الماتىدا رەسمي اتاۋى جوق 156 كوشەگە جاڭا اتاۋ بەرىلمەك. بۇل تۋرالى ۇسىنىستى قالا اكىمدىگى دايىنداپ، ءماسليحاتتىڭ قاراۋىنا جولداعان، دەپ حابارلايدى “ادىرنا” ۇلتتىق پورتالى Krisha.kz-كە سىلتەپ.
ۇسىنىلعان اتاۋلار قاتارىندا مادەنيەتكە، ونەرگە جانە تاريحقا ەلەۋلى ۇلەس قوسقان تانىمال تۇلعالاردىڭ ەسىمدەرى بار. ماسەلەن، بوستاندىق اۋدانىنداعى كوشەلەردىڭ بىرىنە 2018 جىلى قازا تاپقان قازاقستاندىق مانەرلەپ سىرعاناۋشى دەنيس تەننىڭ ەسىمىن بەرۋدى ۇسىنعان.
سونداي-اق كوشەلەرگە مىناداي تۇلعالاردىڭ ەسىمدەرى بەرىلۋى مۇمكىن:
- حو شي مين – ۆەتنامدىق رەۆوليۋتسيونەر ءارى ساياسي قايراتكەر،
- ناتاليا ساتس – الەمدەگى العاشقى بالالارعا ارنالعان مۋزىكالىق تەاتردىڭ نەگىزىن قالاۋشى،
- ءابدۋالي قايداروۆ – قازاق ءتىلىن زەرتتەگەن تانىمال تۇركىتانۋشى، عالىم.
بۇدان بولەك، الماتىدا مۇنارا،سارقىراما، قۇلىن، ابىز، سۇڭقار، قۇدىرەت دەگەن كوشەلەر پايدا بولۋى مۇمكىن.
كوشە اتاۋلارىن بەكىتۋ ماسەلەسى تۇرعىندارمەن تالقىلانىپ، ءماسليحات دەپۋتاتتارىنىڭ قاراۋىنان كەيىن سەسسياعا شىعارىلىپ، سوڭعى شەشىم قابىلدانادى.
