"شىداۋعا تۋرا كەلەدى": وسكەمەن جىلۋ ەلەكتر ورتالىعىنىڭ جۇمىسى دا سىر بەردى

2957
Adyrna.kz Telegram

وسكەمەن جىلۋ ەلەكتر ورتالىعىنىڭ جۇمىسى دا سىر بەردى. بۇل تۋرالى "حابار 24" تەلەارناسى حابارلادى، دەپ جازادى "ادىرنا" ۇلتتىق پورتالى.  

بۇگىن مەكتەپتەردە ساباق ۋاقىتشا توقتالىپ، وقۋشىلار قاشىقتىقتان ءبىلىم الدى. ال، قالا جاستارى مەن كەيبىر مەكەمە ماماندارى كوشە تازالاپ جۇرگەن  جۇمىسشىلار مەن ايالداماداعى جولاۋشىلارعا ىستىق شاي تاراتتى.

قاتتى ايازدا وسكەمەن جىلۋ ەلەكتر ورتالىعى پاتەرلەردى جىلىتا الماي جاتىر. جەلىدەگى سۋ مولشەرى كوبەيىپ، سالدارىنان تەمپەراتۋرا ءتۇسىپ كەتكەن. تۇرعىندار باسپاناسىنىڭ سالقىنداپ كەتكەنىن ايتىپ شاعىمدانۋدا. دەگەنمەن  جىلۋ ستانتسياسىندا اقاۋ بولعانىن ماماندار جاسىرمادى. قازاندىق اگەرگاتتارىنىڭ بىرىندە داتچيك ىستەن شىققان. بىراق ەكى ساعات ىشىندە جوندەلگەن. ەندى سۋ اينالىمى قالىپقا كەلگەنشە شىداۋعا تۋرا كەلەدى.

"قازىر ستانتسيا قىزمەتى شتاتتىق رەجىمدە. 7 قازاندىق 6 تۋربواگرەگات جۇمىسى ىستەپ تۇر. دەگەنمەن جوندەۋ جۇمىستارى ءالى دە جالعاسىپ جاتىر. ستانتسيا قۋاتىن ازايتىپ، كەرىسىنشە جەلىدەگى تەمپەرەاتۋرانى ارتتىرۋعا مۇمكىندىك جاسادىق. ىشكى شارالار اياقتالعان سوڭ،بارلىعى رەتتەلەدى", - دەيدى «وسكەمەن جەو» كەزەكشى اعا ينجەنەرى ەۆگەني ۆاسيلەۆ.

شىڭىلتىر اياز شاھارداعى كولىك قوزعالىسىن قيىنداتتى. قوعامدىق ترانسپورتتىڭ 40 پروتسەنتى جەلىگە شىقپادى. ءجۇرىپ جۇرگەندەرى دە ءجيى سىنىپ جاتىر. ونى اۋىستىراتىن كەلەسى كولىك شىققانشا ايالداما ادامعا  لىق تولادى. ايازعا شىداماي ەلەكتر سىمدارى ۇزىلگەن ترامۆايلاردىڭ دا بىرنەشەۋى تۇرالاپ تۇر.  دەگەنمەن اۆتوپارك قازىر كۇشەيىلگەن تارتىپكە كوشىپتى.

"تەحنيكانىڭ اتى تەحنيكا،شىداماي جاتىر. ماسەلەن ءجۇرىپ كەلە جاتىپ سىنىپ قالعان اۆتوبۋستى وزدەرىنشە جوندەمەك بولعان ەكى جۇرگىزۋشىمىز قولدارىن ءۇسىتىپ الدى. نەگىزىنەن ولار سول جەردەن  جولاۋشىلاردى  ءتۇسىرىپ، اۆتوپراككە قايتۋ كەرەك ەدى، بىراق ادامداردى ءتيىستى ايالداماعا جەتكىزىپ سالماقشى بولىپ جانتالاسقان. سوندىقتان ەشكىمگە وڭاي تيمەي تۇر",- دەيدى قالالىق جولاۋشىلار تاسىمالىن باسقارۋ ورتالىعىنىڭ ديرەكتورى نۇرسۇلتان كارىبەكوۆ. 

"ادىرنا" ۇلتتىق پورتالى 

پىكىرلەر