شىمكەنت قالاسىنىڭ ءال-فارابي كىتاپحاناسىندا زيالى قاۋىم وكىلدەرى مەملەكەت باسشىسى قاسىم-جومارت توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىن ءسوز ەتتى. جيىنعا قاتىسۋشىلار ءوز ويىمەن ءبولىسىپ، جولداۋدا ايتىلعان ءار باعىتتى كەڭىنەن تارقاتتى.
«امانات» پارتياسىنىڭ قاراتاۋ اۋدانى فيليالىنىڭ اتقارۋشى حاتشىسى ابدەز راحمانۇلىنىڭ ايتۋىنشا، بۇل جولعى جولداۋدا حالىقتىڭ الەۋمەتتىك ماسەلەسى مەن بالالاردىڭ بولاشاعىن ينۆەستيتسيالاۋدىڭ تىڭ ادىستەرى ۇسىنىلدى. سونىمەن بىرگە الداعى كەزەكتەن تىس سايلاۋدىڭ ماڭىزدىلىعىنا توقتالدى.
– ماۋسىم ايىندا جالپىحالىقتىق رەفەرەندۋمدا زاڭعا وزگەرىس ەنگىزۋ ءۇشىن داۋىس بەردىك. كوپ ۇزاماي ەڭ العاشقى وزگەرىس پرەزيدەنت جولداۋىندا كورىنىس تاپتى. مەملەكەت باسشىسى جەر مەن ونىڭ قويناۋىنداعى بايلىق حالىققا تيەسىلى ەكەنىن اتاپ ءوتتى. 2024 جىلدان باستاپ ۇلتتىق قوردىڭ ينۆەستيتسيالىق ءتۇسىمىنىڭ 50 پايىزى بالالاردىڭ جەكە شوتىنا اۋدارىلىپ وتىراتىن بولدى. بولاشاقتا وسى قارجىنى 18-گە تولعان ءاربىر جاس ساپالى ءبىلىم مەن باسپانا الۋعا جۇمسايدى. بۇل وركەنيەتكە بەت العان ەل ءۇشىن وتە دۇرىس شەشىم. الەمدىك تاجىريبەدە 5 جىل جۇمىس ىستەگەن كومپانياعا ەل سەنىممەن قارايدى ەكەن. ال، مەملەكەتتىك باسقارۋدا ۇلتتىق دەڭگەيدەگى جوبالاردى جۇزەگە اسىرۋعا 7 جىل قاجەت ەكەنىن ساراپشىلار ايتۋدا. ەلىمىزدە پرەزيدەنت تەك 1 رەت 7 جىلعا سايلانۋى دا حالىقتىڭ ءال-اۋقاتىن كوتەرىپ، ەكونوميكانى دامىتۋعا جەتكىلىكتى دەپ ويلايمىن، - دەدى ءا.راحمانۇلى.
ال، ءال-فارابي اتىنداعى كىتاپحانانىڭ ديرەكتورى انار جاپپارقۇلوۆا دامۋدىڭ ءار سالاسىن بۇگە-شەگەسىنە دەيىن قامتىعان سالماقتى جولداۋ بولعانىن جەتكىزدى.
– ادىلەتتى مەملەكەت دەگەندە تەك قۇجات جۇزىندە ورىندالاتىن ىستەر بولاتىن. قازىر كۇننەن-كۇنگە ورىن الىپ جاتقان وزگەرىستەر مەن جاعىمدى جاڭالىقتاردىڭ كۋاسى بولعاننان كەيىن شىن مانىندە جاڭا مەملەكەت قالىپتاسىپ جاتقانىنا وتە قۋانىشتىمىز، - دەدى ول.
«شىمكەنت كەلبەتى» «پانوراما شىمكەنتا» گازەتەرىنىڭ باس رەداكتورى باقتيار تايجان بيىلدىڭ وزىندە كوپتەگەن يگى ىستەر ىسكە اسىرىلىپ، حالىققا قولايلى ورتا قالىپتاسقانىن ايتتى.
–الەمدە جەر كولەمى جاعىنا 9 ورىندا تۇرعان ەلىمىزدە مال شارۋاشىلىعى اقساپ تۇرعانى جاسىرىن ەمەس. ەتتى برازيليادان يمپورتتاۋدىڭ ءوزى وسىعان دالەل. بيىل پرەزيدەنتتىڭ تاپسىرماسىنا سايكەس يگەرىلمەي جاتقان اۋىل شارۋاشىلىعى ماقساتىنداعى 2,9 ميلليون گەكتار جەر مەملەكەت يەلىگىنە قايتارىلدى. وسى جىلدىڭ سوڭىنا دەيىن 5 ملن. جەردى قايتارۋ جوسپارلانىپ وتىر. كەلەسى جىلدىڭ سوڭىنا دەيىن مەملەكەت باسشىسى تاعى 10 ملن. گەكتار يگەرىلمەي نەمەسە زاڭسىز بەرىلگەن جەردى مەملەكەتكە قايتارۋدى تاپسىردى. وسى قايتارىلعان اۋىل شارۋاشىلىعى جەرلەرى مال ءوسىرىپ وتىرعان شارۋالارعا بەرىلسە، ءبىزدىڭ ەلدە ەت پەن ءسۇت ونىمدەرىنىڭ يمپورتى توقتار ەدى، - دەيدى ب.تايجان.
ال، جۋرناليست زاۋرە ورالباەۆا ايتۋىنشا، ادىلەتتى قوعام قۇرۋ ءۇشىن ەڭبەك ادامىنىڭ ىستەرى ەلەنۋى كەرەك.
– پرەزيدەنت ق.توقاەۆ ءار سوزىندە ادىلەتتى قوعامدا ەڭبەك ادامى ءبىرىنشى كەزەكتە ەكەنىن ايتادى. ءاربىر سالا ناعىز بىلىكتى مامانداردىڭ ارقاسىندا داميدى. ولاي بولسا ادىلەتتى مەملەكەتتى قۇرۋدا ءبىرىنشى كەزەكتە ەڭبەك ادامى باعالانۋى كەرەك. ءار ادام ءوزىنىڭ جۇمىسىنا اسا جاۋاپكەرشىلىكپەن قاراسا كەز كەلگەن سالا جۇيەلەنەدى، داميدى. سوندىقتان ەلدىڭ دامۋى ءبىر عانا مەملەكەتكە ەمەس، ءاربىر ازاماتقا، ياعني ەڭبەك ادامىنا بايلانىستى، - دەيدى ز.ورالباەۆا.
ايتا كەتەيىك، شىمكەنتتە زيالى قاۋىم وكىلدەرىنىڭ باس قوسۋىمەن ءتۇرلى سالاداعى تاقىرىپتار قامتىلىپ، ءىس-شارالارعا ارقاۋ بولۋدا. بۇل جولى قالانىڭ زيالى قاۋىمى پرەزيدەنتتىڭ جولداۋىنداعى ىسكە اسۋى ءتيىس باعىتتاردى سارالادى.
