قازاقستاننىڭ 16 وڭىرىندە مانداتىن تاپسىرعان دەپۋتاتتاردىڭ ورنىنا كەلەتىن دەپۋتاتتاردى سايلاۋ ناۋقانى باستالدى. بۇل تۋرالى ورتالىق سايلاۋ كوميسسياسىنىڭ مالىمدەدى، دەپ حابارلايدى "ادىرنا".
بۇگىن 71 ءبىرمانداتتى سايلاۋ وكرۋگتەرى بويىنشا ءماسليحات دەپۋتاتتارىن سايلاۋ (قوسىمشا سايلاۋ) وتەدى. ونىڭ ىشىندە 4 وبلىستىق ءماسليحات دەپۋتاتى، 15 قالالىق ءماسليحات دەپۋتاتى، 52 اۋداندىق ءماسليحات دەپۋتاتى سايلانادى.
مالىمەت بويىنشا، بۇل سايلاۋ ناۋقانىنا 429 سايلاۋ كوميسسياسى: 16 اۋماقتىق، 58 اۋداندىق، قالالىق، 70 وكرۋگتىك، 285 ۋچاسكەلىك سايلاۋ كوميسسيالارى، 2750 سايلاۋ كوميسسياسىنىڭ مۇشەسى جۇمىلدىرىلعان.
اتالعان ناۋقاندى وتكىزۋگە دايىندىق شەڭبەرىندە بۇعان دەيىن ورتالىق سايلاۋ كوميسسياسىنىڭ مۇشەلەرى مەن اپپاراتتىڭ جاۋاپتى قىزمەتكەرلەرى قوسىمشا سايلاۋ وتەتىن 13 وڭىرگە ينسپەكتسيالىق ساپارمەن بارىپ قايتقان.
رەسپۋبليكا ماڭىزى بار قالالار – استانا، الماتى جانە شىمكەنت، سونداي-اق جەتىسۋ وبلىسىندا سايلاۋ جوسپارلانباعان.
سايلاۋ وتەتىن ايماقتار:
الماتى وبلىسىندا – ۇيعىر اۋداندىق ءماسليحاتىنىڭ شىعىپ قالعان دەپۋتاتىنىڭ ورنىنا سايلاۋ وتەدى.
اباي وبلىسىندا – اقسۋات، بورودۋليحا، جارما، كوكپەكتى جانە ماقانشى اۋداندارىنىڭ ءماسليحاتتارىنا دەپۋتاتتار سايلانادى.
اقمولا وبلىسىندا – اقكول، زەرەندى جانە تسەلينوگراد اۋداندارىنىڭ ءماسليحاتتارىنا قوسىمشا سايلاۋ وتەدى.
اقتوبە وبلىسىندا – اقتوبە قالالىق ءماسليحاتى مەن بايعانين، ىرعىز، قارعالى، ويىل، حرومتاۋ جانە شالقار اۋداندارىنىڭ ءماسليحاتتارىنا سايلاۋ وتەدى.
اتىراۋ وبلىسىندا – جىلىوي، يندەر جانە ماقات اۋداندارىنىڭ ءماسليحاتتارىنا دەپۋتاتتار سايلانادى.
شىعىس قازاقستان وبلىسىندا – زايسان اۋداندىق ءماسليحاتىنا سايلاۋ وتەدى.
جامبىل وبلىسىندا – جۋالى جانە مەركى اۋداندارىنىڭ ءماسليحاتتارىنا سايلاۋ وتەدى.
باتىس قازاقستان وبلىسىندا – قاراتوبە جانە سىرىم اۋداندارىنىڭ ءماسليحاتتارىنا دەپۋتاتتار سايلانادى.
قاراعاندى وبلىسىندا – قاراعاندى جانە ساران قالالىق ءماسليحاتتارىنا، سونداي-اق بۇقار جىراۋ اۋداندىق ءماسليحاتىنا سايلاۋ وتەدى.
قوستاناي وبلىسىندا – قوستاناي وبلىستىق ءماسليحاتىنا سايلاۋ وتكىزىلەدى.
قىزىلوردا وبلىسىندا – قىزىلوردا قالالىق ءماسليحاتى مەن جالاعاش اۋداندىق ءماسليحاتىنا سايلاۋ وتەدى.
ماڭعىستاۋ وبلىسىندا – جاڭاوزەن قالاسى مەن بەينەۋ اۋدانىندا سايلاۋ وتەدى.
پاۆلودار وبلىسىندا – ەكىباستۇز جانە اقسۋ قالالىق ءماسليحاتتارىندا، سونداي-اق اقتوعاي، باياناۋىل، تەرەڭكول جانە ۋسپەن اۋداندارىنىڭ ءماسليحاتتارىندا سايلاۋ وتەدى.
سولتۇستىك قازاقستان وبلىسىندا – ماعجان جۇماباەۆ، تايىنشا، شال اقىن اۋداندارى مەن پەتروپاۆل قالالىق ءماسليحاتتارىندا سايلاۋ وتەدى.
تۇركىستان وبلىسىندا – تۇركىستان قالالىق ءماسليحاتىندا، سونداي-اق كەلەس، ورداباسى جانە سايرام اۋداندارىنىڭ ءماسليحاتتارىندا سايلاۋ وتەدى.
ۇلىتاۋ وبلىسىندا – ساتباەۆ جانە قاراجال قالالىق ءماسليحاتتارىنا سايلاۋ جوسپارلانعان.
سايلاۋ قورىتىندىسى 2025 جىلدىڭ 1 قاراشاسىندا شىعادى.
