سونىمەن يت قىر استى، دوڭىز جىلى بوساعادان ءوتىپ، قوسوبادان قيدى. وتكەن جىلى نە ىستەدىك، باعىنعانىمىز كىم، ساعىنعانىمىز نە-دەگەن سۇراقتار ساعادان قۇلاپ، جاعادان الادى!
جىل ەكونوميكاسى
«ءبىرىنشى ەكونوميكا، ساياسات سودان سوڭ» -دەگەن پرەزيدەنت ءسوزى سارى اۋىلدىڭ جاعال سامايىنداي ساڭعىرىقتانىپ، سۋىپ، سولىپ، مازاق تەكتەس ەستىلەدى. وكىمەت وتىرىسىندا تيمۋر سۇلەيمەنوۆ 2018 جىلعى ىشكى ونىم ۇلەسى 3,8 پايىز ەكەنىن ايتتى. مەملەكەت ءوزىن اسىراۋ نەمەسە نولدىك مەجەدەن اسۋ ءۇشىن 12 پايىز قاجەت ەكەنىن قارجى سالاسىنان حابارى باردىڭ ءبارى بىلەدى. ايدىندى اقپاراتتاردى ينفلياتسيا جۇتىپ قويدى. رەسمي تۇردە تەڭگە قۇنسىزدانۋى 3,7 پايىز دەلىنسە دە، قانتتىڭ 20 پايىزعا، ىرىمشىكتىڭ 10, كونسەرۆىلەنگەن ءسۇتتىڭ 9 پايىزعا وسكەنى كوپ كۇدىككە تىزگىن بەرەدى. بۇعان قوسا "ەكسيمبانك", "قازاق", "استانا" بانكتەرىنىڭ بانكروتقا ۇشىراۋى قارجىلىق قاۋقارىمىزدىڭ، قاعاز بەتىندەگى ادەمى تسيفرلارىنىڭ سايكەسسىزدىگىن كورسەتتى.
جىل ساياساتى
ال ساياسي الاڭداعى كەمەل جەڭىستەرىمىز تەلەديدار بەتىنەن اسپادى.كورشى ەلدەگى ەكس-پرەزيدەنت اتامباەۆ مالىمدەمەسى، تازدىڭ باسىنداعى تىماعىن الا قاشقانداي-ىڭعايسىز جاعدايدا قالدىردى.سورلاعان شەكاراداعى جۇرگىزۋشىلەر بولدى. بۇعان قوسا بۇۇ-داعى قاۋىپسىزدىك كوميتەتى توراعاسى بولعانىمىز، سوندا ۇستانىم كودەكسىن قابىلداتقانىمىز قۇلاق تالدىرا ايتىلدى. تىم تۇسىنىكسىزى وسى جۇرىستەردە قانشا اقشامىزدى شىعىنداعانىمىزدىڭ ءبارى قۇپيا قالدى. جەتپىس مەملەكەت قول قويعان كودەكسكە قالعان جۇرت نەگە قولداۋ كورسەتپەگەنى دە مەن ءۇشىن جۇمباق. وسى جىلدىڭ تاعى ءبىر ەرەكشەلىگى - قۋعىنعا ۇشىراعان كوك شارلار بولدى. دومبىراسىنىڭ شاناعىنا قورعاسىن قۇيعانداي، كوك شارلارعا رەسمي تۇردە تيىم سالىندى، پاراسات پەن فارس مايدانىندا اقىل اياققا جىعىلدى. بۇۇ-نىڭ جاھاندىق كونترتەرروريستىك ستراتەگياسى ءۇشىن ءۇش ءجۇز مىڭ دوللار ءبولىندى دە، سيرياداعى گەندەرلىك ساياساتتىڭ دامۋىنا اقشا بەرىلۋ قاجەت دەپ ايتىلدى.
جىل تراگەدياسى
"مەن قازاقپىن",- دەپ جۇرگەن دەنيس تەن كىسى قولىنان قازا تاپتى.ءارتۇرلى تۇجىرىمدار ايتىلسا دا، كۇمانى كوپ وسى ءولىم جاس پەن كارىنىڭ بولاشاققا دەگەن سەنىمىن شايقالتىپ كەتتى. ۇلكەن سپورتتا مول ماسەلە بارى تانىلدى. سەمەيدەگى كومىر كەنىشىندەگى الەم چەمپيونى قازاسى دا وسىنى ايعاقتادى.
جىل اقىنى
شىن تالانت، قارا سوزدەن سارى ۋىز العان تىنىشتىقبەك اعا ابدىكاكىموۆتىڭ مەملەكەتتىك سىيلىق العانى-ءسوزدىڭ سۇبەسىنە، جىر سۇيەردىڭ ۇلەسىنە بەرىلگەن باعا بولدى. بۇعان قوسا استاناداعا رينات ورامدارى، الاش زار كۇيىنە قوسىلعان بوزداۋلى بوز قايعىنى قوزعادى.
جىل فەنيكسى
ەۋروپاداعى ۇزاق ۇيقىداعى، ۋاقىتتىڭ قالىڭ كورپەسىنە ورانعان اكەجان قاجىگەلدين ءبۇرتۇلى ويانىپ، "جاڭا قازاقستان" اتىنان مالىمدەمە جاسادى. ۇيقىداعى بۇركىتتى، قاي جاپالاق ۇركىتتى...
جىل ءارتىسى
بۇل داۋسىز ديماش. باسىندا ميكس، كەيىن يكس دەگەندەر ءۇنسىز قالىپ، رەسەي مويىنداي قول سوقتى. بىزدەگى كونكۋرستاردىڭ تۇككە تۇرماسىن تاعى دالەلدەدى ديماش.
جىل اكتريساسى
التى جىل تۇسىرىلگەن "ايكا" فيلمىندەگى سامال ەسلياموۆا كانندى مويىنداتتى. بىزدەگى "كوچەۆنيك", "مونعول" تۇسىرىلىمدەرىنە كەتكەن قىراۋىر اقشانىڭ وبالىن جوقتاعانداي سامال قىز ۇلت كيىمىمەن الەمدى تاڭ جاسادى. باياننىڭ "بايانىن" ۇيالتىپ.
جىل وتستاۆكاسى
پرەزيدەنتتىڭ ەجەلگى سەرىگى، قىزمەتتەرى قاعازعا سيماس جاقسىبەكوۆ زەينەتكە كەتتى. بالاما قىزمەتسىز. سوعان قاراعاندا كومبە كورىنە باستاعانداي...
جىل جول اپاتى
استانا كوشەسىندەگى ولجاس سۇلەيمەنوۆتىڭ نەمەرەسىنىڭ ءولىمى، جىل سوڭىندا الماتىداعى دۇنگەن اۆارياسى-بۇل ماسەلەنىڭ شەكتەن شىققانىن كورسەتتى. تىزگىنسىز كەتكەن ماجورلار-اجال بولىپ جۇيىتكۋدە... بۇل ءبىز كورگەن يت جىلى. جاڭا جىلدارىڭىزبەن!
سەرىك ەلىكباي،كەرەكۋ
