سايلاۋ-2022: الماتىدا قۇرىلعان قوعامدىق قوزعالىستىڭ مىندەتى قانداي؟

2397
Adyrna.kz Telegram

مەملەكەت باسشىسى قاسىم-جومارت توقاەۆ ءوزى مالىمدەگەندەي ەلىمىزدە 2022 جىلدىڭ 20 قاراشاسى كۇنى وتەتىن كەزەكتەن تىس پرەزيدەنتتىك سايلاۋىندا ەلىشىلىك تۇراقتىلىق پەن سايلاۋ پروتسەدۋرالارىنىڭ قاتاڭ ساقتالۋىن قامتاماسىز ەتۋ ماقساتىندا ەلىمىزدىڭ بارلىق اۋماعىن قامتيتىن وڭىرلىك شتابتارى بار تاۋەلسىز باقىلاۋشىلاردىڭ «BAQYLA» قوعامدىق قوزعالىسى قۇرىلادى، دەپ حابارلايدى «ادىرنا» ءتىلشىسى.

اۋماقتىق باقىلاۋشىلار جەلىسى جۇمىسى الماتى قالاسىنداعى ورتالىق شتاب پەن ەلىمىزدىڭ 26 قالاسىندا ورنالاسقان وڭىرلىك شتابتار ارقىلى جۇرگىزىلەدى ء(تىزىم قوسىمشا ۇسىنىلادى).

قوزعالىستىڭ باقىلاۋشىلارى ەلىمىزدىڭ 26 ءىرى قالاسىندا بارلىعى 3,2 مىڭنان استام سايلاۋ ۋچاسكەلەرىندە باقىلاۋشىلىق جاسايدى.

ساياساتتانۋشى دوس كوشىمنىڭ اتاپ وتكەنىندەي سايلاۋ پروتسەسىنە بەلسەندى قاتىساتىن توپتىڭ ءبىرى – باقىلاۋشىلار. ولاردىڭ ساۋاتتى جۇمىس ىستەۋى، باقىلاۋدىڭ بارلىق تاسىلدەرىن تەرەڭ مەڭگەرە ءبىلۋى – قازاق ەلىندەگى سايلاۋ جۇيەسىنىڭ جاقسارۋىنىڭ ءبىر كەپىلى.

“مەنىڭ مىندەتىم – ءاربىر وبلىس. قالالارداعى باقىلاۋشىلاردى دايىندايتىن ترەنەرلەردى دايىنداۋعا ارنالعان ارنايى وفلاين، مۇمكىندىك بولسا، ون لاين سەمينار-ترەنينگتەر جۇرگىزۋ، سايلاۋدى باقىلاۋ بارىسىندا تۋىنداعان سۇراقتارعا جاۋاپ بەرۋ بولىپ تابىلادى”، – دەيدى ول.

قوزعالىس بەلسەندىسى باقىتجان بۇقاربايدىڭ پىكىرىنشە 2019 جىلى باقىلاۋشىلار ينستيتۋتى ەلدە جاڭا قارقىن الىپ، بيلىك ساناساتىن قوعامدىق كۇشكە اينالعان.

ء“تۇرلى سەبەپتەرگە بايلانىستى قازىر ەلدەگى ازاماتتىق قوعامنىڭ كۇيىن كوڭىل كونشىتەتىندەي دەپ ايتۋعا كەلمەيدى. سول ءۇشىن ءبىزدىڭ ۇران «كۇن سايىن ازامات بول!» بولۋى كەرەك.مەن ءۇش جىل بۇرىن بەلسەندى باقىلاۋشىلاردىڭ قاتارىندا بولدىم، وسى جولى ەل بويىنشا باقىلاۋشىلاردى قالىپتاستىرۋعا دارىستەر وتكىزۋ ارقىلى اتسالىسايىن دەپ جاتىرمىن. باقىلاۋشىلاردىڭ نەگىزگى بولىگى جاستار بولماق دەپ ويلايمىن، اتاپ ايتقاندا، ولارعا «ازاماتتىق قوعام نە ءۇشىن كەرەك؟» جانە «قالاي ءتيىمدى پوست جازۋ كەرەك؟» تاقىرىپتارىندا دارىستەر وتكىزۋدى جوسپارلاپ وتىرمىن. بۇدان بولەك پروتسەسكە جاڭا باقىلاۋشىلاردى تارتۋ دا جوسپاردا بار.ارينە، ەلدەگى بۇكىل سايلاۋ ۋچاسكەلەرىن تولىق قامتۋ ءۇشىن 20 مىڭنىڭ ۇستىندە بىلىكتى باقىلاۋشى كەرەك، از بولىپ كورىنگەنمەن، ەل بولىپ وسى كورسەتكىشكە ءالى جەتە الماي كەلەمىز. بىراق كوش جۇرە تۇزەلەدى. 2019 جىلى ازاماتتىق بەلسەندىلەر كوتەرگەن تۋدى تۇسىرمەي، باعىتتان تايماي، باقىلاۋشىلار ينستيتۋتىن نىعايتۋدى جالعاستىرا بەرۋ كەرەك. سايلاۋدان سايلاۋعا باقىلاۋعا الىناتىن ۋچاسكەلەرىن سانى ارتسا، ەرتەلى-كەش حالىقتىڭ داۋىسى تۇگەل ەسكەرىلەتىن كۇنگە دە جەتەمىز”، – دەيدى ول.

وسى قوزعالىستىڭ قۇرىلۋىنا باستاماشى بولعان جاس ساياساتتانۋشى اسحات قاسەنعاليدىڭ ايتۋىنشا، قازاقتىلدى اۋديتوريا ءادىل ءارى شىنايى سايلاۋ وتكەنىن قالايدى. الايدا سايلاۋدىڭ شىنايى وتۋىنە بيلىك قۇلىقتى ەمەس.

“كوپتەگەن قازاقستان ازاماتىندا بەرگەن داۋىسىم، سالعان بيۋللەتەنىم وزگە كانديداتتىڭ قانجىعاسىنا بايلانىپ كەتۋى نەمەسە قوقىس جاشىگىندە جاتۋى مۇمكىن دەگەن كۇدىك بار. بۇل ۇزاق جىلدار بويى قالىپتاسقان جانە ءالى دە جالعاسىن تاۋىپ كەلە جاتقان سايلاۋداعى قۇيتىرقى ارەكەتتەردىڭ ناتيجەسى.ءبىز بۇل ولقىلىقتى تولىق شەشپەسەك تە، سايلاۋدا باقىلاۋشىلاردى قاتىستىرىپ، وقىتىپ كورگىمىز كەلەدى. ارينە، تۇتاس قازاقستاندى قامتۋ مۇمكىن ەمەس.ونى بيلىكتىك پارتيالار عانا جاساي الاتىن شىعار. بىراق بارىنشا كوپ ۋچاسكەنى قامتۋعا تىرىسامىز. ءىرى قالالاردى، وبلىس ورتالىقتارىن قامتۋعا تىرىسامىز. ەل بويىنشا 6 مىڭعا جۋىق باقىلاۋشى وقىتۋعا ارەكەتتەنىپ، جوسپارلاپ وتىرمىز”، – دەيدى ول.

پىكىرلەر