قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى قازاقستاندىق بانكتەردىڭ "مير" جۇيەسىنىڭ تولەم كارتالارىن پايدالانۋىنا رۇقسات بەرىلگەنىن مالىمدەدى، دەپ حابارلايدى “ادىرنا” ۇلتتىق پورتالى.
“2022 جىلعى 8 جەلتوقساندا رەتتەۋشىلەر اقش قارجى مينيسترلىگىنىڭ بولىمشەسى - شەتەلدىك اكتيۆتەردى باقىلاۋ باسقارماسىنان (OFAC) حات الدى، وندا امەريكاندىق ۆەدومستۆو "مير" جۇيەسىنىڭ بانك كارتالارىن جەكە تۇلعالاردىڭ، اتاپ ايتقاندا رەسەيدەن قازاقستانعا قونىس اۋدارعان ازاماتتاردىڭ كۇندەلىكتى ءومىر ءسۇرۋىن قامتاماسىز ەتەتىن وپەراتسيالار جاساۋ ءۇشىن پايدالانۋىنا قارسىلىق بىلدىرمەيتىنىن ءتۇسىندىردى", - دەلىنگەن قارجى رەتتەۋشىسىنىڭ رەسمي سايتىندا جاريالانعان حابارلامادا.
اتالعان حاتتا "مير" تولەم جۇيەسىمەن جاسالاتىن وپەراتسيالار رەسەيگە قارسى سانكتسيالاردى اينالىپ ءوتۋ ماقساتىندا پايدالانىلماۋى ءۇشىن ەرەكشە باقىلاۋدا قالاتىنى اتاپ وتىلگەن.
"وسىلايشا قازاقستاندىق بانكتەر "مير" كارتالارى بويىنشا تولەمدەردى، اۋدارىمداردى قابىلداۋعا، سونداي-اق جەكە تۇلعالار ءۇشىن بانكوماتتار ارقىلى قولما-قول اقشا بەرۋدى جۇزەگە اسىرۋعا قۇقىلى. بۇل رەتتە "مير" جۇيەسىنە قوسىلۋ تۋرالى شەشىمدى قازاقستاندىق بانكتەر وزدەرىنىڭ دامۋ ستراتەگيالارى مەن تاۋەكەلدەردى باعالاۋدىڭ ىشكى جۇيەلەرى نەگىزىندە دەربەس قابىلدايدى", - دەلىنگەن حابارلامادا.
