Memleket basshysy Qasym-Jomart Toqaev únemi eldiń turmys-tirshiligin, áleýmettik jaǵdaıyn nazarda ustaıdy. Osy tóńireginde Úkimetke bir qatar tapsyrmalar beretinide belgili. Prezıdent qarastyrǵan túıitkildi máselelerdiń biri- jumyspen qamtý. Toqaev Úkimettiń keńeıtilgen quramdaǵy otyrysy kezinde atalǵan problemany ortaǵa salǵan bolatyn, dep habarlaıdy «Adyrna» tilishisi.
«Taǵy bir másele – jumyspen qamtý. Biz «Jumyspen qamtýdyń jol kartasyn» qabyldap, oǵan 1 trln teńge bóldik. Bul qarjynyń 98,2 paıyzy ıgerildi. Baǵdarlama halyqty eńbekpen qamtyp, iskerlik belsendilikti qoldaý úshin mańyzdy ról atqardy. Alaıda, ondaǵan jáne júzdegen myń jumys orny ashylǵany týraly aqparatty teksergende, ol zeınetaqy jáne salyq tólemderine sáıkes kele bermeıdi, - degen bolatyn Qasym-Jomart Kemeluly .
Buqarany tolǵandyrǵan jumysqa ornalasý isi Almaty qalasynda óz retimen júzege asýda. Almaty qalalyq Jumyspen qamtý ortalyǵynyń dırektory Saǵyndyq Kenjebaevtyń bergen málimetine súıensek, búgingi kúni jumys berýshiler elektrondy eńbek bırjasyna 4306-dan astam bos jumys oryndary týraly málimetterdi ornalastyrǵan. Bul degenimiz, shaharda adam eńbegine degen suranystyń joǵary ekeniniń aıqyn dáleli.
Aımaqtaǵy bos jumys ornyna ornalasýshy adam sany da artyp keledi. Máselen, jyl basynan beri 25 221 adam jumysqa ornalassa, onyń 13 343-i turaqty, 11 878-i ýaqytsha jumysqa kirdi.
«Azamattar men jumys berýshilerge yńǵaıly bolý úshin 2018 jyldan bastap qyzmetterdi elektrondy formatqa kóshirýdi júzege asyrý bastaldy. Búgingi kúni barlyq qyzmetter onlaın túrde kórsetiledi, bul ótinish berýshini jumyssyz retinde tirkeý jáne jumysqa ornalasýǵa járdemdesýdiń belsendi sharalaryna joldama alý, jumys berýshi úshin bul bos jumys oryndaryn jarııalaý, kadrlardy irikteý, belsendi sharalarǵa qatysýǵa ótinish berý», - dedi Saǵyndyq Kenjebaev.
Sonymen qatar, ol bıyl 3 qazannan bastap 2023 jylǵa arnalǵan sýbsıdııalanatyn jumys oryndaryna qatysqysy keletin jumys berýshilerdiń ótinishterin qabyldaý bastalǵanyn aıtty. Qabyldaý aıdyń sońyna deıin júrgiziledi.
«Jumys izdeýshilerdi tartý maqsatynda Jumyspen qamtý ortalyǵynyń qyzmetkerleri jastar resýrstyq ortalyqtarymen birlesip, stıhııalyq «eńbek bırjalarynda», bazarlarda, halyq kóp jınalatyn oryndarda, jumyspen qamtýǵa járdemdesýdiń sharalary boıynsha túsindirý jumystaryn júrgizdi. Atap aıtqanda, «Altyn Orda» ámbebap bazary aýdanyndaǵy «Barlyq», «Baraholka», «Sary Arqa», Sholohov kóshesi boıyndaǵy «Almaty 1» sııaqty bazarlar qamtyldy», - dedi ol.
