حالىقارالىق تۇركى اكادەمياسىنا م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى جانىنداعى ازيا جانە افريكا ەلدەرى ينستيتۋتىنان موڭعوليانىڭ نومعون القابىندا اشقان ايرىقشا جاڭالىعىمەن ارنايى قۇتتىقتاعان حات كەلىپ ءتۇستى.
حاتتا قۇتلىق قاعان ەسكەرتكىشىنىڭ تابىلۋى “دۇنيەجۇزىلىك عىلىمداعى ماڭىزدى وقيعا سانالاتىنىن” اتاپ وتكەن. سونىمەن قاتار، مۇنداي ماڭىزدى جاڭالىقتىڭ تۇركولوگيانىڭ دامۋىنا ايرىقشا سەرپىن بەرەتىنى ايتىلعان.
“سىزدەردى جەكە ءوزىمنىڭ جانە م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ ازيا جانە افريكا ەلدەرى ينستيتۋتى ۇجىمى اتىنان موڭعوليانىڭ ارحانعاي ايماعىندا تۇركى اكادەمياسىنىڭ ارحەولوگ-ماماندارى اشقان ايرىقشا ماڭىزدى عىلىمي جاڭالىعىمەن شىن جۇرەكتەن قۇتتىقتايمىن. تاريحتا “تۇرك” اتاۋى العاش رەت كەزدەسەتىن ەڭ كونە جازبا ەسكەرتكىشىنىڭ تابىلۋى دۇنيەجۇزىلىك عىلىمدا ماڭىزدى وقيعا بولىپ سانالادى جانە بۇل تۇركولوگيانىڭ عىلىمي سالا رەتىندە دامۋىنا سونى سەرپىن بەرەدى. سىزگە جانە ءسىزدىڭ ۇجىمعا بۇدان ءارى قاراي دا شىعارماشىلىق تابىس تىلەيمىن. ازيا جانە افريكا ەلدەرى ينستيتۋتى مەن تۇركى اكادەمياسى اراسىندا الداعى ۋاقىتتا تابىستى ارىپتەستىك ورنايتىنىنا سەنەمىن” دەلىنگەن اكادەميا پرەزيدەنتى دارحان قىدىرالىنىڭ اتىنا كەلگەن قۇتتىقتاۋ حاتتا.
ايتا كەتۋ كەرەك، بيىل حالىقارالىق تۇركى اكادەمياسى موڭعوليانىڭ ارحەولوگيا ينستيتۋتىمەن بىرلەسىپ ۇيىمداستىرعان عىلىمي ەكسپەديتسياسى ناتيجەسىندە نومعون القابىنان كونە تۇركى داۋىرىنە جاتاتىن بىتىكتاستىڭ جوعارعى بولىگى مەن عۇرىپتىق كەشەنىن تاپقان بولاتىن. ەكسپەديتسيا جۇمىسىنا اكادەميانىڭ عىلىمي قىزمەتكەرلەرى، بەلگىلى تۇركولوگ ءناپىل بازىلحان مەن نۇربولات بوگەنباەۆ قاتىستى. تۇركى اكادەمياسىنىڭ عالىمدارى ەسكەرتكىشكە قاشالعان جازۋلاردى وقىپ، ونىڭ ەكىنشى تۇركى قاعاندىعىن قۇرعان قۇتلىق قاعانعا ارنالعانىن انىقتاپ وتىر.
