استانادا مەملەكەتتىك كەڭەسشى ەرلان قاريننىڭ قاتىسۋىمەن قازاق حالقىنىڭ ۇلتتىق ءان-كۇيى مەن فولكلورلىق مۇراسى جيناقتالعان «اسىل مۇرا» اۋديوجيناعىنىڭ تۇساۋكەسەرى ءوتتى، دەپ حابارلايدى “ادىرنا” ۇلتتىق پورتالى.
جوبا «قازاقستان» رەسپۋبليكالىق تەلەراديوكورپوراتسياسى مەن Ozen مۋزىكالىق لەيبلىنىڭ بىرلەسكەن جۇمىسىنىڭ ناتيجەسىندە جۇزەگە اسىرىلدى.
«اسىل مۇرا» – قازاقستان مۋزىكا ونەرى تاريحىنداعى ەڭ ءىرى جيناقتاردىڭ ءبىرى. وعان «التىن قوردا» ساقتالعان 400 كۇي، 300 جىر-تەرمە، 400 حالىق ءانى مەن حالىق كومپوزيتورلارىنىڭ اندەرى، 100 ەرتەگى، 50 بەسىك جىرى جانە 250 رەترو حيت ەنگىزىلدى. جيناقتىڭ باستى ەرەكشەلىگى – كوپتەگەن شىعارمانىڭ تۇپنۇسقالىق، ياعني العاشقى ورىنداۋشىلارى جەتكىزگەن كۇيىندە ۇسىنىلۋى.
1 500 تاڭداۋلى اۋديوجازبا Apple Music, Spotify, Yandex Music, YouTube Music سياقتى 100-دەن استام حالىقارالىق مۋزىكالىق پلاتفورماعا جۇكتەلدى. سونداي-اق بارلىق ماتەريالدار «قازاقستان» تەلەراديوكورپوراتسياسىنىڭ altynqor.com سايتىنا ورنالاستىرىلدى.
مەملەكەتتىك كەڭەسشى ەرلان قارين «اسىل مۇرا» جيناعىنىڭ جارىققا شىعۋى ۇلتتىق مادەنيەتتى تسيفرلاندىرۋ جولىنداعى ماڭىزدى قادام ەكەنىن اتاپ ءوتتى. ونىڭ ايتۋىنشا، بۇل جوبا مەملەكەت باسشىسى قاسىم-جومارت توقاەۆ باستاماشىلىق ەتكەن ۇلتتىق تسيفرلىق مۇراعات قۇرۋ جۇمىسىنا ۇلەس قوسادى. سونىمەن قاتار، ۇلتتىق ونەر تۋىندىلارىن جۇيەلەۋگە، جاس ۇرپاق ءۇشىن سەنىمدى دەرەككوز قالىپتاستىرۋعا جانە جاساندى ينتەللەكتىنى مادەني مۇرامەن تولىقتىرۋعا مۇمكىندىك بەرەدى.
“مەملەكەتتىك تەلەراديوكورپوراتسيانىڭ قورىندا عانا ساقتالعان 1500 تۇپنۇسقا تۋىندى الەمدىك مۋزىكالىق پلاتفورمالاردا جاريالانىپ وتىر. بۇل شارا مەملەكەت باسشىسى قاسىم-جومارت توقاەۆتىڭ ۇلتتىق قۇرىلتايدىڭ IV وتىرىسىندا كوتەرگەن ۇلتتىق تسيفرلىق مۇراعات قۇرۋ جونىندەگى باستاماسىن جۇزەگە اسىرۋعا سەپتىگىن تيگىزەدى. مۇنداي جوبالار ۇلتتىق مادەني كونتەنتتى جۇيەلەۋگە جول اشىپ قانا قويماي، ونەرپازداردىڭ جاڭا بۋىنىنا، وسكەلەڭ ۇرپاققا سەنىمدى ءارى باي دەرەك كوزى بولادى. سونداي-اق جاساندى ينتەللەكتىنىڭ جادىن ەداۋىر تولىقتىرادى”، — دەدى ەرلان قارين.
«اسىل مۇرا» جيناعى ەلىمىزدىڭ ۇلتتىق جانە ونەر ۋنيۆەرسيتەتتەرىنىڭ كىتاپحانالارىنا بەرىلەدى، سونداي-اق ەركىن ساۋداعا شىعارىلادى.
