الاشوردانىڭ استاناسى بولعان سەمەي قالاسىندا ۇلت ۇستازى احمەت بايتۇرسىنۇلىنىڭ ءومىرى مەن شىعارماشىلىعىن باياندايتىن "سوڭعى ۇكىم" اتتى كوركەمفيلم ءتۇسىرىلىپ جاتىر. تۋىندى قازاق رۋحانياتىنىڭ قازىناسىن بايىتىپ، كەلەسى جىلى كورەرمەندەرگە جول تارتپاق، دەپ حابارلايدى "ادىرنا" ۇلتتىق پورتالى.
سەمەي قالاسىنداعى ءتۇسىرىلىم ءتورت كۇنگە سوزىلماق. فيلم تۋىندىگەرلەرى ءونىمدى جىل سوڭىنا دەيىن اياقتاپ، جارىققا شىعارۋدى ءجون كورىپ وتىر. كينوباياننىڭ تۇتاس سيۋجەتى احمەت بايتۇرسىنۇلىنىڭ ءومىرىنىڭ بارلىق كەزەڭىن قامتيدى. ءتۇسىرىلىم توبىنا ەرلان نۇرمۇحامبەتوۆ پەن ەرگەن توقمۋرزين جەتەكشىلىك ەتەدى.
جەتەكشىلەردىڭ ايتۋىنشا، كينوتۋىندى احمەت بايتۇرسىنۇلىنىڭ اباقتىدا وتكەن ازاپتى جىلدارىنا قاراماستان قايسارلىق تانىتۋىن، ىڭكار ماحابباتى مەن عىلىم-بىلىمدەگى ەرەن ەڭبەگىن، تاعدىر جەلىنىڭ وتىندە وتكەن اۋىر دا ونەگەلى ءومىرىن سۋرەتتەيدى. باستى رولدە - ازامات ساتىبالدى، جارى بادريسافانىڭ رولىندە - داريا الەكساندروۆا وينايدى.
كينوتۋىندىنىڭ العاشقى كەزەڭى 2021 جىلى ءتۇسىرىلدى. نەگىزگى ءتۇسىرىلىم وتكەن مەكەن – الماتى قالاسى جانە شىعىس قازاقستان وبلىسى. قويۋشى وپەراتور – مارس وماروۆ. باس پروديۋسەر – داستان اتىعاەۆ. ستسەناري اۆتورى – عالىم دوسكەن.
ايتا كەتەرلىگى، سەمەيلىكتەر احاڭ جايلى كينوكارتينانىڭ تۇسىرىلەتىنىن ەستىپ، كوپشىلىك كورىنىستەگى كادرلارعا تۇسۋگە قۋانا-قۋانا كەلىسكەن.
"ادىرنا" ۇلتتىق پورتالى
