قازۇۋ-دىڭ جۋرناليستيكا فاكۋلتەتىندە شەبەرلىك ساعاتتارى ءوتتى. اپتالىق ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ ستۋدەنتتەرى ءۇشىن وتە اسەرلى كەزدەسۋلەرىمەن ەستە قالدى. اتالعان شارا «باسپاگەرلىك-رەداكتورلىق جانە ديزاينەرلىك ونەر» كافەدراسىنىڭ ۇيىمداستىرۋىمەن ءوتتى.
ەلىمىزگە بەلگىلى باسپا جانە جۋرناليستيكا سالالارىندا وزىندىك قولتاڭبالارىن قالدىرىپ، ادەبيەتىمىزدە ويىپ ورىن العان دارا تۇلعالارىمىز ارنايى كەلىپ، ستۋدەنتتەرمەن وي ءبولىستى. جاستار تاراپىنان قويىلعان سۇراقتارعا دا جاۋاپ بەرىپ، ستۋدەنتتەردىڭ باسپاگەر-رەداكتور بولۋعا دەگەن ىنتا-جىگەرىن ارتتىرا ءتۇستى. اتاپ ايتار بولساق، كەلگەن قوناقتار قاتارىندا قازاقستاننىڭ ەڭبەك سىڭىرگەن قايراتكەرى، تمد جۋرناليستەر كونفەرەداتسياسى سىيلىعىنىڭ لاۋرەاتى، جۋرناليست-رەداكتور – قاينار ولجاي، «Steppe and WORLD Publishing» باسپاسى مەن «Alghayat» ادەبي اگەنتتىگىنىڭ نەگىزىن قالاۋشى رايسا سايران، «ارىس» باسپاسىنىڭ ديرەكتورى عاريفوللا انەس، «اق جەلكەن» جۋرنالىنىڭ باس رەداكتورى ەسەي جەڭىسۇلى، «ونەر» باسپاسىنىڭ ديرەكتورى اشىربەك كوپىش، «ادەبيەت» باسپا ءۇيىنىڭ جانە «مەرەي» باسپاسىنىڭ ديرەكتورى عالىم قاليبەكۇلى بولسا، وسى دارىستەردى «قازىنا» قازاق تىلىندەگى كىتاپ دۇكەندەرى جەلىسىنىڭ ديرەكتورى الماس شايكەن قورىتىندىلادى. مۇنداعى ماقسات – بولاشاق جۋرناليست ماماندارىنىڭ، ونىڭ ىشىندە باسپا سالاسىنىڭ ستۋدەنتتەرى ءۇشىن كىتاپتىڭ باسپاعا دايىندالۋىنان باستاپ، ونىڭ كىتاپ دۇكەندەرىنە تاراتىلۋىنا دەيىن اقپارات بەرۋ. سونىمەن قوسا، شەبەرلىك ساعاتىن وتكىزگەن ءاربىر قوناقتىڭ ءجۇرىپ وتكەن جولى، ءومىرى، ەڭبەك جولىمەن ستۋدەنتتەردى تانىستىرىپ، رەداكتورلىقتىڭ قىر-سىرىنان حاباردار ەتۋ. اسىلىندا، باسپاگەرلىك-رەداكتورلىق ماماندىعى – ەڭ ءبىرىنشى، ساۋاتتىلىقتى، جاۋاپكەرشىلىكتى قاجەت ەتەتىن ناعىز ونەر. سول سەبەپتى، رەداكتورلاۋدىڭ دا وزىنە ءتان ەرەجەلەرى بارىن، سونداي-اق قاسيەتتى ماماندىق ەكەنىن شەبەرلىك ساعاتتارى بارىسىندا ستۋدەنتتەر قانىقتى. كەلەلى كەزدەسۋلەرگە ارنايى قوناقتارمەن قوسا، وسى دارىستەردىڭ جوعارى دەڭگەيدە وتۋىنە ىقپال ەتكەن – «باسپاگەرلىك-رەداكتورلىق جانە ديزاينەرلىك ونەر» كافەدراسىنىڭ مەڭگەرۋشىسى ايگۇل امىرعاليقىزى رامازان، سونداي-اق وقىتۋشى-پروفەسسورلار قۇرامى: تەمىرعالي كوپباەۆ، ەرماحان شايحىۇلى، قوڭىر مۇحاتاەۆا، سەرىك قاليەۆ، بولاتبەك تولەپبەرگەن، دارمەن سمايىل جانە نازكەن جانسەرىكقىزى دا بار.
اتالعان شەبەرلىك ساعاتىنا قاتىسقان ستۋدەنتتەر "وسىنداي يگى شارانى ۇيىمداستىرىپ، ستۋدەنتتەردىڭ ماماندىق تاڭداۋدا قاتەلەسپەگەنىن تاعى ءبىر مارتە دالەلدەپ، جارقىن بولاشاققا جەتەلەگەن ءال-فارابي اتىنداعى قازاق ۇلتتىق ۋنيۆەرسيتەتى، جۋرناليستيكا فاكۋلتەتى، باسپاگەرلىك-رەداكتورلىق جانە ديزاينەرلىك ونەر كافەدراسىنا" ءوز العىستارىن ءبىلدىردى. مۇنداي تاعىلىمى مول ءارى عيبرات الاتىن شەبەرلىك ساعاتتارى باسپا سالاسىنىڭ ستۋدەنتتەرىنە بولاشاققا باعدارشام عانا ەمەس، سونىمەن قوسا جۋرناليستيكاعا باسقان العاشقى ادىمدار بولماق.
