Búgin Atyraý qalalyq №2 sotynda oblys ákiminiń eks-orynbasary Baqytgúl Hamenova sotta óziniń sońǵy sózin aıtty, dep habarlaıdy “Adyrna” ulttyq portaly.
Ol tergeýge kóńili tolmaıtynyn aıtyp, kinásiz ekenin málimdep, ózin aqtaýdy surady. Sondaı-aq, Hamenova sońǵy sózinde sottyń bastalǵanynan beri 11 aı ótkenin, sondyqtan qylmystyq oqıǵa jetkilikti túrde tolyq jáne tereń tergeldi dep sanaıtynyn atap ótti.
Sóz basynda ol onyń isin Antıkor qyzmetkerleri tolyǵymen oıdan shyǵarǵanyn sol sebepti óziniń kinásiz ekenin de aıtty.
"Olar eshnárseni jasyrmaı, jasaǵan qylmystaryn aıtyp berdi. Biz olardyń qylmysy týraly aıtqandaryn shyndyq deýge quqylymyz. Bul shyndyqqa qol jetkizýdi aıtarlyqtaı jeńildetedi. Kinámdi moıyndap, ózim jaıly aıta kele, meniń bul iske qatysym bastapqyda bolmaǵany belgili boldy. memlekettik aıyptaýshy muny kórmeı me, álde óziniń qylmystyq áreketsizdigin moıyndaǵysy kelmeı me, múldem kereǵar pikirdi aıtyp otyr", – dedi Hamenova sotta.
Sonymen qatar, ol sottalýshylar – oblystyq mádenıet basqarmasynyń burynǵy basshysy Aqylbek Rysqalıev pen "Balqytý" JShS dırektory Ómirtaı Adamovtyń kinásin olardyń eshqaısysy daýlamaıtynyn jetkizdi. Odan bólek, qazir azamattardyń kópshiligi qazaqstandyq sotqa senbeıtinin atap ótken. Óziniń isin sózine dáıek etken ol bul jaǵdaıdyń senýge bolmaıtynyn kórsetkenin aıtqan.
"Óıtkeni bul iske qatysy bar anyqtaýshylar, tergeýshiler, prokýrorlar zań múddesine opasyzdyq jasap, maǵan oıdan shyǵarylǵan aıypty ashyq qoldap otyr. Sot ta osy jolmen kete beretin bolsa elimizdiń, balalarymyzdyń jarqyn da baıandy bolashaǵyna senimimiz óshedi. Sebebi osyndaı jaǵdaıda zań ústemdigin qamtamasyz etý, quqyqtyq memleket qurý urandarynyń jalǵan ekenin kórýge bolady", – deıdi aıyptalýshy.
Sóziniń sońynda Hamenova ózin aqtaýdy jáne ádil úkim shyǵarýdy surady.
"Maǵan taǵylǵan aıypty alyp tastap, buryn jarııalaǵan jeke sheshimdi shyǵarýyńyzdy suraımyn. Men qylmysker emespin, sondyqtan óz kinásizdigimdi dáleldeý úshin sońyna deıin baramyn", – dep qorytyndylady ol.
Sondaı-aq, sotta sońǵy sózderin sottalýshylar oblystyq mádenıet basqarmasynyń burynǵy basshysy Aqylbek Rysqalıev pen "Balqytý" JShS dırektory Ómirtaı Adamov aıtty. Úkim 15 qarashada shyǵady.
Aıta keteıik, eks-sheneýnik pen oblystyq mádenıet basqarmasynyń basshysy Aqylbek Rysqalıev Atyraýda Abaı eskertkishin ornatýǵa memlekettik satyp alý kelisimin jasasý úshin 4,5 mıllıon teńge kóleminde para aldy degen kúdikke ilindi.
