Astanada qalasynyń jumyspen qamtý basqarmasy azamattarǵa kómir alý úshin 50 myń teńgeden berip jatyr. Arnaıy járdemaqyny tapqan tabysy kúnkóris deńgeıine jetpeıtin, tórt sanatqa kiretin azamattar ala alady. Járdemaqyǵa qol jetkizý úshin jumyspen qamtý basqarmasyna habarlasý qajet. Áleýmettik naýqan kelesi jyldyń 30 sáýirine deıin jalǵasady, dep habarlaıdy "Adyrna" ulttyq portaly "Qazaqstan" telearnasyna silteme keltirip.
Astananyń 40-beketi mańynda ornalasqan kómir satatyn qoıma meńgerýshisi:
«Biz tamyzdan bastap satyp jatyrmyz, sonyń áserinen qazir daýryǵý joq. Kómirdi kóp halyq aldy», – dep pikir bildirdi.
Qoıma meńgerýshisiniń aıtýynsha, vagondar kemi eki kún saıyn kelip jatyr. Biraq, satyp alýshylar Shubarkól kómiriniń az ekenine shaǵymdanǵan.
Telearnanyń habarlaýynsha, 40-stanııa tuıyǵyna búgin ǵana jetkizilgen 300 tonna kómir mine, 1 saǵatta satylyp ketti. Al, negizi qazaqstandyqtar jylyna 10 mln tonna kómir tutynady. Sonyń ishinde Shubarkólge suranys kóp. Biraq Shubarkólde jylyna 3 jarym mln tonna shyǵarylady. Sondyqtan keıde kómir jetpeı jatady.
Temirjol tuıyqtarynda Shubarkól kómiriniń baǵasy – 13 850 teńge. Jibek Joly, Talapker, Qosshy, Qoıandy jáne Arshalyǵa jetkenshe tasymaldaý quny qosylyp, qymbattaıdy.
Kómir baǵasynyń qubylýy men artýyna qatysty tasymaldaýshylar da pikir bildirgen. Máselen:
- Jetkizý ǵoı bizde. Qalanyń syrty bolsa 20-25 myń, alystaǵan saıyn qymbatyraq bolady. Qosshy, Qoıandyǵa qanshaǵa aparasyz osy jerden? Men Jibek jolyna aparam, arǵy jaǵy 25 bergi jaǵy 20 myńǵa, – dep jaýap berdi tasymaldaýshy Baǵdat Mamyraev.
"Adyrna" ulttyq portaly
