بۇگىن شىمكەنت قالاسىنىڭ اكىمى تۇركيالىق «Coca-Cola İçecek» كومپانياسىنىڭ الماتى قالاسىنداعى ديرەكتورى مۋستافا بەلتەكينمەن كەزدەستى.
ءۇشىنشى مەگاپوليس مۇمكىنشىلىكتەرىن اتاپ وتكەن شاھار باسشىسى كومپانيا وكىلىنە شىمكەنتتەن وسى سۋسىنداردى وندىرەتىن ارنايى ءوندىرىس ورنىن اشۋ ءۇشىن بارلىق جاعدايدىڭ بار ەكەندىگىن ايتىپ، شىمكەنتتىڭ سالالىق مۇمكىنشىلىكتەرىنە توقتالدى.
قالا باسشىسى ءوز سوزىندە بيىلعى جىلى اۋدانى 306 گەكتاردى قۇرايتىن «جۇلدىز» جاڭا ءۇشىنشى يندۋستريالىق ايماعىنىڭ قۇرىلعانىن، قازىرگى تاڭدا ينجەنەرلىك جەلىلەردى تارتۋ جۇمىستارى جۇرگىزىلىپ، قۇرىلىس جۇمىستارىنىڭ تاياۋدا اياقتالاتىنىن العا تارتتى. ينۆەستورلارعا ۇزاق مەرزىمگە جالعا بەرىلەتىن تەگىن جەر تەلىمدەرى، دايىن ينفراقۇرىلىمدار مەن كوممۋنالدىق قىزمەتتەرگە تاريفتەر تومەندەتىلگەنىن دە جەتكىزدى.
«بۇگىنگى كەزدەسۋ ەكى جاقتى ىنتىماقتاستىققا سەپتىگىن تيگىزىپ قانا قويماي، شىمكەنتتەگى جاڭا ينۆەستيتسيالىق جوبانى جۇزەگە اسىرۋدىڭ العى شارتى بولاتىنىنا سەنىمىم مول»،-دەدى ول.
«Coca-Cola İçecek» كومپانياسىنىڭ وكىلى اكىمدىك تاراپىنان ارنايى جەر تەلىمى جانە ينفراقۇرىلىممەن قامتىلۋ جاعىنان قولداۋ بولسا، ينۆەستيتسيا قۇيۋعا ءازىر ەكەندىكتەرىن جەتكىزدى.
