بۇگىن قاسىم-جومارت توقاەۆتىڭ رەسپۋبليكالىق قوعامدىق شتابىنىڭ قورىتىندى وتىرىسى ءوتتى. جيىن بارىسىندا ۇگىت-ناسيحات كەزەڭىندە اتقارىلعان جۇمىستار تالقىلاندى.
شتاب باسشىسى ەرلان قوشانوۆ پرەزيدەنتتىك سايلاۋ زاڭعا جانە حالىقارالىق نورمالارعا تولىق سايكەس وتكەنىن جەتكىزدى.
ول قاسىم-جومارت توقاەۆتىڭ سايلاۋداعى ايقىن جەڭىسى – قوعامنىڭ پرەزيدەنتكە جانە ونىڭ رەفورمالار باعىتىنا دەگەن زور سەنىمىنىڭ كورسەتكىشى ەكەنىن باسا ايتتى. سايلاۋ حالىقتىق كواليتسياعا كىرگەن بارلىق پارتيا مەن قوعامدىق ۇيىمداردى ءبىر كومانداعا بىرىكتىردى. ولار بارلىق ايماقتى ارالاپ، اۋقىمدى ۇگىت-ناسيحات جۇمىستارىن جۇرگىزدى.
«جالپى، بۇل سايلاۋ قوعام مەن بيلىكتىڭ ەلدىڭ ەرتەڭگى دامۋىنا قاتىستى تۇسىنىگى ورتاق ەكەنىن كورسەتتى. حالىق پرەزيدەنتتىڭ رەفورمالارى بەلگىلەنگەن مەرزىمدە جانە تولىق ورىندالاتىنىنا سەنىمدى بولۋى كەرەك. بۇل – حالىقتىق كواليتسيانىڭ باستى مىندەتى»، - دەدى شتاب باسشىسى.
ەرلان قوشانوۆ حالىقتىق كواليتسيانىڭ، رەسپۋبليكالىق جانە ايماقتىق قوعامدىق شتابتاردىڭ مۇشەلەرىنە، سەنىمدى وكىلدەرگە، جاستار بەلسەندىلەرى مەن باقىلاۋشىلارعا اتقارىلعان جۇمىستار ءۇشىن العىسىن ءبىلدىردى.
ۇگىت-ناسيحات ناۋقانى كەزىندە قاسىم-جومارت توقاەۆتىڭ جاقتاستارى 42 قالا مەن 5000-نان استام اۋىلدى ارالادى. ولار وتكىزگەن 24 مىڭ ۇگىت-ناسيحات ءىس-شاراسىنا 3 ميلليون سايلاۋشى قاتىستى. كەزدەسۋلەر بارىسىندا ازاماتتاردان 40 مىڭنان استام ۇسىنىس پەن تىلەك جينالدى.
«حالىقتىق كواليتسيانىڭ جۇمىسى مۇنىمەن اياقتالمايدى. ءبىز ءبارىمىز مەملەكەت باسشىسى جاقتاستارىنىڭ كومانداسىندا قالامىز. كواليتسياعا كىرگەن بارلىق قوعامدىق-ساياسي كۇش قاسىم-جومارت توقاەۆتىڭ سايلاۋالدى باعدارلاماسىن جانە بارلىق ساياسي رەفورمانى جۇزەگە اسىرۋعا بەلسەندى اتسالىسادى دەپ ويلايمىن»، - دەدى ەرلان قوشانوۆ.
جيىن بارىسىندا تۇڭعىش عارىشكەر، «حالىق قاھارمانى» توقتار اۋباكىروۆ، «اق جول» قازاقستان دەموكراتيالىق پارتياسىنىڭ توراعاسى ازات پەرۋاشەۆ، قازاقستان حالىق پارتياسىنىڭ باسشىسى ەرمۇحامەت ەرتىسباەۆ، قوعام قايراتكەرى جاقسىبەك قۇلەكەەۆ، قازاقستاننىڭ ازاماتتىق اليانسىنىڭ پرەزيدەنتى بانۋ نۇرعازيەۆا، قازاقستان جازۋشىلار وداعىنىڭ توراعاسى ۇلىقبەك ەسداۋلەت، بەلگىلى زاڭگەر باقىتجان بازاربەك، پاۆلودار وبلىستىق قوعامدىق شتابىنىڭ باسشىسى يليا تەرەنچەنكو جانە «Qazaqstan Team» جاستار بىرلەستىگىنىڭ باسشىسى ولجاس سۇلەيمەنوۆ جانە كواليتسيانىڭ باسقا دا مۇشەلەرى ءسوز سويلەدى.
