2022 جىلدىڭ 9 جەلتوقسانىندا، ساعات 19:00-دە استانا قالاسىنىڭ «QAZAQSTAN» ورتالىق كونتسەرت زالىندا تاريحى باي، تەڭدەسى جوق ۇجىم – ت.ابدىراشەۆ اتىنداعى قر مەملەكەتتىك اكادەميالىق سيمفونيالىق وركەسترىنىڭ (قر ماسو) كونتسەرتى وتەدى.
اتالمىش گاسترولدىك كونتسەرتتى قر مادەنيەت جانە سپورت مينيسترلىگىنىڭ قولداۋىمەن جامبىل اتىنداعى قازاق مەملەكەتتىك فيلارمونياسى روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىمەن بىرلەسە ۇيىمداستىرىپ وتىر.
كونتسەرتكە ەۋروپانىڭ جەتەكشى سكريپكاشىسى، مادريدتەگى «Katarina Gurska» جوعارى مۋزىكا مەكتەبىنىڭ پروفەسسورى، وتانداسىمىز – ەرجان كۋليباەۆ، سونداي-اق بۇگىندە حالقىمىزدىڭ ۇلتتىق مۋزىكالىق ونەرىن دارىپتەپ، مۋزىكالىق ساز اسپاپتارىن الەمگە تانىتىپ جۇرگەن قازاقستاننىڭ ەڭ تانىمال «تۇران» ەتنو-فولكلورلىق ءانسامبلى قاتىسادى. كونتسەرتتىك شارا ت.ابدىراشەۆ اتىنداعى قر مەملەكەتتىك اكادەميالىق سيمفونيالىق وركەسترىنىڭ كوركەمدىك جەتەكشىسى جانە باس ديريجەرى قانات وماروۆتىڭ باسقارۋىمەن وتەدى.
استانالىق تىڭدارماندار نازارىنا جاۋھار تۋىندىلار – يا. سيبەليۋستىڭ وركەستر مەن سكريپكاعا ارنالعان رە مينور كونتسەرتى، س. راحمانينوۆتىڭ ەكىنشى سيمفونياسى مەن كومپوزيتور ا. رايىمقۇلوۆانىڭ «دالا سىرى» سيمفونيالىق پوەماسى ۇسىنىلاتىن بولادى. «دالا سىرى» سيمفونيالىق پوەماسىندا ورگان، سكريپكا، فلەيتا، باسقا دا كلاسسيكالىق اسپاپتارىنىڭ ءۇنى دومبىرا، داۋىلپاز، جەتىگەن، قوبىز، سىبىزعىمەن جاراسىم تابادى. قازاق دالاسىنىڭ تاريحىن، ەرلىك پەن ورلىك، سابىر مەن دانالىق فيلوسوفياسىن ەلەستەتەتىن شىعارمانى سيمفونيالىق وركەستر «تۇران» انسامبلىمەن بىرىگىپ ورىندايدى. ەكى ءتۇرلى ۇجىمنىڭ، ەكى ءتۇرلى باعىتتىڭ سينتەزى تىڭدارمانداردى كەرەمەت اسەرگە بولەيدى.
ايتا كەتەيىك، «دالا سىرى» سيمفونيالىق پوەماسىنىڭ حالىقارالىق پرەمەراسى قۇرمانعازى اتىنداعى كونسەرۆاتوريانىڭ ستۋدەنتتىك وركەسترىمەن گەرمانيانىڭ بەس قالاسىندا، كونتسەرتتىك تۋر اياسىندا ءوتتى. سونداي-اق پوەما تەك ەۋروپادا عانا ەمەس، رەسەيدىڭ مارين تەاترى مەن ماسكەۋ مەملەكەتتىك كونسەرۆاتورياسىنىڭ ۇلكەن زالىندا ورىندالىپ، تىڭدارماندار تاراپىنان جوعارى باعاعا يە بولدى.
ت. ابدىراشەۆ اتىنداعى قازاقستان رەسپۋبليكاسىنىڭ مەملەكەتتىك اكادەميالىق سيمفونيالىق وركەسترى – 1938 جىلى قۇرىلعان ەلىمىزدەگى العاشقى سيمفونيالىق وركەستر، قازاقستاننىڭ ەڭ ءىرى ءارى جەتەكشى مۋزىكالىق ۇجىمى. چەحيا، پولشا، گەرمانيا، اۆستريا، فرانتسيا، ۇلىبريتانيا، امەريكا، تۇركيا، كورەيا، قىتاي ەلدەرىنىڭ كومپوزيتورلارىمەن، كورنەكتى ديريجەرلەرىمەن اۆتورلىق كونتسەرتتىك كەزدەسۋلەر ۇيىمداستىرىپ، الەمدىك دەڭگەيدەگى كوپتەگەن ورىنداۋشىلارمەن بىرگە ونەر كورسەتۋى – وركەستردىڭ جەمىستى جۇمىسىنىڭ ناتيجەسى بولىپ تابىلادى.
1958 جىلى وركەستر جامبىل اتىنداعى قازاق مەملەكەتتىك فيلارمونياسىنىڭ قۇرامىنا كىرىپ، بۇگىندە تىڭدارمان نازارىنا سيمفونيالىق مۋزىكانى ورىنداۋدىڭ ەڭ ۇزدىك ۇلگىلەرىن ۇسىنىپ كەلەدى.
قانات وماروۆ – 2015 جىلدان وركەستردىڭ كوركەمدىك جەتەكشىسى جəنە باس ديريجەرى بولىپ قىزمەت ەتەدى. قازاقستاننىڭ حالىق ءارتيسى، پروفەسسور، وتىز جىلعا جۋىق مەملەكەتتىك اكادەميالىق سيمفونيالىق وركەستردىڭ باس ديريجەرى بولعان تولەپبەرگەن ابدىراشەۆتەن ءتالىم الىپ، لايىقتى دەڭگەيدە ءىزىن جالعاستىرىپ كەلەدى. سونىمەن قاتار، «مەتروپوليتەن» وپەرا تەاترىنىڭ باس ديريجەرى، الەمگە ايگىلى ماەسترو – فابيو لۋيزيدەن تاعىلىمدامادان ءوتىپ، ماماندىعىنىڭ قىر-سىرىن يگەردى.
ول Carnegie Hall (نيۋ-يورك), Kennedy Center (ۆاشينگتون), Kitara Hall (ساپپورو), مارين تەاترى (سانكت-پەتەربور) مەن ماسكەۋ مەملەكەتتىك كونسەرۆاتورياسىنىڭ ۇلكەن زالىندا ونەر كورسەتىپ، قازاق ديريجەرلىك مەكتەبىنىڭ تۇعىرىن الەمدىك دەڭگەيدە مويىنداتىپ ءجۇر.
ەرجان كۋليباەۆ – قازاقستاندى بۇكىل الەمگە تانىتىپ جۇرگەن قازىرگى زاماننىڭ ۇزدىك سكريپكاشىلارىنىڭ ءبىرى. يسپانياداعى سوفيا پاتشايىمنىڭ جوعارى مەكتەبىنىڭ تۇلەگى، «Washington Award» سىيلىعىنىڭ يەگەرى جانە ارگەنتينا، پولشا، رۋمىنيا، گەرمانيا، رەسەي جانە باسقا دا كوپتەگەن ەلدەردەگى حالىقارالىق بايقاۋلاردىڭ لاۋرەاتى. بۇگىندە «Katarina Gurska» (مادريد، يسپانيا) جوعارى مۋزىكا مەكتەبىنىڭ پروفەسسورى.
«تۇران» فولكلورلى-ەتنوگرافيالىق ءانسامبلى – قازاقستانداعى بىرەگەي ۇجىمداردىڭ ءبىرى، بۇكىل تۇركى الەمىنىڭ مۋزىكالىق برەندى، قازاقستاندىق مۋزىكا مادەنيەتىنىڭ ءىنجۋ-مارجانى بولىپ سانالادى. ول 2008 جىلى قۇرمانعازى اتىنداعى قازاق ۇلتتىق كونسەرۆاتورياسىنىڭ قابىرعاسىندا قۇرىلعان. انسامبل ەرەكشەلىكتەرىنىڭ ءبىرى – سىبىزعى، سازسىرناي، دومبىرا، قوبىز، جەتىگەن سياقتى ساز اسپاپتارى مەن كومەيمەن ءان ايتۋ مانەرىن ءوزارا ۇندەستىرۋ ارقىلى كونە سارىندى زاماناۋي تۇرعىدا قايتا جاڭعىرتۋدى ماقسات تۇتۋى.
كونە اسپاپتار، ۇلتتىق مۋزىكا جانە زاماناۋي ارانجيروۆكا – وسى انىقتاما بويىنشا بۇگىندە «تۇران» ءانسامبلى بۇكىل الەمگە تانىلىپ ءجۇر.
