شىمكەنتتە بيىلعى جىلىتۋ ماۋسىمى 20 قازاننان باستالعان بولاتىن.
قازىرگى كەزدە قالاداعى 1987 كوپ قاباتتى تۇرعىن ءۇي مەن 484 بيۋدجەتتىك مەكەمە جىلىتۋ جۇيەسىنە 100% قوسىلدى. بارلىعى «قۋاتجىلۋورتالىق-3» مكك تاراپىنان ورتالىقتاندىرىلعان.
جىلۋدى قوسۋ جۇمىستارى كەزىندە مىنا جايتتاردى نازارعا الۋعا شاقىرامىز!
قر ەنەرگەتيكا ءمينيسترىنىڭ 2014 جىلعى 18 جەلتوقسانداعى بۇيرىعىنا سايكەس، «قۋاتجىلۋورتالىق-3» مكك كوپپاتەرلى ۇيدەگى ەلەۆاتور تورابىنىڭ ءبىرىنشى فلانەتسىنە، ياعني جەرتولەگە دەيىن جىلۋمەن قامتاماسىز ەتۋگە جاۋاپتى. ال ىشكى كوممۋنيكاتسيالار – تۇرعىنداردىڭ ورتاق مەنشىگى.
سوندىقتان تۇتىنۋشىلار جىلۋ جۇيەلەرىنىڭ قاۋىپسىزدىگىن ساقتاۋعا، پاتەر ىشىندەگى جاتىق جانە تىك قۇبىرلاردىڭ اۋاسىن شىعارۋعا، جىلۋ قارىزىن ەسەپتەپ، ونى وتەۋگە جاۋاپتى. بۇعان سالعىرت قاراماۋلارىڭىزدى وتىنەمىز!
