Álem «Barselonadaǵy» baýyrmaldyqtyń sebebin izdep álek. Klýbtaǵy atmosfera, jankúıer qoldaýy «Mes Que Un Club» degen uranda turǵandaı. Múmkin sebep kópshiliginiń La Masııada erjetkenimen baılanysty bolar, bálkim?
La Masııa – úlken fýtbolǵa berilgen bılet. Baǵasy mańdaı ter men tynymsyz jattyǵýdan turady. Ushaqtyń baǵyty belgili – «Kamp-Noý». Messımen birge 87-ler ushaǵyna birtalaı jolaýshy minedi. Kez kelgeni dittegen jerge jete alǵan joq. Birine demeý, birine qulshynys jetpedi.
Horhe men Leo Býenos Aıresten tikeleı Barselonaǵa ushty. Akademııa qyzmetkeri áýejaıdan kútip alyp, qonaqúıge ornalastyrdy. Messıdiń deńgeıin baıqap kóretinder Japonııaǵa issaparmen ketkenin, kezdesý erteńge shegerilgenin jetkizdi.
Messı erte turdy. Túni boıy otbasyn, Rosarıosyn oılap kóz ilgen joq. Degenmen ishinde bir tolqynys bar. Jańa orta ony qalaı qabyldamaq degen úreı basym. Horhe balasynyń tomaǵa tuıyqtyǵyn jaqsy biledi. Biraq Barselonaǵa kelgen eki kún ishinde Leo tipten ózgerip ketti. Qarapaıym suraqtarǵa jaýap berýden ary aspaıtyn bop aldy. Bul ádeti erteń qabyldaý kezinde qıyndyq týdyra ma dep qorqady. Bir jaǵynan balasynyń talantyna shúbá keltirgisi joq.
Leo men ákesin akademııanyń aldynan kútip aldy. Jattyǵý bazasynyń esigin ashqanda onyń tańdanysynda shek bolmady. Ortalyq «Nıýells Old Boızdyń» stadıonynan da úlken eken. Bular birden bas keńsege bardy. Olardy Karles Reshak pen Per kútip otyr eken. Per Leony kórip tańyrqap qaldy. Keńesshige bala beınejazbadaǵydan da kishkentaı bop kórindi. Perdiń kózqarasyn ańǵarǵan Reshak Messıdi birden stadıonǵa shaqyrdy.
Alańda 13 jasqa deıingi balalar dop teýip júr eken. Reshak tóreshige belgi berdi. Basshylyq kelgenin kórgen jattyqtyrýshy Leony janyna shaqyrdy. Karles Antonıoǵa bárin eskertip qoıǵan eken. Leo alańdaǵy bir balamen aýysty. Keıinirek bilse, ol Vaskes eken. Bul bala keıinirek Messıdiń akademııadaǵy basty báskelesine aınaldy. Leo ádetinshe pas bergenin kútýmen júrdi. Biraq kimge pas ber dep aıtaryn bilmedi. Sodan áreketke kóshý keregin túsinip, komandalastarynan dop aldy. Birinen soń birin aldap ótip, gol soqty. Janyndaǵylar tańdana tústi. Balanyń boıyndaǵy qabiletti baıqap, pasty Leoǵa qaraı asyrýdy bastady. Osylaısha, Leo alǵashqy oıynda het-trık avtory atandy.
Per Reshakqa «qatelesippin» degendeı bir qarady. Oıynnan soń tórttik qaıta keńsege qaıtty. Stadıondaǵylar del-sal kúıde qaldy. Ketip bara jatyp Leo komandalastaryna qaıta buryldy. Olar da Leony baǵyp tur eken. Kishkentaı bala jyly jymıdy da, júrip ketti. Bunysy «men áli kelemin» degendeı áser qaldyrdy. Jerar Pıke esimdi bala Leonyń artynan uzaq qarap turdy. Munyń mánisin bilgisi kelgendeı Fabregas janyna keldi.
– Jerar, seniń kampýsqa qaıtqyń kelmeı me?
– Jańaǵy balany kórdiń be?
– Iá, dop qabyldaýy jaqsy eken.
– Kór de tur, biz bolashaqta osy jigitpen Chempıondar Lıgasyn utyp alamyz.
– Osy sen qyzyqsyń, Pıke. Onyń bizge qosylatyny da belgisiz. Sen bolsań Chempıondar Lıgasynyń áńgimesin aıtasyń. Júr odanda kampýsqa qaıtaıyq, keshki astyń ýaqyty boldy.
Fabregas Pıkeni kampýs jaqqa alyp ketti. Eki balanyń áńgimesin estip turǵan jattyqtyrýshy oılanyp qaldy. Sebebi, Leonyń alańdaǵy áreketi Antonıoǵa da unaǵan edi.
Horhe keńsege kelisimen-aq qol qoıýdyń qamymen júremiz dep oılady. Alaıda Horheniń oıyndaǵydaı bolmady. Sóıtse, oıyndy tek Reshak pen Per ǵana emes, ózge de keńes músheleri kórgen eken. Olar balanyń oıyn mánerin unatqanymen, kishkentaı jáne álsiz ekenin alǵa tartty. Kópke deıin bir sheshimge kele almaǵandyqtan, Leo men ákesin qonaqúıge qaıtardy. Ózderi máseleni ary qaraı talqylamaq.
Jol boıy Horhe únsiz otyrdy. Ishindegi sansyz saýalǵa jaýap izdep, dal boldy. Leo bolsa, qýanyshty. Oǵan alań da, balalar da qatty unady. Tipti 24 saǵat dop tebýge daıyn ekenin sezedi. Ákesi ulynyń baqytty ekenin kózderinen baıqady. Janaryndaǵy jalyndy erteńgi sheshim sóndire me dep qorqady. Sondyqtan tyǵyryqtan shyǵýdyń jańa jolyn oılastyrmaqshy.
Leonyń uıqysyn telefon qońyraýy bóldi. Bir kózimen aınalasyn baqsa, ákesi telefonmen sóılesip jatyr. Bir nárseni túsindirip jatqan tárizdi. Ary qaraı uıyqtaıyn dese, akademııa esine túsip ketti. Óziniń sonda jattyǵyp júrgenin, qatarlastarymen dos bolǵanyn oılap qııalǵa shomdy. Oıyn ákesiniń sózi bóldi. Balasynan basqa akademııaǵa barýǵa qalaı qaraıtynyn surady. Leoǵa suraq unaǵan joq. Ornynan turyp jınala bastady. Ákesine La Masııaǵa túspeıtin bolsa, Rosarıoǵa qaıtýdy jón kóretinin aıtty. Horhe bul tek úlken fýtbolǵa jol emes, sondaı-aq densaýlyǵyn túzeýge berilgen múmkindik ekenin túsindirip baqty. Leo bir sát ákesimen keliskendeı boldy.
Horheniń oıyn ózgertken «Real Madrıdtiń» usynysy edi. Olar Leony birden La Fabrıkaǵa qabyldaıtynyn, em-domyna qarjy bóletinin aıtty. Klýbtyń sport dırektorymen tústen keıin kezdesýdi josparlady. Leo áke sheshimine kóndikken syńaıly. Sóıtkende, bólmeniń esik qońyraýy shalyndy. Ashsa, aldarynda Per tur. Jyly amandasyp, meıramhanada Reshaktyń kútip turǵanyn aıtty. Úsheýi astyna tússe, shynymen, Karles dastarqan jaıyp kútip otyr eken. Reshak áńgimeni qysqa qaıyryp, Leony La Masııaǵa qabyldaıtynyn, erteńnen bastap keshikpeı kelýin ótindi. Horhe men Leo estigenine sene alar emes. Asyǵysta, Per men Reshak kelisimshartty umytyp ketipti. Sodan Leonyń alǵashqy kelisimsharty qaǵazmaılyqqa jazyldy. Keıin bilse, Reshak komıssııa múshelerin uzaq kóndirýge tyrysypty. Alaıda nátıje shyǵara almapty. Ertesine «Barselonaǵa» Leonel Messıge «Real Madrıd» akademııasynyń usynys bildirgeni jetedi. Sodan Reshak aqyldastar alqasyn qaıta jınaıdy. «Real» qımylǵa kóshkenin, balanyń talantyn, qazirgi medıınanyń kúshin aıtyp, aqyry kóndiredi. Oń sheshimdi estisimen Perdi alyp, dereý qonaqúıge tartady.
Leonyń La Masııadaǵy hıkaıasy bastalyp ketti. Alǵashynda, mundaǵy dúnıeler buǵan tańsyq kórinetin. Munda kelismen tek dop tebemin dep oılaǵan. Qaıdan, sabaq oqýy, erte turýy, jeke tapsyrma oryndaýy qajet eken. Onyń ústine katalan tilin úırenýi kerek. Akademııadaǵylar munyń kózinshe katalansha sóılesedi. 1-2 apta qonaqúıden qatynap turdy, keıinnen kampýsqa kóship keldi. Klýb basshylyǵy Horhege úı jaldap, jańa jumysqa ornalastyrdy. Leo apta sońynda ákesine baryp qaıtady.
Kampýsqa kelgesin, La Masııa tirshiligimen tolyq tanysty. Akademııa ańyzdarymen kezdesti. Ózimen qatarlastarynan bólek, úlken toptaǵy oıynshylarmen tildesti. Úlkenderden Havıdiń oıyn máneri qatty unady. Inestanyń ustamdylyǵyna qaıran qaldy. Ony bıiktetip turǵan sabyr men talant ekenin ańǵardy. Pýıol týraly aıtpasa da belgili. Myqty ári minezdi oıynshy. Qatarlastardan Fabregas, Býskets, Pıkeni jaqyn tartty. Ásirese, Pıkeni. Óıtkeni akademııadaǵy qyzyq pen shyjyqtyń bári Jerarmen baılanysty edi.
La Masııa oıynshylary túrli ádis-tásildi synap kóretin. Árkimge arnalǵan jeke jatyǵýlary taǵy bar. Akademııalar arasyndaǵy týrnırge daıyndyq qatań túrde júredi. Shákirtteriniń top jaratynyna kúmán joq bolsa da, trener tapsyrmasy taýsylmaıdy. Messıge ósý garmonyn tezdetetin ıne salý munda da jalǵasty. Dárýmen qabyldaý da toqtaǵan joq. Ol sonyń ózinde boıyndaǵy álsizdikti sezetin. Keıde match ortasynda alańnan ketip qalǵysy keletin. Osyny baıqaǵan Reshak Leoǵa arnap jańa aıla oılap tapqan. Leo kishkentaıynan shokoladty botonchıkti qatty jaqsy kóretin. Reshak ony kabınetine shaqyryp alyp: «Leo, seniń ár golyńa men bir shokoladty botonchık beremin. Qansha soqsań, sonshasy daıyn»,– deıdi. Kezekti bir boıynda Messı dýbl jasaıdy. Reshak qos botonchık beredi. Dándep alǵan Leo barynsha kóp gol soǵýǵa tyrysady. Karles bul amaldy qıyndatýdyń jolyn oılaıdy. Leoǵa « ár baspen soqqan golyńa qos shokoladtan beremin» deıdi. Endigi oıyndardy Reshak stadıonnan tamashalaýǵa arnaıy keledi. Birde Leo baspen gol soǵyp Reshakqa eki degen belgi beredi. Karles qaltasynan eki shokoladty botonchıkti kórsetedi. Syılyǵyn kórgen Leonyń kózi bal-bul janady.
Messıdiń La Masııadaǵy qalyptasýyna ár jattyǵýmen qatar, aınalasyndaǵylardyń da áseri bar. Onyń ústine komandada Messıden góri Vaskeske kóbirek senim artady. Rasymen, Vaskestiń denesi myǵym ári oıyn máneri jınaqy. Sodan ba Messı ár oıyn saıyn qatarlastaryn tańǵaldyrýǵa tyrashtanady. Árıne, nátıje joq emes. Akademııa ártúrli týrnırde baq synaıtyn. Leo kelgeli beri birinshilikti bermeıtin boldy. Kombınaııalary jarap tur. Bári jattyǵý kezindegideı ótedi. Týrnırlik kestedegi jaǵdaılary da táp-táýir.
Sońǵy kezde qarsylas komanda oıynshylary Messıge jıi shabýyldaıtyndy shyǵardy. Múmkindik bolsa, qulatyp ketýge daıyn. Kezekti bir soqqydan Leo eki aı boıy alańǵa shyqpady. «Barselonalyqtardyń (S)» týrnırdegi jaǵdaıy jaqsy, biraq alańǵa bir lep jetpeı turady. Kombınaııaǵa bir qýat kerek tárizdi. Jankúıerler de, komanda da Messıdi saǵynyp júrdi. «Espanolǵa (S)» qarsy kezdesýde Messı alańǵa shyqty. Ádettegideı jarqyn oıyn órnegin kórsetti. Munda da qulatýǵa qumarlar tabyldy. Leo qulasymen-aq, Pıke janyna jetip keldi. Espanoldyq jigitti ıterip, eregesip jatyr. Nátıjesinde, sary qaǵaz aldy. Jerar Messı úshin jıi soǵtyǵysyp qalatyn. Tipti sary qaǵaz kóptiginen kelesi oıynǵa qatysa almaıtyn. Messı de osyndaı «qorǵaýshysyna» erekshe iltıpat bildiretin. Áreketterine qarap Pıkeni «Papa Pıke» dep atap ketti. Jerardyń bul áreketi Messıdi basqalarynan artyq kórgeni emes, komandaǵa qajetin jete túsingennen edi.
La Masııalyqtar «Kamp-Noýǵa» baratyn kún týdy. Messı teńdessiz stadıondy kózben kórýdi burynnan armandap júrgen. Jaı matchqa emes, El-klasıkoǵa barady. Býskets ádettegiden erterek turdy. Messı Serıhıonyń ár taktıkany jete túsinetinine tańdaı qaǵatyn. Fabregas, Leolar oıyn kórgendi unata bermeıtin. Býskets oınaýǵa da, kórýge de qumar edi. Ol barlyǵyn kezek pe kezek oıatyp shyqty. Leo El-klasıkoǵa barýdyń ózi túrli etaptan turatynyn sonda baıqady. Bular stadıonǵa 2 saǵat buryn keldi. Messı erte kelýdiń mánin keıinnen túsindi. Oıynǵa 1 saǵat qalǵanda Barselona kóshelerinde qarbalas bastaldy. Kólik keptelisi, stadıon mańyndaǵy shý, bılet taba almaı júrgen jankúıer. Aınala azan-qazan boldy. Tańerteń Serhıonyń uıqydan oıatqanyna, ýaqytysymen jınalǵanyna ishteı qýandy.
Oıyn tamasha ótti. Match atmosferasy bólek-ti. «Kamp-Noýda» áýelegen gımn qandaı áserli. Qos klýbty qoldaýǵa kelgen jankúıerdiń sanynda shek joq sekildi. Perfomanstar kóz jaýyn alady. Kapıtannyń klýbty bastap shyqqany kóz aldynda qaldy. Ishine keıin men de kapıtan bolam dep túıip aldy. Oı jetegindegi Messıdi Pıke túrtip jiberdi.
– Qazir biz «Kamp-Noýdy» aralaımyz, qalasyń ba?
– Jattyqtyrýshynyń ruqsatynsyz ba?
– Túý, ne bopty. Eshkim bilmeı qalady. Kóp bop keldik qoı. Biz jylda osylaı isteımiz.
– Kim-kim qalady?
– Men, Býskets, Fabregas, Dıos, Valente, Danı, Vaskes. Qalasań, sen de barsyń.
–Jaraıdy, kórsek kóreıik.
Osylaısha, Pıke bastaǵan top «Kamp-Noýǵa» kishigirim ekspedıııa júrgizdi. Trofeıler turǵan bólmeden bastap, gazonǵa sheıin aralap shyqty. Eń qyzyǵy, «Kamp-Noý» gazonynda bastaldy. Gazon tóńireginde júrgende Pıke alańǵa shyǵyp kóreıik degen usynys tastady. Kópshiligi keliskenmen, Býsketsti kóndirý qıynǵa soqty. Aqyry, bári alańǵa shyǵatyn boldy. Pıke bárine gazondy jalańaıaq basýǵa keńes berdi. Sodan alańdaǵy arpalys bastalyp ketti. La Masııadaǵydaı emes, munda bári basqasha eken. Bári alańda qalaǵanyn istedi. Sharshaǵasyn ba, jantaıa ketti.
– Kóresińder, keıin biz osynda dop tebemiz. Árıne, bárimiz emes, birazymyz. Býskets, sen ortalyqtyń myqtysyna aınalasyń. Men saǵan qorǵanystan kómekke kelip turam. Fabregas ta bar ónerin salatyn bolady. Leo shabýylda bar soıqandy bastaıtyn bolady. Jigitter, biz «Kamp-Noýǵa» oıynshy bop oralamyz ǵoı. Solaı ma? – degen Pıkeniń áserli sózin kúzetshiler bóldi. Klasıkodan soń syrttaǵy abyr-dabyrdy áreń basqan olar stadıon ishine tekseris júrgizedi. Gazonda jatqan balalardy baıqap, alańǵa keledi. Ý-shý bastaldy. Nátıjesinde, jattyqtyrýshyǵa qońyraý shalyp, másele akademııa basshylyǵyna jetedi. Ertesine «ekskýrsııa múshelerin» jaza kútip turady.
Jaza retinde 15 aınalym júgirý berildi. Leo júgirýdi onsha unata bermeıtin. Ishinen Pıkeniń jer-jebirine jetkisi keldi. Alaıda keshegi áser úshin bárin keshirýge bar. Býskets únsiz júgirýdi bastap ketti. Fabregas, Pıke ile-shala qosyldy. Messı jaımen júgiristi bastady. Oıyn bólý úshin keshegi Jerar aıtqan sózdi esine túsirdi. Aldynda júgirip bara jatqandardy dosy emes, ataqty fýtbol juldyzy retinde elestetti. Bir kúni atalǵan jigittermen «Kamp-Noýda» dop tebetinin elestetti. Bularǵa da el-klasıkoda tamasha qoldaý bildiretin jankúıer tabylaryn oılady. Ózderin qýyp shyqqan kúzetshilerdiń keıin qoltańba surap kezekke turatynyn elestetip qoıady. Kenet oıyn aldymen «Barselona B-ǵa» qabyldaný kerektigi bóldi. Tek bir ózi emes, janyndaǵy dostarymen birge. Ol úshin ne isteý kerek? Josparyn jigittermen bólisý úshin, jyldamdyqty arttyrý qajet. Pıkeler alǵa uzap ketken. Messı barynsha júgirip keledi. Tek qana dostaryna emes, bolashaǵyna. Álemniń úzdik oıynshysy bolam, «Kamp-Noýda» dop tebem degen maqsatyna júgiredi.
Aızat Aıdarqyzy
arnaıy "Adyrna" ulttyq portaly úshin
