توقاەۆ تاپسىرماسى: الماتىدا 25 مىڭنان استام ادام جۇمىسپەن قامتىلدى

1740
Adyrna.kz Telegram

مەملەكەت باسشىسى قاسىم-جومارت توقاەۆ ۇنەمى ەلدىڭ تۇرمىس-تىرشىلىگىن، الەۋمەتتىك جاعدايىن نازاردا ۇستايدى. وسى توڭىرەگىندە ۇكىمەتكە ءبىر قاتار تاپسىرمالار بەرەتىنىدە بەلگىلى. پرەزيدەنت قاراستىرعان تۇيىتكىلدى ماسەلەلەردىڭ ءبىرى- جۇمىسپەن قامتۋ.  توقاەۆ  ۇكىمەتتىڭ كەڭەيتىلگەن قۇرامداعى وتىرىسى كەزىندە اتالعان پروبلەمانى ورتاعا سالعان بولاتىن، دەپ حابارلايدى «ادىرنا» ءتىلىشىسى.

«تاعى ءبىر ماسەلە – جۇمىسپەن قامتۋ. ءبىز «جۇمىسپەن قامتۋدىڭ جول كارتاسىن» قابىلداپ، وعان 1 ترلن تەڭگە بولدىك. بۇل قارجىنىڭ 98,2 پايىزى يگەرىلدى. باعدارلاما حالىقتى ەڭبەكپەن قامتىپ، ىسكەرلىك بەلسەندىلىكتى قولداۋ ءۇشىن ماڭىزدى ءرول اتقاردى. الايدا، ونداعان جانە جۇزدەگەن مىڭ جۇمىس ورنى اشىلعانى تۋرالى اقپاراتتى تەكسەرگەندە، ول زەينەتاقى جانە سالىق تولەمدەرىنە سايكەس كەلە بەرمەيدى، - دەگەن بولاتىن قاسىم-جومارت كەمەلۇلى .

بۇقارانى تولعاندىرعان جۇمىسقا ورنالاسۋ ءىسى الماتى قالاسىندا ءوز رەتىمەن جۇزەگە اسۋدا. الماتى قالالىق جۇمىسپەن قامتۋ ورتالىعىنىڭ ديرەكتورى ساعىندىق كەنجەباەۆتىڭ بەرگەن مالىمەتىنە سۇيەنسەك، بۇگىنگى كۇنى جۇمىس بەرۋشىلەر ەلەكتروندى ەڭبەك بيرجاسىنا 4306-دان استام بوس جۇمىس ورىندارى تۋرالى مالىمەتتەردى ورنالاستىرعان. بۇل دەگەنىمىز، شاھاردا ادام ەڭبەگىنە دەگەن سۇرانىستىڭ جوعارى ەكەنىنىڭ ايقىن دالەلى.

ايماقتاعى بوس جۇمىس ورنىنا ورنالاسۋشى ادام سانى دا ارتىپ كەلەدى. ماسەلەن، جىل باسىنان بەرى 25 221 ادام جۇمىسقا ورنالاسسا، ونىڭ 13 343-ءى تۇراقتى، 11 878-ءى ۋاقىتشا جۇمىسقا كىردى.

«ازاماتتار مەن جۇمىس بەرۋشىلەرگە ىڭعايلى بولۋ ءۇشىن 2018 جىلدان باستاپ قىزمەتتەردى ەلەكتروندى فورماتقا كوشىرۋدى جۇزەگە اسىرۋ باستالدى. بۇگىنگى كۇنى بارلىق قىزمەتتەر ونلاين تۇردە كورسەتىلەدى، بۇل ءوتىنىش بەرۋشىنى جۇمىسسىز رەتىندە تىركەۋ جانە جۇمىسقا ورنالاسۋعا جاردەمدەسۋدىڭ بەلسەندى شارالارىنا جولداما الۋ، جۇمىس بەرۋشى ءۇشىن بۇل بوس جۇمىس ورىندارىن جاريالاۋ، كادرلاردى ىرىكتەۋ، بەلسەندى شارالارعا قاتىسۋعا ءوتىنىش بەرۋ»، - دەدى ساعىندىق كەنجەباەۆ.

سونىمەن قاتار، ول بيىل 3 قازاننان باستاپ 2023 جىلعا ارنالعان سۋبسيديالاناتىن جۇمىس ورىندارىنا قاتىسقىسى كەلەتىن جۇمىس بەرۋشىلەردىڭ وتىنىشتەرىن قابىلداۋ باستالعانىن ايتتى. قابىلداۋ ايدىڭ سوڭىنا دەيىن جۇرگىزىلەدى.

«جۇمىس ىزدەۋشىلەردى تارتۋ ماقساتىندا جۇمىسپەن قامتۋ ورتالىعىنىڭ قىزمەتكەرلەرى جاستار رەسۋرستىق ورتالىقتارىمەن بىرلەسىپ، ستيحيالىق «ەڭبەك بيرجالارىندا»، بازارلاردا، حالىق كوپ جينالاتىن ورىنداردا، جۇمىسپەن قامتۋعا جاردەمدەسۋدىڭ شارالارى بويىنشا ءتۇسىندىرۋ جۇمىستارىن جۇرگىزدى. اتاپ ايتقاندا، «التىن وردا» امبەباپ بازارى اۋدانىنداعى «بارلىق»، «باراحولكا»، «سارى ارقا»، شولوحوۆ كوشەسى بويىنداعى «الماتى 1» سياقتى بازارلار قامتىلدى»، - دەدى ول.

پىكىرلەر