مەن ايەلدەرگە ارنالعان كۆوتالارمەن مۇلدە كەلىسپەيمىن - تۇرسىنبەكوۆا

2217
Adyrna.kz Telegram

پرەزيدەنتتىككە كانديدات سالتانات تۇرسىنبەكوۆا قوستانايدا قۇقىق قورعاۋشىلارمەن جانە زاڭگەرلەرمەن كەزدەسۋ وتكىزدى.  وندا ول ەلدەگى باسشىلىق قىزمەتتەگى ايەلدەردىڭ قۇزىرەتتىلىگى تومەن ەكەنىن  ايتتى.

 «قازاقستانداعى باسشىلىق لاۋازىمدارداعى گەندەرلىك وكىلدىكتىڭ جاعدايى اسا ءماز ەمەس.  ايەلدەر ەل حالقىنىڭ باسىم بولىگىن قۇراسا دا، باسشىلىق قىزمەتتەگى ايەلدەر سانى وتە از.  قۇزىرەتتىلىك جوقتىعىنان ايەلدەردىڭ پىكىرى ەسكەرىلمەيدى»، - دەدى ول.

ۇلتتىق ستاتيستيكا بيۋروسىنىڭ مالىمەتى بويىنشا قازاقستان رەسپۋبليكاسىنىڭ حالقى 19 ميلليون ادامدى قۇرايدى، ونىڭ 52 پايىزى – ايەلدەر.  2020 جىلعى ەسەپكە سايكەس، ەلىمىزدە جۇمىس ىستەيتىن ءاربىر ەكىنشى ايەلدىڭ (47,3%) جوعارى نەمەسە جوعارى وقۋ ورنىنان كەيىنگى ءبىلىمى بولدى.  جوعارى ءبىلىمدى جۇمىسپەن قامتىلعان ەرلەردىڭ ۇلەسى نەبارى 38,1% قۇرايدى.

 «ءبىزدىڭ ەلدە ايەلدەر كوپ، ولاردىڭ اراسىندا ءبىلىمدىسى دە كوپ.  بىراق باسشىلىق قىزمەتتەردە كوزگە كورىنەتىن تەڭگەرىمسىزدىك بار. وعان مىنا جاعدايلاردى مىسال رەتىندە الۋعا بولادى: قازىر بىزدە وبلىس نەمەسە رەسپۋبليكالىق ماڭىزى بار قالانىڭ بىردە-ءبىر ايەل اكىمى جوق.  تەك ەكى ايەل مينيستر بار.  سودان كەيىن ولار ادەتتەگىدەي ايەلدەر عانا باسقاراتىن - دەنساۋلىق ساقتاۋ مەن الەۋمەتتىك قورعاۋ سالالارى.  پارلامەنتتەگى ايەلدەردىڭ سانى ۇشتەن بىرىنە دە جەتپەيدى», - دەيدى ول.

 سونداي-اق سپيكەر پارتيالىق تىزىمدەرگە ايەلدەر مەن جاستاردىڭ كەم دەگەندە 30 پايىزى كىرۋى كەرەك دەگەن كۆوتا تۋرالى دا ايتتى.

«بۇگىندە زاڭنامادا ايەلدەر قۇقىعىن شەكتەيتىن بەلگىلى ءبىر 30%-دىق  كۆوتالار قاراستىرىلعان. مەن بۇل كۆوتالارمەن مۇلدە كەلىسپەيمىن. باسقا ەشبىر ەلدە مۇنداي نارسە ءىس جۇزىندە جاسالىپ جاتقان جوق. بۇل 30%-دىق نورما بولاتىنداي قانداي دا ءبىر ءونىم ەمەس قوي. مەن ايەل دە ەر ازاماتتار ىستەيتىن بارلىق لاۋازىمداردا قىزمەت ەتۋى كەرەك دەپ ەسەپتەيمىن. قۇزىرەتتىلىك تەڭ بولۋى كەرەك! ەگەر بىزدە حالىقتىڭ 52 پايىزى ايەلدەر بولسا، پارلامەنتتەگى، كۆازيمەملەكەتتىك سەكتورداعى، كەز كەلگەن سالاداعى ايەلدەردىڭ ۇلەسى كەم دەگەندە 50 پايىز بولۋى ءتيىس. مەن ءوز باعدارلامامدا گەندەرلىك تەڭدىك تۋرالى دا ايتىپ ءجۇرمىن», – دەيدى سالتانات تۇرسىنبەكوۆا.

 ەسكە سالايىق، قوستاناي وبلىسى – كانديداتتىڭ سايلاۋ الدىنداعى ۇگىت-ناسيحات ساپارى اياسىنداعى جەتىنشى ءوڭىر.  مۇندا ول №4. ەمحانانىڭ دارىگەرلەرىمەن كەزدەسۋ وتكىزدى.  قۇقىق قورعاۋشى بۇعان دەيىن ەلوردادا، الماتى، شىمكەنت قالالارىندا، قاراعاندى، اقمولا جانە تۇركىستان وبلىستارىندا بولعان.

 

پىكىرلەر