شىمكەنت قالاسىنىڭ ەڭبەكشى اۋدانىندا رەسپۋبليكا كۇنى مەرەكەسى اتالىپ ءوتتى. مەرەكەلىك ءىس-شارا 12 شاعىناۋداندا جاڭادان اشىلعان ەرەكشە ۇلگىدەگى گۇلزاردا ۇيىمداستىرىلدى.
ەڭبەكشى اۋدانىنىڭ اكىمى دوسبول ەسىلبەك كوپشىلىكتى ۇلتتىق مەرەكەمەن قۇتتىقتاپ، ەلىمىزدىڭ قارىشتاپ دامىپ، تولاعاي تابىسقا جەتۋى – حالقىمىزدىڭ ىنتىماعى مەن بىرلىگىنىڭ جەمىسى ەكەنىن اتاپ ءوتتى. ءىس-شارادا شاhاردىڭ الەۋمەتتىك-مادەني دامۋىنا ۇلەس قوسقان اۋدان تۇرعىندارى "ەرەن ەڭبەگى ءۇشىن" مەدالىمەن، اۋدان اكىمىنىڭ العىس حاتىمەن ماراپاتتالدى.
ەگەمەندىك تويىندا وبلىستىق فيلارمونيا انشىلەرى جينالعان كوپشىلىككە مەرەكەلىك كونتسەرتىن ۇسىندى.
ايتا كەتسەك، تاياۋدا حالىق يگىلىگىنە بەرىلگەن دەمالىس ورنى كوپقاباتتى بىرنەشە ءۇيدىڭ اۋلاسىن ورتاق كومپوزيتسياعا بىرىكتىرگەن. مۇندا تۇرعىندار ءۇشىن بارلىق جاعداي جاسالعان.
