الماتىدا "سارىارقا" جانە "باۋىرجان مومىشۇلى" مەترو ستانتسيالارى ىسكە قوسىلدى، دەپ حابارلايدى "ادىرنا" ۇلتتىق پورتالى.
مەترونىڭ اشىلۋى 30 مامىر كۇنى ءوتتى. جاڭا ستانتسيالار قازىرگى قىزمەت كورسەتىپ تۇرعان توعىز ستانتسيانىڭ جالعاسى رەتىندە قالا ورتالىعىن جاتىن اۋداندارمەن بايلانىستىرادى.
ەكى جاڭا ستانتسيا ىسكە قوسىلعالى مەترو جەلىسىنىڭ جالپى ۇزىندىعى 3,1 شاقىرىمعا ۇزارىپ، ەندى 13,4 شاقىرىمدى قۇرايتىن بولدى. جەلى بويىنا 7-10 مينۋت سايىن جۇرەتىن تورتۆاگوندى 15 ەلەكتر پويىزىن جىبەرۋ جوسپارلانىپ وتىر.
قازىرگى تاڭدا مەترو كۇنىنە 45 مىڭعا جۋىق جولاۋشى تاسىمالدايدى. جاڭا ستانتسيالار ىسكە قوسىلعاننان كەيىن بۇل كورسەتكىش كۇنىنە 85 مىڭ جولاۋشىعا دەيىن وسەدى دەپ جوسپارلانىپ وتىر.
"ماسكەۋدەن" كەيىنگى "سارىارقا" ستانتسياسى اباي داڭعىلى بويىندا التىنسارين داڭعىلى مەن ساين كوشەلەرىنىڭ ارالىعىندا Family Park ماڭىندا ورنالاسقان. تەرەڭ سالىنعان، ەكى كىرەبەرىسى مەن ءبىر ۆەستيبيۋلى بار. ستانتسيادا ەكى جەدەلساتى مەن سەگىز ەسكالاتور ورناتىلعان. ينتەرەر جاساۋ كەزىندەگى نەگىزگى يدەيا - سارىارقانىڭ شەكسىز كەڭ دالاسىنىڭ اسەمدىگىن كورسەتۋ. قابىرعالارى ءمارمار تاستاردان قۇراستىرىلىپ، گرانيتپەن ورنەكتەلگەن. شەتكى جاعىنداعى قابىرعادا جازىق دالانىڭ ۇستىنەن شىعىپ كەلە جاتقان كۇن، ونىڭ بەرگى جاعىندا قازاقستان استاناسى بەينەسى ماڭىندا شاۋىپ كەلە جاتقان جۇيرىك اتتار بەينەلەنگەن پاننو ورناتىلعان.
"باۋىرجان مومىشۇلى" ستانتسياسى اباي داڭعىلى بويىندا مومىشۇلى كوشەسىنىڭ باتىسىندا ورنالاسقان. تاياز ورنالاسقان، ەكى ۆەستيبيۋل مەن التى كىرەبەرىسى بار. ستانتسيادا التى جەدەلساتى مەن ون بەس ەسكولاتور ورناتىلعان. پلاتفورما ۇزىندىعى 108 مەتر الماتى مەترو جەلىسىنىڭ ون ءبىرىنشى ستانتسياسى ازىرگە سوڭعى ستانتسيا بولىپ سانالادى.
ستانتسيا ۇلكەن تۇرعىن الابىنىڭ ورتاسىندا ورنالاسقان. قابىرعالار مەن تىرەۋىشتەردى بەزەندىرۋ ءۇشىن اشىق رەڭكتى مارجان-سۇر ءتۇستى اعاش تەكتەس كەراميكالىق پانەلدەر، ال ەدەندى قاپتاۋعا - اشىق سۇر ءتۇستى تابيعي گرانيت پايدالانىلعان.
بولاشاقتا "قالقامان" ستانتسياسى قۇرىلىسىن اياقتاپ، مەترونى باتىس باعىتتا "بارلىق" بازارىنا دەيىن دامىتۋ جوسپارلانعان.
"ادىرنا" ۇلتتىق پورتالى
