QR Májilisiniń depýtaty, aqyn Qazybek Isa jyl saıyn muz bólshekterinen qashap salynatyn jasandy qalashyqtarǵa bólinetin qarjyny toqtatýdy talap etti. Avtor atalmysh qajetsiz jobalar úshin memleket qarjysyn bosqa shyǵyndamaı, qaıta barlyq kúshti Ekibastuz qalasynyń áleýetin kóterýge jumsaý qajet ekendigin aıtty. Bul jaıly "Adyrna" ulttyq portaly habarlady.
“Jańa jyl” dep muzqala salǵysh ákimder, onyń ornyna onsyz da muzqalaǵa aınalǵan Ekibastuzǵa kómek berýi kerek! Bul sóz, eń aldymen, Táýelsizdik kúnin attap ótip, jańa jyl merekesine bir aı buryn kirisken, bıyldyń ózinde bıýdjetten muz qalashyq salyp, shyrsha ornatýǵa 44,1 mıllıon teńge bólgen Qostanaı qalasy ákimi Marat Júndibaevqa jáne basqa qalalar ákimderine arnalady. Bul týraly QazAqparat agenttiginiń saýalyna jaýap bergen qala ákiminiń baspasóz hatshysy Májıt Shúlenov te málim etken.
Qostanaı qalasy ákimi Marat Júndibaevtyń “Astana” telearnasyna aıtýynsha, jańa jylǵa bólingen bul bıýdjet aqshasy kóp emes eken, áli jetkiliksiz kórinedi…Budan bólek Qostanaıdaǵy 2 shaǵyn aýdanda jańa jyldyq shyrsha men syrǵanaqtar boı kóteredi eken. Qostanaı qalasy ákimdiginiń aıtýynsha, 2019 jyly da jańajyldyq bezendirýge 44 mln teńge jumsalǵan, - dedi depýtat.
Keıinnen depýtat Ekibastuzdaǵy dókeı-olıgarh Klebanovtyń esirgen qylyǵyn synap tastady.
- Al kezinde Jylý energııa ortalyqtaryn tıynǵa alyp, dollarmen mıllıonerler atalyp otyrǵan olıgarh Klebanovtar men tili durys bolmaǵasyn tirligi durys bolmaıtyn oblys, qala basshylarynyń kesirinen qaqaǵan aıazda jylýsyz qalǵan Ekibastuz qalasy turǵyndary pana izdep, muzqalashyqqa aınalǵan óz úılerinen bas saýǵalap bezip ketti…
Jylyný úshin ystyq sý quıǵan bótelkelerdi qushaqtap uıyqtaýǵa deıin barý ne degen masqarashylyq!Al osynyń bárine, tikeleı kináli, turǵynúı-kommýnaldyq salaǵa jaýap eretin Pavlodar oblysy ákiminiń birinshi orynbasary Oleg Krýktyń oblys ákimi mindetin atqarýshy bolǵany aıazda jylý izdegen jurtty odan saıyn qaltyratyp jiberdi… Ázirshe, “mindetin atqarýshy” degen ýaqytsha anyqtaýyshtan jubanysh taýyp, bolashaqta halyqpen halyqtyń tilinde sóılese alatyn isker ákimnen úmitti bolyp otyr…
Bir top parlament depýtattary Ekibastuz qalasyna baryp, apatty jaǵdaıdy ońaltý úshin úlesterin qosyp qaıtty. Qymbatshylyqtan qysylyp, aılyǵy shaılyǵyna jetpeı, nanyn zorǵa taýyp otyrǵan halyqtyń qyrýar qarjysyn kún jylyǵanda erip keter jasandy “qurylyspen” sýǵa aǵyzyp jibergenshe, jurtqa paıdaly iske jumsaý kerek, ákim myrzalar! - dep oıyn túıindedi til janashyry.
"Adyrna" ulttyq portaly
