"Qazaqstan men Reseı yntymaqtastyqtyń joǵary deńgeıine qol jetkizdi". Bul pikirdi Qazaqstan men Reseıdiń óńiraralyq yntymaqtastyq forýmynyń XVIII jalpy otyrysynda Memleket basshysy Qasym-Jomart Toqaev aıtty, dep jazady "Adyrna" ulttyq portaly.
«Eń aldymen, osy sharany joǵary deńgeıde uıymdastyrǵany úshin RF-nyń prezıdenti men barlyq reseılik áriptesterge óz rızashylyǵymdy bildirgim keledi. Forým taqyrybynyń ózi halyqaralyq saýdadaǵy daǵdarys pen geosaıası belgisizdiktiń qazirgi jaǵdaıynda zor mańyzǵa ıe. Shynynda da, barlyq shekteýlerdi alyp tastaý jáne saýdada ózara tıimdi jaǵdaı jasaý elderimizdiń sapaly ekonomıkalyq ósimine negiz bolady. Sondyqtan búgingi kezdesýimizdiń erekshe mańyzy bar», - dedi Toqaev.
Toqaev Dúnıejúzilik saýda uıymynyń derekterine silteme jasap, lıberaldy saýda kelisimderiniń bastaýynda turǵan álemniń eń damyǵan elderi sońǵy jarty jylda eksporttyq shekteýlerdi engizý qarqynyn arttyryp kele jatqanyn atap ótti.
"Mysaly, G20 elderi osy jyldyń mamyr aıynan qazanǵa deıin saýda-sattyq kólemi 160 mlrd dollardan aspaıtyn taýarlarǵa 47 shekteý sharalaryn engizdi. Sóz eksportqa únemi týyndap otyrǵan shekteýler, qosymsha lıenzııalyq talaptar, kvotalar men salyqtar jaıynda bolyp otyr. Osyǵan oraı, Qazaqstan men Reseı arasyndaǵy yntymaqtastyq, baqytymyzǵa oraı, jahandyq úrdisterden aıtarlyqtaı erekshelenedi. Ótken aıda biz eki el arasyndaǵy dıplomatııalyq qarym-qatynastardyń ornaǵanyna 30 jyl tolýyn atap óttik. Osy ýaqyt ishinde memleketterimiz myǵym dostyq pen tatý kórshilikke negizdelgen ózara tıimdi strategııalyq seriktestik qura aldy. Elderimiz arasynda senimdi, syndarly dıalog ornatylyp, yntymaqtastyqtyń joǵary deńgeıine qol jetkizildi», - dedi Memleket basshysy.
Esterińizge sala keteıik, buǵan deıin Memleket basshysy Qasym-Jomart Toqaev Vladımır Pýtınniń shaqyrýymen Reseıge resmı saparmen kelgeni habarlanǵan bolatyn. Eki el prezıdentteri Orynborda ótip jatqan Qazaqstan men Reseıdiń XVIII Óńiraralyq yntymaqtastyq forýmynyń plenarlyq otyrysyna qatysty.
"Adyrna" ulttyq portaly
