«قازاقستان رەسپۋبليكاسىنىڭ پرەزيدەنتى تۋرالى» قازاقستان رەسپۋبليكاسى كونستيتۋتسيالىق زاڭىنىڭ 17 جانە 21-باپتارىنا سايكەس جانە قوعامدى ودان ءارى دەموكراتيالاندىرۋ، ەلدە جۇرگىزىلىپ جاتقان رەفورمالار تۋرالى حالىقتى حاباردار ەتۋ، جەرگىلىكتى اتقارۋشى ورگانداردىڭ اشىقتىعىن، جاۋاپكەرشىلىگىن، ەسەپتىلىگىن ارتتىرۋ ماقساتىندا قاۋلى جاريالاعان بولاتىن.باس قۇجاتتىڭ اياسىندا بارلىق دەڭگەيدەگى اكىمدەر جىل بويى حالىقپەن كەزدەسۋلەر وتكىزىپ، ولاردىڭ بارىسىندا حالىقتى تولعاندىراتىن الەۋمەتتىك ماسەلەلەرگە باسا نازار اۋدارا وتىرىپ، قازاقستاندى جاڭعىرتۋدىڭ جاڭا باعدارىنىڭ نەگىزگى باعىتتارى تۋرالى حاباردار ەتسىن جانە پروبلەمالىق ماسەلەلەردى شەشۋدىڭ جولدارى مەن مەرزىمدەرىن ءتۇسىندىرۋ مىندەتتەلگەن ەدى. وسىعان سايكەس، الماتى شاھارىنىڭ اكىمىنىڭ حالىقپەن كەزەكتى كەزدەسۋى تۇركسىب اۋدانىندا ءوتتى، دەپ حابارلايدى «ادىرنا» ءتىلشىسى.
قالا باسشىسى اۋداننىڭ دامۋى جانە تۇرعىنداردان تۇسكەن ۇسىنىستار بويىنشا اتقارىلعان جۇمىستار جايلى ايتتى. كەزدەسۋگە 200-دەن استام ادام قاتىستى.
اۋداندا ينجەنەرلىك جەلىلەردى جاڭعىرتۋ ماسەلەسى وزەكتى ماسەلە بولىپ قالا بەرەدى. بيىل جىل باسىنان بەرى 71,6 كم ينجەنەرلىك جەلى سالىندى، جۇمىس اياقتالعان سوڭ 20 مىڭنان استام تۇرعىنعا ورتالىق كوممۋنيكاتسيالارعا قوسىلۋعا مۇمكىندىك بەرەدى. سونىمەن قاتار، جىل سوڭىنا دەيىن 3 كارىز سورعى ستانتسياسىنىڭ قۇرىلىسى اياقتالادى. بۇعان قوسا، سۋمەن جابدىقتاۋ بويىنشا تاعى 64,4 كم جەلى قۇرىلىسىنا جوبالاۋ-سمەتالىق قۇجاتتاماسى الىندى.
اۋداندى تۇراقتى ەلەكتر قۋاتىمەن قامتاماسىز ەتۋ ءۇشىن «شۋاقتى» ىقشاماۋدانىندا 5,5 شاقىرىم ەسكى ەلەكتر جەلىسى مودەرنيزاتسيالانىپ، ونىڭ 95%-ى رەكونسترۋكتسيادان ءوتتى.
2023 جىلدىڭ باسىندا «المەرەك» جانە «قايرات» ىقشاماۋدانىندا ەلەكتر جەلىلەرىن رەكونسترۋكتسيالاۋ باستالادى. «تۇزدىباستاۋ» قوسالقى ستانتسياسى سالىنۋدا، بۇل جۇمىستار 2023 جىلدىڭ ماۋسىم ايىندا اياقتالادى دەپ كۇتىلۋدە.
اكىممەن ماۋسىم ايىنداعى الدىڭعى كەزدەسۋدە جاحانگەر كوشەسىندەگى 22 ءۇيدى ەلەكترمەن جابدىقتاۋ ماسەلەسى كوتەرىلگەن ەدى. قازىرگى تاڭدا جاڭا ەلەكتر جەلىسىن سالۋ جۇمىستارى اياقتالدى. تۇرعىندار قالالىق جەلىگە قوسىلعان جانە ۇزدىكسىز ەلەكتر قۋاتىمەن قامتاماسىز ەتىلگەن.
ماگيسترالدىق كوشەلەر بويىنشا كوشە جارىعى جەلىلەرىن مودەرنيزاتسيالاۋ اياقتالىپ، جىل سوڭىنا دەيىن تۇركسىب اۋدانى كوشەلەرىنىڭ 90%-ى جارىقپەن قامتىلادى.
اۋداندا جول ينفراقۇرىلىمىن جانە قوعامدىق كولىكتى دامىتۋ ماسەلەسى بويىنشا ۇزىندىعى 9 كم 17 كوشە جوندەلدى. جالپى اۋدانى 20 مىڭ شارشى مەتر 89 كوشە اعىمداعى جوندەۋدەن ءوتتى، ۇزىندىعى 9 كم 11 كوشەگە تروتۋارلار سالىنىپ، جوندەلدى.
مەكتەپتەگى ورىن تاپشىلىعىن ازايتۋ ءۇشىن №59 مەكتەپ-گيمنازيا عيماراتىن رەكونسترۋكتسيادان وتكىزىپ، 900 ورىنعا كوبەيتۋ قاراستىرىلعان. كەلەسى جىلى اۋدانداعى ەكى مەكتەپتە 1050 ورىندىق قوسىمشا قۇرىلىس باستالادى.
مەديتسينالىق قىزمەت كورسەتۋدىڭ قادامدىق قولجەتىمدىلىگىن قامتاماسىز ەتۋ ءۇشىن جەلتوقسان ايىندا «نۇرشاشقان» ىقشاماۋدانىندا كۇنىنە 100 كەلۋشىنى قابىلدايتىن دارىگەرلىك امبۋلاتوريانىڭ قۇرىلىسى باستالادى. 2023 جىلدىڭ I توقسانىندا ايباسوۆ كوشەسىندەگى اۋىسىمىنا 200 ادام قابىلدايتىن تاعى ءبىر دارىگەرلىك امبۋلاتوريا سالۋ جوسپارلانىپ وتىر.
بۇعان قوسا، قالا اكىمىنىڭ م.ا. ەربولات دوساەۆ اۋداننىڭ قوعامدىق قاۋىپسىزدىگىن قامتاماسىز ەتۋ شارالارىنا توقتالدى. جىل سوڭىنا دەيىن 174 مەكەنجايدا 322 بەينەباقىلاۋ كامەراسى ورناتىلادى. 2023 جىلدىڭ ءساۋىر ايىندا 96 مەكەنجايدا تاعى 448 «سەرگەك» كامەراسىن پايدالانۋعا بەرۋ جوسپارعا ەنگەن.
«حالىق قاتىساتىن بيۋدجەت» باعدارلاماسى بويىنشا اۋداندا بارلىق جوسپارلانعان 28 جوبا ىسكە اسىرىلدى: 14 اباتتاندىرۋ ورنى، 10 بالالار جانە سپورت الاڭدارى، 4 كونتەينەرلىك الاڭ.
الماتى اكىمىنىڭ م.ا. كەزدەسۋ بارىسىندا تۇرعىندار جولداردى، كارىز جانە ەلەكتر جەلىلەرىن جوندەۋ، اباتتاندىرۋ جانە ت.ب. ماسەلەلەردى كوتەردى.
