الەۋمەتتىك جەلىدە رەسەي كينوسىنىڭ شاشباۋىن كوتەرىپ، ورىس تاريحىن ۇلىقتاعان فيلمگە ۇستازدارى "الدىنا سالىپ، دەدەكتەتىپ اپارعان" الماتىلىق ءبىر توپ وقۋشىنىڭ ۆيدەوسى تارادى. بۇل قوراش جايتتى "arbat.media" ءجۋرناليسى حابارلادى، دەپ جازدى "ادىرنا" ۇلتتىق پورتالى.
7 جەلتوقسان كۇنى الماتىنىڭ "تسەزار" كينوتەاترىندا تمد ەلدەرىنىڭ "ەۋرازيا.doc" دەرەكتى كينوفەستيۆالىنىڭ تۇساۋكەسەرى ءوتتى. ءىس-شارادا كورەرمەندەرگە كورشى مەملەكەتتىڭ "رەسەي. ءبىز 30 جاستامىز" ءفيلمى كورسەتىلدى.
بۇعان دەيىن قازاق ەلىنىڭ ازاماتتارى ورىس تاريحىن اسپەتتەگەن ءفيلمنىڭ قازاق ەلى ءۇشىن قاجەتى جوعىن ايتىپ، باس كوتەرگەن ەدى. بىراق وقۋشىلار ماقساتتى تۇردە زالدى تولتىرۋ ءۇشىن مەكتەپتەن كينوتەاترعا جىبەرىلگەن. جوسىن جاعدايدىڭ انىق-قانىعى جايلى "arbat.media"-نىڭ ءجۋرناليسى باياندادى.
- فيلم كورسەتىلە باستاعانعا دەيىن زال بوس بولدى. اندا-مىندا جاس جىگىتتەر مەن بىرنەشە ورتا جاستاعى ايەلدەر وتىردى7 بىراق 10 مينۋتتان كەيىن، جينالعاندار ءوز كوزىنە ءوزى سەنبەدى. مەكتەپ فورماسىنداعى بالالار توپىرلاپ كەلىپ، بىرىنەن سوڭ ءبىرى زالعا كىرە باستادى.
بارلىق وقۋشىلار سىنىپ جەتەكشىسىمەن بىرگە كەلدى. بۇل ارنايى "دەلەگاتسيانىڭ" N132 مەكتەپ-گيمنازياسىنان ەكەنى انىقتالدى. مۇعالىمىنەن قىسقا سۇحبات الدىق. ونىڭ ايتۋىنشا، بۇگىنگى كورسەتىلىمگە ورىس تىلىندە وقىتاتىن 8-سىنىپ وقۋشىلارى كەلگەن. مۇعالىمنىڭ ءوزى ءفيلمنىڭ بالالار ءۇشىن پايدالى ەكەندىگىن ايتىپ وتىر، - دەپ جازدى جۋرناليست.
ءجۋرناليستىڭ قويعان ساۋالىنا الماتىداعى N132 مەكتەپ-گيمنازياسىنىڭ ورىس بولىمىنە ساباق بەرەتىن وقىتۋشى:
- مۇندا 10 ادامنان تۇراتىن ەكى سىنىپ بار. بىزگە فەستيۆالگە بارۋ، پرەزەنتاتسيانى قاراۋ كەرەكتىگى ايتىلدى. قىزىقتى بولادى دەپ ۇمىتتەنەمىز، اسىرەسە بالالار ءۇشىن... مۇندا 8-ءشى ورىس سىنىبى وتىر. مۇنداي بۇيرىق گيمنازيا ديرەكتورىنان كەلىپ ءتۇستى، - دەپ جاۋاپ قاتتى.
سونىمەن قاتار، بەيرەسمي دەرەكتەرگە سەنسەك، مۇنداي فەستيۆالگە "تۇران" ۋنيۆەرسيتەتى مەن "تسەزار" كينوتەاترى قولداۋ كورسەتكەنى دە ايتىلىپ وتىر.
"ادىرنا" ۇلتتىق پورتالى
