قر عىلىم جانە جوعارى ءبىلىم ءمينيسترى ساياسات نۇربەك 17 قاراشا - حالىقارالىق ستۋدەنتتەرمەن كۇنىمەن قۇتتىقتاپ، ستۋدەنتتىك شاقتاعى سۋرەتتەرىمەن ءبولىستى. بۇل تۋرالى "ادىرنا" ۇلتتىق پورتالى جازادى.
"بۇگىن - حالىقارالىق ستۋدەنتتەر كۇنى! وسىعان وراي ەلىمىزدەگى بارشا ستۋدەنتتەر قاۋىمىن مەرەكەمەن قۇتتىقتايمىن! وتاندىق جوعارى وقۋ ورىندارىندا ءبىلىم الىپ جاتقان 600 مىڭنان استام ستۋدەنتكە مەملەكەت تاراپىنان جان-جاقتى قولداۋ كورسەتىلىپ كەلەدى. كەشە عانا عىلىم جانە جوعارى ءبىلىم مينيسترلىگى جانىنان قۇرىلعان ستۋدەنتتەر كەڭەسىنىڭ I وتىرىسى ءوتتى. وعان ۋنيۆەرسيتەتتەردەگى 80-نەن استام ستۋدەنتتىك ۇيىم جەتەكشىلەرى كىردى. باسقوسۋدا جاستار ستۋدەنتتىك ءوزىن-ءوزى باسقارۋدى ودان ءارى جەتىلدىرۋ، "100 كوشباسشى" سياقتى جوبالاردى دامىتۋ، "ستۋدەنتتەردى قولداۋ ەكوجۇيەسىن" قالىپتاستىرۋ اياسىندا ستۋدەنتتەردىڭ ۇلتتىق وداعىن قۇرۋ جانە تاعى باسقا ۇسىنىستارىن ايتتى. ستۋدەنت جاستار دا ءوز كوشباسشىلارىنىڭ باستامالارىن قولدايتىنىنا جانە جوسپارلانعان جوبالاردى ىسكە اسىرۋعا بەلسەندى قاتىساتىنىنا سەنىمدىمىن. مەن قازىرگى جاستاردىڭ دۇنيەتانىمىنا ۇلكەن قۇرمەتپەن قارايمىن. ارقاشان ىزدەنىمپاز، كوڭىلدى جانە جىگەرلى بولىڭىزدار. ءوز كۇشتەرىڭىزگە سەنىپ، قيىندىقتاردى ەڭسەرە بىلسەڭىزدەر جارقىن بولاشاققا جول اشىلادى. ايگىلى امەريكالىق فيلوسوف جانە قوعام قايراتكەرى رالف ۋ.ەمەرسون ايتقانداي "الەم قايدا بارا جاتقانىن بىلەتىندەرگە ەسىگىن ايقارا اشادى".سوندىقتان سىزدەرگە ساتتىلىك تىلەيمىن! بۇگىنگى مەرەكەگە وراي، قىزىعى مەن شىجىعى مول ستۋدەنتتىك شاقتان ەستەلىك بولسىن دەپ، سۋرەتتەرىمدى جاريالادىم. بۇل باستامامدى ارىپتەستەرىم دارحان قىدىرالى، اسحات ايماعامبەتوۆ پەن باعدات مۋسين دە قولدايدى دەپ ويلايمىن. بۇنى challenge دەپ ەسەپتەڭىزدەر", - دەپ جازدى مينيستر ءوزىنىڭ فەيسبۋك پاراقشاسىندا.
"ادىرنا" ۇلتتىق پورتالى
