الماتىداعى «Zara» دۇكەنىنىڭ قىزمەتكەرلەرى قازاقشا قىزمەت كورسەتۋدەن باس تارتتى. بۇل تۋرالى جەلى قولدانۋشىسى قۇرالاي باۋىرجانقىزى جازدى، دەپ حابارلايدى «ادىرنا» ءتىلشىسى.
«نامىسىم جەر، جىگەرىم قۇم بولدى. «Zara» دۇكەنىنىڭ بالالار بولىمىندە قازاقشا جاۋاپ سۇراپ، ءوز جەرىمىزدە ءوز تىلىمىزدە سويلەگەنىمىز ءۇشىن جازىقتى بولدىق. كارىس بالانى قازاق ەكەن دەپ، "قازاقشا ايتا بەر" دەپ قالدىق، اڭگىمە سودان باستالدى. "ماعان ورىس تىلىندە ىڭعايلى",— دەيدى الگى جىگىت. "ەندى بىزگە قازاقشا ىڭعايلى، ءسىز ءتۇسىنىپ تۇرسىز عوي، ايتا سالمايسىز با، قانشا بولدى؟"— دەسەك، "ماعان وسىلاي ىڭعايلى”،—دەيدى. وندا ءتىل بىلەتىن ادامدى شاقىر دەدىك. سول جەردىڭ اكىمشىسى كەلىپ، وزىمىزگە تاپ بەردى»،—دەپ جازدى ول.
اكىمشى قىز «ءبىز حالىقارالىق كومپانيامىز. قىزمەتكەرلەرىمىز قاي تىلدە سويلەسە دە ءوزى بىلەدى» دەپ اقتالعان.
«ءتىپتى دۇكەندە قازاقشا سويلەي الماساق، قايدا بارىپ سويلەيمىز؟ قاشان سويلەمىز؟ تەك وت باسى، وشاق قاسىندا ما؟ بۇيتە بەرسەك، قازاق ءتىلى "كەدەيلەر ءتىلى", "دوماشني تاپىشكە" دەگەن مازاقتان قاشان قۇتىلادى؟!
ەڭ جامانى، ءبىزدىڭ قۇقىمىزدى قورعايتىن، ءسوزىمىزدى سويلەيتىن ەشكىم جوعىن ءتۇسىنىپ، ءوزىمىزدى جەتىم سەزىنىپ شىقتىق...»—دەپ جازدى قۇرالاي باۋىرجانقىزى.
وقىرمانداردىڭ كەيبىرۋى قازاق ءتىلىن تالاپ ەتۋشى دە قاتتى ايتتى دەپ جازىپ جاتىر. وعان ول كىسى تومەندەگىدەي جاۋاپ بەردى:
“ۆيدەو سوڭىندا "جاپ اۋزىڭدى!" دەپ حورمەن ايقايلاعانىمىز قىزعا ەمەس،"ۆىپروۆوديتە يح!" دەگەن جىگىتكە سولاي جاۋاپ بەردىك. ول تۋ سىرتىمىزدا تۇرعاندىقتان، داۋىسى ەستىلمەي قاپتى كامەرادا، ءبىز ەستىدىك تە رەاكتسيا جاۋاپ بولدى بىردەن.ءوزى قۇقىمىزدى تاپتاۋىمەن قويماي، قۋىپ سالماقشى. سوندىقتان، ول قاي تىلدە سويلەسە، سول تىلدە جاۋاپ بەرىلدى. مەنىڭ ءتىلىمدى قۇرمەتتەمەگەن ادامعا سىزىلىپ مادەنيەت ساقتار جايىم جوق ەكەن”،—دەپ ءتۇسىندىردى جەلى قولدانۋشىسى.
