Belgili dızaıner Aıda Kaýmenova jelidegi paraqshasyna bokser Angelına Lýkastyń qazaqtyń ulttyq kıimin jalańash denesine kıip, face-to-face rásimine qatysqan vıdeosyn jarııalady. Alaıda bul kóptiń ashýyn týǵyzdy, dep habarlaıdy “Adyrna” ulttyq portaly.
Bul týraly tarıhshy-etnolog, jýrnalıst Turar Sáttarqyzy Facebook paraqshasyna pikirin bildirdi.
“Netken namyssyz ult edik. Qorlanbaǵan nemiz qaldy, osy?!
Naǵyz qazaqtyń myqty qyzy,-dep jatyr eken myna soraqylyqty belgili dızaıner Aıda Káýmenova. Aıda, ulttyń, qazaq qyzynyń tazalyǵy men adaldyǵynyń, uıaty men arynyń sımvoly bolǵan sáýkelesin qorlap, tyrdaı jalańash qyzǵa kıgizip, naǵyz qazaq qyzy deýińiz, ar men uıatty bárinen bıik qoıatyn, barsha qazaq qyzdarynyń namysyn taptaǵanyńyz.
Qazaq qyzy qashan ulttyq kıimdi jalańash denesine kıgen eken? Sakraldy mańyzy bar ulttyq oıý-órnektiń kıesi bar degen ult emes pe edik?!”,- dedi jýrnalıst.
Sondaı-aq, ol joǵarydaǵylarǵa úndeý tastap, ultttyq qundylyqtarymyzdy qorǵaıtyn zań keregin basa aıtty.
“El qalaýlylary bolyp júrgen depýtat myrzalar, hanymdar!
Qashanǵy ult sımvoldaryn osylaı qorlaýǵa jol bere beremiz? Namystaryńyz bar ma, ózi? Ult qundylyǵyn qorǵaı almasaq, nesine ult bolyp júrmiz? El erteńine alańdasaq, ultttyq qundylyqtarymyzdy qorǵaıtyn zań kerek!
Ana bir jyly Shyryn degen qarshadaı qyz qazaq kıimin kúlki qyldy. Ótkende Mýharıapov degen tilimizdi qorlady. Endi mine, ulttyq kıimderdi tigip dáripteıtin, sodan kásibin dóńgeletip otyrǵan ulty qazaq Aıdanyń jasap otyrǵany mynaý?
Aıda hanym, ulttyń dúnıeniń qadir-qasıetin bilmeseńiz, boıyńyzda qazaqy namys bolmasa, jasap júrgen isińizdi qoıa salyńyz. Álde sizge ulttyq dúnıe kásiptiń kózi ǵana ma?
Aý, aǵaıyn, kim kóringen tól teńgemizdi taptaıdy, týymyzdy, ulttyq kıimimizdi qorlaıdy, myńq etpeıtin netken halyq edik?! Ózge bizdi syılasyn desek, ózimizdikin qurmetteýimiz kerek emes pe? Ózge jurtqa ábden masqara bolǵansha,namystan neǵyp ólip ketpeımiz?!
Aıda Káýmenovanyń paraqshasynda naǵyz qazaq qyzy degen vıdeosyn kórińizder, jaýap berińizder.
Namys qaıda, jurtym?!
Men namysty bárinen bıik qoıatyn qazaqtyń qyzymyn, sondyqtan Aıda Káýmenovanyń ultymyzdyń kıimin qorlaǵany úshin jaýap bergenin talap etemin”, -dep jazdy Turar Sáttarqyzy.
