ميللياردتاعان تەڭگەنىڭ كونتراباندالىق ءونىمىن تاسىعان ەكس-پرەزيدەنت نۇرسۇلتان نازارباەۆتىڭ قارىنداسى ءانيپا نازارباەۆانىڭ قاتىسى بار كومپانياعا قاتىستى سوت ۇكىمى شىقتى. بۇل تۋرالى قارجى مونيتورينگ اگەنتتىگى اقپارات تاراتقان، دەپ حابارلايدى “ادىرنا”
اقپاراتقا سايكەس، تەرگەۋ بارىسىندا ۋاكىلەتتى ەكونوميكالىق وپەراتور مارتەبەسىنە يە «Group of the Companies TDA» جاۋاپكەرشىلىگى شەكتەۋلى سەرىكتەستىگى قىتايدان قازاقستانعا تۇتىنۋ تاۋارلارى تيەلگەن 100-دەن استام كونتەينەردى كونتراباندالىق جولمەن زاڭسىز اكەلگەنى انىقتالعان.
بۇدان بولەك، كومپانيا قاراماعىنداعى 10 جاۋاپكەرشىلىگى شەكتەۋلى سەرىكتەستىك ارقىلى جالعان شوت-فاكتۋرالار جاساعان. وسىلايشا مەملەكەتكە 10 ميلليارد تەڭگە زالال كەلتىرگەن.
تەرگەپ-تەكسەرۋ كەزىندە مەملەكەت بيۋدجەتىنە 643 ميلليون تەڭگە قايتارىلعان. سوت شەشىمىمەن 1,3 ميلليارد تەڭگە بولاتىن تاۋار، كۇدىكتىلەرگە تيەسىلى 300 ميلليون تەڭگە سوماسىنداعى مۇلىككە شەكتەۋ قويىلعان.
بۇعان قوسا، اتالعان كومپانيامەن بايلانىستا بولعان 47 سەرىكتەس كاسىپورىن ءوز ەركىمەن ءوزارا ەسەپ ايىرىسۋدى توقتاتىپ، بيۋدجەتكە 240 ملن تەڭگە سالىق تولەگەن.
الماتى قالاسىنىڭ المالى اۋداندىق سوتىنىڭ ۇكىمىمەن كىنالى تۇلعالار مۇلكىن تاركىلەي وتىرىپ، 1 جىل 4 ايدان 4 جىل 6 ايعا دەيىن باس بوستاندىعىنان ايىرىلعان. سونىمەن قاتار، ىسكە قاتىسى بار ءبىر ادامعا حالىقارالىق ىزدەۋ جاريالاندى.
ايتا كەتسەك، 2022 جىلى ماۋسىمدا قازاقستاننىڭ باس پروكۋراتۋراسى «Group of the Companies TDA» كومپانياسىنىڭ تاۋارلاردى راسىمدەۋ كەزىندە زاڭبقزۋشىلىقتار جاساعانى انىقتالعانىن حابارلاعان. اشىق دەرەككوزدەردە بۇل كومپانيانىڭ قۇرىلتايشىلارىنىڭ ءبىرى ەكس-پرەزيدەنت نۇرسۇلتان نازارباەۆتىڭ قارىنداسى ءانيپا نازارباەۆا ەكەنى ايتىلعان. ەلەكتروندى ۇكىمەت بازاسىنداعى قۇجاتتا Group Of The Companies Tda سەرىكتەستىگىنىڭ تاعى ءبىر قۇرىلتايشىسى ءالي جانبولاتۇلى قىلىشپاەۆ ءارى وسى كومپانيانىڭ ديرەكتورى دەپ جازىلعان-دى.
