنىپ، كوماندالاستارىنان دوپ الدى. بىرىنەن سوڭ ءبىرىن الداپ ءوتىپ، گول سوقتى. جانىنداعىلار تاڭدانا ءتۇستى. بالانىڭ بويىنداعى قابىلەتتى بايقاپ، پاستى لەوعا قاراي اسىرۋدى باستادى. وسىلايشا، لەو العاشقى ويىندا حەت-تريك اۆتورى اتاندى.
پەر رەشاكقا «قاتەلەسىپپىن» دەگەندەي ءبىر قارادى. ويىننان سوڭ تورتتىك قايتا كەڭسەگە قايتتى. ستاديونداعىلار دەل-سال كۇيدە قالدى. كەتىپ بارا جاتىپ لەو كوماندالاستارىنا قايتا بۇرىلدى. ولار دا لەونى باعىپ تۇر ەكەن. كىشكەنتاي بالا جىلى جىميدى دا، ءجۇرىپ كەتتى. بۇنىسى «مەن ءالى كەلەمىن» دەگەندەي اسەر قالدىردى. جەرار پيكە ەسىمدى بالا لەونىڭ ارتىنان ۇزاق قاراپ تۇردى. مۇنىڭ ءمانىسىن بىلگىسى كەلگەندەي فابرەگاس جانىنا كەلدى.
– جەرار، سەنىڭ كامپۋسقا قايتقىڭ كەلمەي مە؟
– جاڭاعى بالانى كوردىڭ بە؟
– ءيا، دوپ قابىلداۋى جاقسى ەكەن.
– كور دە تۇر، ءبىز بولاشاقتا وسى جىگىتپەن چەمپيوندار ليگاسىن ۇتىپ الامىز.
– وسى سەن قىزىقسىڭ، پيكە. ونىڭ بىزگە قوسىلاتىنى دا بەلگىسىز. سەن بولساڭ چەمپيوندار ليگاسىنىڭ اڭگىمەسىن ايتاسىڭ. ءجۇر وداندا كامپۋسقا قايتايىق، كەشكى استىڭ ۋاقىتى بولدى.
فابرەگاس پيكەنى كامپۋس جاققا الىپ كەتتى. ەكى بالانىڭ اڭگىمەسىن ەستىپ تۇرعان جاتتىقتىرۋشى ويلانىپ قالدى. سەبەبى، لەونىڭ الاڭداعى ارەكەتى انتونيوعا دا ۇناعان ەدى.
حورحە كەڭسەگە كەلىسىمەن-اق قول قويۋدىڭ قامىمەن جۇرەمىز دەپ ويلادى. الايدا حورحەنىڭ ويىنداعىداي بولمادى. سويتسە، ويىندى تەك رەشاك پەن پەر عانا ەمەس، وزگە دە كەڭەس مۇشەلەرى كورگەن ەكەن. ولار بالانىڭ ويىن مانەرىن ۇناتقانىمەن، كىشكەنتاي جانە ءالسىز ەكەنىن العا تارتتى. كوپكە دەيىن ءبىر شەشىمگە كەلە الماعاندىقتان، لەو مەن اكەسىن قوناقۇيگە قايتاردى. وزدەرى ماسەلەنى ارى قاراي تالقىلاماق.
جول بويى حورحە ءۇنسىز وتىردى. ىشىندەگى سانسىز ساۋالعا جاۋاپ ىزدەپ، دال بولدى. لەو بولسا، قۋانىشتى. وعان الاڭ دا، بالالار دا قاتتى ۇنادى. ءتىپتى 24 ساعات دوپ تەبۋگە دايىن ەكەنىن سەزەدى. اكەسى ۇلىنىڭ باقىتتى ەكەنىن كوزدەرىنەن بايقادى. جانارىنداعى جالىندى ەرتەڭگى شەشىم سوندىرە مە دەپ قورقادى. سوندىقتان تىعىرىقتان شىعۋدىڭ جاڭا جولىن ويلاستىرماقشى.
لەونىڭ ۇيقىسىن تەلەفون قوڭىراۋى ءبولدى. ءبىر كوزىمەن اينالاسىن باقسا، اكەسى تەلەفونمەن سويلەسىپ جاتىر. ءبىر نارسەنى ءتۇسىندىرىپ جاتقان ءتارىزدى. ارى قاراي ۇيىقتايىن دەسە، اكادەميا ەسىنە ءتۇسىپ كەتتى. ءوزىنىڭ سوندا جاتتىعىپ جۇرگەنىن، قاتارلاستارىمەن دوس بولعانىن ويلاپ قيالعا شومدى. ويىن اكەسىنىڭ ءسوزى ءبولدى. بالاسىنان باسقا اكادەمياعا بارۋعا قالاي قارايتىنىن سۇرادى. لەوعا سۇراق ۇناعان جوق. ورنىنان تۇرىپ جينالا باستادى. اكەسىنە لا ماسياعا تۇسپەيتىن بولسا، روساريوعا قايتۋدى ءجون كورەتىنىن ايتتى. حورحە بۇل تەك ۇلكەن فۋتبولعا جول ەمەس، سونداي-اق دەنساۋلىعىن تۇزەۋگە بەرىلگەن مۇمكىندىك ەكەنىن تۇسىندىرىپ باقتى. لەو ءبىر ءسات اكەسىمەن كەلىسكەندەي بولدى.
حورحەنىڭ ويىن وزگەرتكەن «رەال ءمادريدتىڭ» ۇسىنىسى ەدى. ولار لەونى بىردەن لا فابريكاعا قابىلدايتىنىن، ەم-دومىنا قارجى بولەتىنىن ايتتى. كلۋبتىڭ سپورت ديرەكتورىمەن تۇستەن كەيىن كەزدەسۋدى جوسپارلادى. لەو اكە شەشىمىنە كوندىككەن سىڭايلى. سويتكەندە، بولمەنىڭ ەسىك قوڭىراۋى شالىندى. اشسا، الدارىندا پەر تۇر. جىلى امانداسىپ، مەيرامحانادا رەشاكتىڭ كۇتىپ تۇرعانىن ايتتى. ۇشەۋى استىنا تۇسسە، شىنىمەن، كارلەس داستارقان جايىپ كۇتىپ وتىر ەكەن. رەشاك اڭگىمەنى قىسقا قايىرىپ، لەونى لا ماسياعا قابىلدايتىنىن، ەرتەڭنەن باستاپ كەشىكپەي كەلۋىن ءوتىندى. حورحە مەن لەو ەستىگەنىنە سەنە الار ەمەس. اسىعىستا، پەر مەن رەشاك كەلىسىمشارتتى ۇمىتىپ كەتىپتى. سودان لەونىڭ العاشقى كەلىسىمشارتى قاعازمايلىققا جازىلدى. كەيىن بىلسە، رەشاك كوميسسيا مۇشەلەرىن ۇزاق كوندىرۋگە تىرىسىپتى. الايدا ناتيجە شىعارا الماپتى. ەرتەسىنە «بارسەلوناعا» لەونەل مەسسيگە «رەال مادريد» اكادەمياسىنىڭ ۇسىنىس بىلدىرگەنى جەتەدى. سودان رەشاك اقىلداستار القاسىن قايتا جينايدى. «رەال» قيمىلعا كوشكەنىن، بالانىڭ تالانتىن، قازىرگى مەديتسينانىڭ كۇشىن ايتىپ، اقىرى كوندىرەدى. وڭ شەشىمدى ەستىسىمەن پەردى الىپ، دەرەۋ قوناقۇيگە تارتادى.
لەونىڭ لا ماسياداعى حيكاياسى باستالىپ كەتتى. العاشىندا، مۇنداعى دۇنيەلەر بۇعان تاڭسىق كورىنەتىن. مۇندا كەلىسمەن تەك دوپ تەبەمىن دەپ ويلاعان. قايدان، ساباق وقۋى، ەرتە تۇرۋى، جەكە تاپسىرما ورىنداۋى قاجەت ەكەن. ونىڭ ۇستىنە كاتالان ءتىلىن ۇيرەنۋى كەرەك. اكادەمياداعىلار مۇنىڭ كوزىنشە كاتالانشا سويلەسەدى. 1-2 اپتا قوناقۇيدەن قاتىناپ تۇردى، كەيىننەن كامپۋسقا كوشىپ كەلدى. كلۋب باسشىلىعى حورحەگە ءۇي جالداپ، جاڭا جۇمىسقا ورنالاستىردى. لەو اپتا سوڭىندا اكەسىنە بارىپ قايتادى.
كامپۋسقا كەلگەسىن، لا ماسيا تىرشىلىگىمەن تولىق تانىستى. اكادەميا اڭىزدارىمەن كەزدەستى. وزىمەن قاتارلاستارىنان بولەك، ۇلكەن توپتاعى ويىنشىلارمەن تىلدەستى. ۇلكەندەردەن ءحاۆيدىڭ ويىن مانەرى قاتتى ۇنادى. ينەستانىڭ ۇستامدىلىعىنا قايران قالدى. ونى بيىكتەتىپ تۇرعان سابىر مەن تالانت ەكەنىن اڭعاردى. پۋيول تۋرالى ايتپاسا دا بەلگىلى. مىقتى ءارى مىنەزدى ويىنشى. قاتارلاستاردان فابرەگاس، بۋسكەتس، پيكەنى جاقىن تارتتى. اسىرەسە، پيكەنى. ويتكەنى اكادەمياداعى قىزىق پەن شىجىقتىڭ ءبارى جەرارمەن بايلانىستى ەدى.
لا ماسيا ويىنشىلارى ءتۇرلى ءادىس-ءتاسىلدى سىناپ كورەتىن. اركىمگە ارنالعان جەكە جاتىعۋلارى تاعى بار. اكادەميالار اراسىنداعى تۋرنيرگە دايىندىق قاتاڭ تۇردە جۇرەدى. شاكىرتتەرىنىڭ توپ جاراتىنىنا كۇمان جوق بولسا دا، ترەنەر تاپسىرماسى تاۋسىلمايدى. مەسسيگە ءوسۋ گارمونىن تەزدەتەتىن ينە سالۋ مۇندا دا جالعاستى. دارۋمەن قابىلداۋ دا توقتاعان جوق. ول سونىڭ وزىندە بويىنداعى السىزدىكتى سەزەتىن. كەيدە ماتچ ورتاسىندا الاڭنان كەتىپ قالعىسى كەلەتىن. وسىنى بايقاعان رەشاك لەوعا ارناپ جاڭا ايلا ويلاپ تاپقان. لەو كىشكەنتايىنان شوكولادتى بوتونچيكتى قاتتى جاقسى كورەتىن. رەشاك ونى كابينەتىنە شاقىرىپ الىپ: «لەو، سەنىڭ ءار گولىڭا مەن ءبىر شوكولادتى بوتونچيك بەرەمىن. قانشا سوقساڭ، سونشاسى دايىن»،– دەيدى. كەزەكتى ءبىر بويىندا مەسسي دۋبل جاسايدى. رەشاك قوس بوتونچيك بەرەدى. داندەپ العان لەو بارىنشا كوپ گول سوعۋعا تىرىسادى. كارلەس بۇل امالدى قيىنداتۋدىڭ جولىن ويلايدى. لەوعا « ءار باسپەن سوققان گولىڭا قوس شوكولادتان بەرەمىن» دەيدى. ەندىگى ويىنداردى رەشاك ستاديوننان تاماشالاۋعا ارنايى كەلەدى. بىردە لەو باسپەن گول سوعىپ رەشاكقا ەكى دەگەن بەلگى بەرەدى. كارلەس قالتاسىنان ەكى شوكولادتى بوتونچيكتى كورسەتەدى. سىيلىعىن كورگەن لەونىڭ كوزى بال-بۇل جانادى.
مەسسيدىڭ لا ماسياداعى قالىپتاسۋىنا ءار جاتتىعۋمەن قاتار، اينالاسىنداعىلاردىڭ دا اسەرى بار. ونىڭ ۇستىنە كوماندادا مەسسيدەن گورى ۆاسكەسكە كوبىرەك سەنىم ارتادى. راسىمەن، ۆاسكەستىڭ دەنەسى مىعىم ءارى ويىن مانەرى جيناقى. سودان با مەسسي ءار ويىن سايىن قاتارلاستارىن تاڭعالدىرۋعا تىراشتانادى. ارينە، ناتيجە جوق ەمەس. اكادەميا ءارتۇرلى تۋرنيردە باق سىنايتىن. لەو كەلگەلى بەرى بىرىنشىلىكتى بەرمەيتىن بولدى. كومبيناتسيالارى جاراپ تۇر. ءبارى جاتتىعۋ كەزىندەگىدەي وتەدى. تۋرنيرلىك كەستەدەگى جاعدايلارى دا ءتاپ-ءتاۋىر.
سوڭعى كەزدە قارسىلاس كوماندا ويىنشىلارى مەسسيگە ءجيى شابۋىلدايتىندى شىعاردى. مۇمكىندىك بولسا، قۇلاتىپ كەتۋگە دايىن. كەزەكتى ءبىر سوققىدان لەو ەكى اي بويى الاڭعا شىقپادى. «بارسەلونالىقتاردىڭ (س)» تۋرنيردەگى جاعدايى جاقسى، بىراق الاڭعا ءبىر لەپ جەتپەي تۇرادى. كومبيناتسياعا ءبىر قۋات كەرەك ءتارىزدى. جانكۇيەرلەر دە، كوماندا دا مەسسيدى ساعىنىپ ءجۇردى. «ەسپانولعا (س)» قارسى كەزدەسۋدە مەسسي الاڭعا شىقتى. ادەتتەگىدەي جارقىن ويىن ورنەگىن كورسەتتى. مۇندا دا قۇلاتۋعا قۇمارلار تابىلدى. لەو قۇلاسىمەن-اق، پيكە جانىنا جەتىپ كەلدى. ەسپانولدىق جىگىتتى يتەرىپ، ەرەگەسىپ جاتىر. ناتيجەسىندە، سارى قاعاز الدى. جەرار مەسسي ءۇشىن ءجيى سوعتىعىسىپ قالاتىن. ءتىپتى سارى قاعاز كوپتىگىنەن كەلەسى ويىنعا قاتىسا المايتىن. مەسسي دە وسىنداي «قورعاۋشىسىنا» ەرەكشە ءىلتيپات بىلدىرەتىن. ارەكەتتەرىنە قاراپ پيكەنى «پاپا پيكە» دەپ اتاپ كەتتى. جەراردىڭ بۇل ارەكەتى مەسسيدى باسقالارىنان ارتىق كورگەنى ەمەس، كومانداعا قاجەتىن جەتە تۇسىنگەننەن ەدى.
لا ماسيالىقتار «كامپ-نوۋعا» باراتىن كۇن تۋدى. مەسسي تەڭدەسسىز ستاديوندى كوزبەن كورۋدى بۇرىننان ارمانداپ جۇرگەن. جاي ماتچقا ەمەس، ەل-كلاسيكوعا بارادى. بۋسكەتس ادەتتەگىدەن ەرتەرەك تۇردى. مەسسي سەريحيونىڭ ءار تاكتيكانى جەتە تۇسىنەتىنىنە تاڭداي قاعاتىن. فابرەگاس، لەولار ويىن كورگەندى ۇناتا بەرمەيتىن. بۋسكەتس ويناۋعا دا، كورۋگە دە قۇمار ەدى. ول بارلىعىن كەزەك پە كەزەك وياتىپ شىقتى. لەو ەل-كلاسيكوعا بارۋدىڭ ءوزى ءتۇرلى ەتاپتان تۇراتىنىن سوندا بايقادى. بۇلار ستاديونعا 2 ساعات بۇرىن كەلدى. مەسسي ەرتە كەلۋدىڭ ءمانىن كەيىننەن ءتۇسىندى. ويىنعا 1 ساعات قالعاندا بارسەلونا كوشەلەرىندە قاربالاس باستالدى. كولىك كەپتەلىسى، ستاديون ماڭىنداعى شۋ، بيلەت تابا الماي جۇرگەن جانكۇيەر. اينالا ازان-قازان بولدى. تاڭەرتەڭ سەرحيونىڭ ۇيقىدان وياتقانىنا، ۋاقىتىسىمەن جينالعانىنا ىشتەي قۋاندى.
ويىن تاماشا ءوتتى. ماتچ اتموسفەراسى بولەك-ءتى. «كامپ-نوۋدا» اۋەلەگەن گيمن قانداي اسەرلى. قوس كلۋبتى قولداۋعا كەلگەن جانكۇيەردىڭ سانىندا شەك جوق سەكىلدى. پەرفومانستار كوز جاۋىن الادى. كاپيتاننىڭ كلۋبتى باستاپ شىققانى كوز الدىندا قالدى. ىشىنە كەيىن مەن دە كاپيتان بولام دەپ ءتۇيىپ الدى. وي جەتەگىندەگى مەسسيدى پيكە ءتۇرتىپ جىبەردى.
– قازىر ءبىز «كامپ-نوۋدى» ارالايمىز، قالاسىڭ با؟
– جاتتىقتىرۋشىنىڭ رۇقساتىنسىز با؟
– ءتۇۋ، نە بوپتى. ەشكىم بىلمەي قالادى. كوپ بوپ كەلدىك قوي. ءبىز جىلدا وسىلاي ىستەيمىز.
– كىم-كىم قالادى؟
– مەن، بۋسكەتس، فابرەگاس، ديوس، ۆالەنتە، داني، ۆاسكەس. قالاساڭ، سەن دە بارسىڭ.
–جارايدى، كورسەك كورەيىك.
وسىلايشا، پيكە باستاعان توپ «كامپ-نوۋعا» كىشىگىرىم ەكسپەديتسيا جۇرگىزدى. تروفەيلەر تۇرعان بولمەدەن باستاپ، گازونعا شەيىن ارالاپ شىقتى. ەڭ قىزىعى، «كامپ-نوۋ» گازونىندا باستالدى. گازون توڭىرەگىندە جۇرگەندە پيكە الاڭعا شىعىپ كورەيىك دەگەن ۇسىنىس تاستادى. كوپشىلىگى كەلىسكەنمەن، بۋسكەتستى كوندىرۋ قيىنعا سوقتى. اقىرى، ءبارى الاڭعا شىعاتىن بولدى. پيكە بارىنە گازوندى جالاڭاياق باسۋعا كەڭەس بەردى. سودان الاڭداعى ارپالىس باستالىپ كەتتى. لا ماسياداعىداي ەمەس، مۇندا ءبارى باسقاشا ەكەن. ءبارى الاڭدا قالاعانىن ىستەدى. شارشاعاسىن با، جانتايا كەتتى.
– كورەسىڭدەر، كەيىن ءبىز وسىندا دوپ تەبەمىز. ارينە، ءبارىمىز ەمەس، ءبىرازىمىز. بۋسكەتس، سەن ورتالىقتىڭ مىقتىسىنا اينالاسىڭ. مەن ساعان قورعانىستان كومەككە كەلىپ تۇرام. فابرەگاس تا بار ونەرىن سالاتىن بولادى. لەو شابۋىلدا بار سويقاندى باستايتىن بولادى. جىگىتتەر، ءبىز «كامپ-نوۋعا» ويىنشى بوپ ورالامىز عوي. سولاي ما؟ – دەگەن پيكەنىڭ اسەرلى ءسوزىن كۇزەتشىلەر ءبولدى. كلاسيكودان سوڭ سىرتتاعى ابىر-دابىردى ارەڭ باسقان ولار ستاديون ىشىنە تەكسەرىس جۇرگىزەدى. گازوندا جاتقان بالالاردى بايقاپ، الاڭعا كەلەدى. ۋ-شۋ باستالدى. ناتيجەسىندە، جاتتىقتىرۋشىعا قوڭىراۋ شالىپ، ماسەلە اكادەميا باسشىلىعىنا جەتەدى. ەرتەسىنە «ەكسكۋرسيا مۇشەلەرىن» جازا كۇتىپ تۇرادى.
جازا رەتىندە 15 اينالىم جۇگىرۋ بەرىلدى. لەو جۇگىرۋدى ونشا ۇناتا بەرمەيتىن. ىشىنەن پيكەنىڭ جەر-جەبىرىنە جەتكىسى كەلدى. الايدا كەشەگى اسەر ءۇشىن ءبارىن كەشىرۋگە بار. بۋسكەتس ءۇنسىز جۇگىرۋدى باستاپ كەتتى. فابرەگاس، پيكە ىلە-شالا قوسىلدى. مەسسي جايمەن جۇگىرىستى باستادى. ويىن ءبولۋ ءۇشىن كەشەگى جەرار ايتقان ءسوزدى ەسىنە ءتۇسىردى. الدىندا جۇگىرىپ بارا جاتقانداردى دوسى ەمەس، اتاقتى فۋتبول جۇلدىزى رەتىندە ەلەستەتتى. ءبىر كۇنى اتالعان جىگىتتەرمەن «كامپ-نوۋدا» دوپ تەبەتىنىن ەلەستەتتى. بۇلارعا دا ەل-كلاسيكودا تاماشا قولداۋ بىلدىرەتىن جانكۇيەر تابىلارىن ويلادى. وزدەرىن قۋىپ شىققان كۇزەتشىلەردىڭ كەيىن قولتاڭبا سۇراپ كەزەككە تۇراتىنىن ەلەستەتىپ قويادى. كەنەت ويىن الدىمەن «بارسەلونا ب-عا» قابىلدانۋ كەرەكتىگى ءبولدى. تەك ءبىر ءوزى ەمەس، جانىنداعى دوستارىمەن بىرگە. ول ءۇشىن نە ىستەۋ كەرەك؟ جوسپارىن جىگىتتەرمەن ءبولىسۋ ءۇشىن، جىلدامدىقتى ارتتىرۋ قاجەت. پيكەلەر العا ۇزاپ كەتكەن. مەسسي بارىنشا جۇگىرىپ كەلەدى. تەك قانا دوستارىنا ەمەس، بولاشاعىنا. الەمنىڭ ۇزدىك ويىنشىسى بولام، «كامپ-نوۋدا» دوپ تەبەم دەگەن ماقساتىنا جۇگىرەدى.
ايزات ايدارقىزى
ارنايى "ادىرنا" ۇلتتىق پورتالى ءۇشىن
