Bügın Atyrau qalalyq №2 sotynda oblys äkımınıŋ eks-orynbasary Baqytgül Hamenova sotta özınıŋ soŋǧy sözın aitty, dep habarlaidy “Adyrna” ūlttyq portaly.
Ol tergeuge köŋılı tolmaitynyn aityp, kınäsız ekenın mälımdep, özın aqtaudy sūrady. Sondai-aq, Hamenova soŋǧy sözınde sottyŋ bastalǧanynan berı 11 ai ötkenın, sondyqtan qylmystyq oqiǧa jetkılıktı türde tolyq jäne tereŋ tergeldı dep sanaitynyn atap öttı.
Söz basynda ol onyŋ ısın Antikor qyzmetkerlerı tolyǧymen oidan şyǧarǧanyn sol sebeptı özınıŋ kınäsız ekenın de aitty.
"Olar eşnärsenı jasyrmai, jasaǧan qylmystaryn aityp berdı. Bız olardyŋ qylmysy turaly aitqandaryn şyndyq deuge qūqylymyz. Būl şyndyqqa qol jetkızudı aitarlyqtai jeŋıldetedı. Kınämdı moiyndap, özım jaily aita kele, menıŋ būl ıske qatysym bastapqyda bolmaǧany belgılı boldy. memlekettık aiyptauşy mūny körmei me, älde özınıŋ qylmystyq äreketsızdıgın moiyndaǧysy kelmei me, müldem kereǧar pıkırdı aityp otyr", – dedı Hamenova sotta.
Sonymen qatar, ol sottaluşylar – oblystyq mädeniet basqarmasynyŋ būrynǧy basşysy Aqylbek Rysqaliev pen "Balqytu" JŞS direktory Ömırtai Adamovtyŋ kınäsın olardyŋ eşqaisysy daulamaitynyn jetkızdı. Odan bölek, qazır azamattardyŋ köpşılıgı qazaqstandyq sotqa senbeitının atap ötken. Özınıŋ ısın sözıne däiek etken ol būl jaǧdaidyŋ senuge bolmaitynyn körsetkenın aitqan.
"Öitkenı būl ıske qatysy bar anyqtauşylar, tergeuşıler, prokurorlar zaŋ müddesıne opasyzdyq jasap, maǧan oidan şyǧarylǧan aiypty aşyq qoldap otyr. Sot ta osy jolmen kete beretın bolsa elımızdıŋ, balalarymyzdyŋ jarqyn da baiandy bolaşaǧyna senımımız öşedı. Sebebı osyndai jaǧdaida zaŋ üstemdıgın qamtamasyz etu, qūqyqtyq memleket qūru ūrandarynyŋ jalǧan ekenın köruge bolady", – deidı aiyptaluşy.
Sözınıŋ soŋynda Hamenova özın aqtaudy jäne ädıl ükım şyǧarudy sūrady.
"Maǧan taǧylǧan aiypty alyp tastap, būryn jariialaǧan jeke şeşımdı şyǧaruyŋyzdy sūraimyn. Men qylmysker emespın, sondyqtan öz kınäsızdıgımdı däleldeu üşın soŋyna deiın baramyn", – dep qorytyndylady ol.
Sondai-aq, sotta soŋǧy sözderın sottaluşylar oblystyq mädeniet basqarmasynyŋ būrynǧy basşysy Aqylbek Rysqaliev pen "Balqytu" JŞS direktory Ömırtai Adamov aitty. Ükım 15 qaraşada şyǧady.
Aita keteiık, eks-şeneunık pen oblystyq mädeniet basqarmasynyŋ basşysy Aqylbek Rysqaliev Atyrauda Abai eskertkışın ornatuǧa memlekettık satyp alu kelısımın jasasu üşın 4,5 million teŋge kölemınde para aldy degen küdıkke ılındı.
