مەملەكەت باسىشىسى قاسىم-جومارت كەمەلۇلى الماتى قالاسىنا جۇمىس ساپارىمەن كەلدى. ءىس-ساپارى بارىسىندا ول قالا حالقىمەن كەزدەسۋ وتتكىزىپ، ايماقتاعى تۇيىتكىلدى ماسەلەلەردى ايشىقتاپ بەردى، دەپ حابارلايدى «ادىرنا» ءتىلشىسى.
كەزدەسۋ كەزىندە پرەزيدەنت تۇرعىن-ءۇي كوممۋنالدىق شارۋاشىلىعى توڭىرەگىندە وي ءوربىتتى. توقاەۆ الىپ قالانىڭ بىرقاتار اۋدانىندا ورتالىقتان بەرىلەتىن سۋ جوقتىعىن العا تارتتى. ايتۋىنشا، ءالى كۇنگە الماتىنىڭ 30 مىڭعا جۋىق تۇرعىنى سۋدى تاسىپ ىشەدى ەكەن. وسىنى ەسكەرگەن پرەزيدەنت قالا اكىمدىگىنە 3 جىلدىڭ ىشىندە بارلىق تۇرعىندارعا ورتالىقتان سۋ بەرۋدى تاپسىردى.
«الداعى 2 جىلدا قارعالى، اقساي وزەندەرىنەن سۋ الاتىن 2 ءىرى قۇرىلعىنى ىسكە قوسۋ كەرەك. ناۋرىزباي جانە الاتاۋ اۋداندارىندا سۋ جينايتىن جاڭا ورتالىقتار سالۋ قاجەت. بۇل شارالاردىڭ ارقاسىندا 150 مىڭ ادامعا سۋ بەرىلەدى. ەرمەنساي جانە بارلىق وزەندەرىنەن سۋ تارتۋ جۇيەسىن دە ىسكە قوسۋ ماڭىزدى»،- دەدى مەملەكەت باسشىسى.
سۋ – تىرشىلىك كوزى. تۇرعىنداردىڭ ءومىر ساپاسى تىكەلەي سۋعا بايلانىستى. سوندىقتان، سۋمەن قامتاماسىز ەتەتىن جاڭا جەلى سالۋ، ەسكىلەرىن جاڭعىرتۋ جۇمىسىن باستى نازاردا ۇستاۋ كەرەك، دەگەن پرەزيدەنت الماتىنىڭ تاريحي ورتالىعىندا كوممۋنالدىق ينفراقۇرىلىمنىڭ توزىپ بارا جاتقانىن ەسكە سالدى.
«اكىمدىك ونداعى ەسكىرگەن جەلىنى ۋاقتىلى جاڭعىرتىپ وتىرۋى كەرەك. مىسالى، «ءتاريفتى ينۆەستيتسياعا ايىرباستاۋ» باعدارلاماسى بار، سونى ءتيىمدى پايدالانعان ءجون. بارشاڭىزعا بەلگىلى، قالا حالقىنىڭ سانى كۇن وتكەن سايىن ءوسىپ كەلەدى. سوندىقتان، تۇرعىن-ءۇي قۇرىلىسىنا ايرىقشا ءمان بەرىلەدى»,-دەدى ءوز سوزىندە توقاەۆ.
